U Polščy zaviali kryminałku za vykarystańnie pašparta Novaj Biełarusi? Nie. Voś što viadoma na hety momant
Biełarusu vydali novy dazvoł na žycharstva, ale ciapier adklikajuć jaho dla raźbiralnictva.
Inicyjatyva «Partyzanka» zajaviła, što biełarusa mohuć pazbavić mižnarodnaj abarony za vykarystańnie pašparta Novaj Biełarusi. I što, maŭlaŭ, jamu moža pahražać navat kryminalny pieraśled. Navinu z radaściu padchapili biełaruskija dziaržaŭnyja prapahandysty, ale ŭ historyi pakul vielmi mała kankretyki.
Što viadoma na hety momant — z kamientaroŭ «Partyzanki» i vystupleńnia jaje zasnavalnicy Hanny Macijeŭskaj na «Jeŭraradyjo».
Biełarus rabiŭ u Polščy čarhovuju zamienu dazvołu na žycharstva. Pakolki ŭ jaho skončyŭsia termin dziejańnia pašpartu, jon vyrašyŭ dadać da pakietu dakumientaŭ, jakija jon pradastaŭlaŭ, jašče i pašpart Novaj Biełarusi. U jaho pryniali dakumienty i — bolš za toje — navat vydali jamu novy dazvoł na žycharstva.
Adnak praź niekatory čas jon atrymaŭ apaviaščeńnie ab tym, što ŭ jaho dačynieńni raspačali praceduru ab pazbaŭleńni mižnarodnaj abarony ŭ Polščy. Hanna Macijeŭskaja miarkuje, što polskija čynoŭniki paličyli atrymańnie pašparta mahčymym uzajemadziejańniem ź biełaruskimi dziaržaŭnymi orhanami (bo nie razabralisia, što heta suvienirny dakumient) — jakoje zabaroniena ŭ situacyi, kali čałaviek prosić mižnarodnuju abaronu.
«Na hety momant čałaviek daŭ piśmovyja tłumačeńni pa situacyi. Najchutčej, pracedura pazbaŭleńnia mižnarodnaj abarony budzie spynienaja», — padsumoŭvaje «Partyzanka».
Razmova pra mahčymy kryminalny pieraśled biełarusa — advolnaja interpretacyja jurystaŭ. Na hety momant ničoha pra zaviadzieńnie kryminalnaj spravy nieviadoma.
Pašpart Novaj Biełarusi, biezumoŭna, nie źjaŭlajecca aficyjnym dakumientam, jaki zamianiaje pašpart, i nie moža vykarystoŭvacca dla identyfikacyi asoby.
Kamientary
[Zredahavana]