Bujnoha biełaruskaha imparciora ciulpanaŭ złavili na padatkovych machinacyjach
Dziaržkantrol razam z padatkovymi orhanami vyjaviŭ, što adzin z najbujniejšych imparcioraŭ i aptovych pradaŭcoŭ ciulpanaŭ u Biełarusi ŭtojvaŭ ad padatkaabkładańnia miljonnyja dachody. Havorka idzie pra sialanska-fiermierskuju haspadarku ŭ Bresckaj vobłaści, nazva jakoj nie nazyvajecca.
Paviedamlajecca, što akramia vyroščvańnia sielskahaspadarčaj pradukcyi haspadarka zajmałasia taksama vyroščvańniem i prodažam cybulin ciulpanaŭ i karystałasia lhotnym padatkovym režymam dla vytvorcaŭ sielhaspradukcyi, pavodle jakoha padatak składaŭ 1% ad vałavoj vyručki.
Dla atrymańnia hetaj lhoty dola dachodaŭ ad ułasnaj sielhaspradukcyi pavinna była składać nie mienš za pałovu. Ale ŭžo da 2022 hoda prybytak ad prodažu ciulpanaŭ staŭ bolšy, čym ad prodažu harodniny i sadaviny.
Kab zachavać lhotny režym, kiraŭnik haspadarki razam sa svaim namieśnikam, jaki taksama byŭ uładalnikam biznesu, stvaryli padkantrolnuju kampaniju i štučna pieraraźmierkavali na jaje častku vyručki ad prodažu ciulpanaŭ. Farmalna kiraŭnikom hetaj firmy značyŭsia ich kiroŭca.
U vyniku takich dziejańniaŭ za 2022—2025 hady biudžet niedaatrymaŭ bolš za 1,3 miljona rubloŭ padatkaŭ. Pravierka taksama vyjaviła značnaje ŭtojvańnie vyručki: pradukcyju časta pradavali za najaŭnyja hrošy, a ŭ dakumientach sumy zanižalisia bolš čym u dvaccać razoŭ. Pavodle čarnavych zapisaŭ, tolki za apošnija dva hady ad padatkaŭ było schavana bolš za 10 miljonaŭ rubloŭ.
Akramia taho, vyjaŭlenyja fakty padatkovaha machlarstva. U padatkovyja orhany padavalisia fiktyŭnyja dakumienty pra nibyta prodaž ciulpanaŭ padkantrolnaj firmie pa zanižanaj canie z nastupnym ekspartam u Rasiju. Na hetaj padstavie ź biudžetu im byli viernutyja bolš za 950 tysiač rubloŭ PDV. Taksama zanižalisia kolkaść i košt cybulin, jakija pradavalisia fizičnym asobam.
U dačynieńni da padazravanych raspačali kryminalnyja spravy. Pad aryšt trapiła ich majomaść — čatyry kvatery i dziesiać aŭtamabilaŭ. Padčas pieratrusaŭ taksama kanfiskavali 440 tysiač jeŭra i 89 tysiač dalaraŭ. Padazravanyja, jak paviedamlajecca, pryznali svaju vinu.
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie23
Kamientary