Što za Zorki? Pateścili novy biełaruski dadatak dla znajomstvaŭ

Miarkujučy z sacsietak, prahrama źjaviłasia na rynku niekalki miesiacaŭ tamu. 

Aŭtary dadatka vyrašyli ŭličyć sumny dośvied papiarednikaŭ. Reč u tym, što dejtynhavyja dadatki pa ŭsim śviecie ŭžo nie pieršy hod pieražyvajuć kryzis. Kab damahčysia ŭ hetych prahramach realnaj kamunikacyi, treba pradziracca praź biaskoncyja staronki kandydataŭ ci kandydatak na vaša serca, jakija treba svajpać (zmachvać) u pravilny bok. I dzie tut indyvidualnaść? 

Kali vy taksama kamuści spadabajeciesia i vas svajpnuć, možna budzie raspačać dyjałoh. Praŭda, nie dziviciesia, kali na vaša pieršaje ci dziasiataje paviedamleńnie nie adkažuć, na damoŭlenaje spatkańnie nie pryjduć, a kali i pryjduć, to vašy pohlady na adnosiny buduć kardynalna adroźnivacca ad pohladaŭ patencyjnaha partniora ci partniorki. Dy i znajści čałavieka, hatovaha da surjoznych adnosin, chutčej za ŭsio, budzie składana.

Kab choć trochi palehčyć situacyju, u Zorki prapanujuć davać pra siabie dadatkovuju infarmacyju. Pierš za ŭsio, možna budzie paznačyć, jaki partnior vam treba: doŭhaterminovy, karotkaterminovy, tolki siabar abo «prosta paviesialicca» — chutčej za ŭsio, tut majecca na ŭvazie partnior dla adzinkavaha seksu.

Pavialičyć

Taksama možna pastavić u profili miesca vučoby ci pracy, raskazać pra najaŭnaść dziaciej i pra toje, chto vy pa tempieramiencie: sanhvinik, chaleryk, miełancholik ci flehmatyk.

Jašče adzin cikavy raździeł maje nazvu «žyćciovyja pazicyi», ale nie čakajcie, što tut vam prapanujuć raskazać pra vaš bahaty ŭnutrany śviet. Pad žyćciovymi pazicyjami aŭtary dadatku majuć na ŭvazie staŭleńnie da sportu, ałkaholu i kureńnia — maŭlaŭ, jak časta hetyja źjavy prysutničajuć u vašym žyćci.

Pavialičyć

Možna taksama paznačyć intaresy — ad restaranaŭ i chakieju da inviestycyj i salsy. A taksama, jak i ŭ inšych dejtynhavych dadatkach, trochi raskazać pra siabie ŭ svabodnaj formie.

Pavialičyć

Chacia ŭ dadatku i jość biełaruskaja mova, ale ž pierakład zrobleny nie całkam. Naprykład, kali vy zachočacie apisać svajo staŭleńnie da sportu, daviadziecca abirać z ruskamoŭnych varyjantaŭ «sportsmien», «každyj dień», «nie zanimajuś», «často».

Cikavaja fiška — raździeł «intaresy». Tam profili karystalnikaŭ padzielenyja na šeść katehoryj: padarožniki, spartsmieny, miełamany, hurmany, ajcišniki i biznes. 

Pavialičyć

Kali nie dazvalać dadatku bačyć vašu hieałakacyju, prahrama budzie padkidvać vam ankiety karystalnikaŭ z roznych haradoŭ, miastečak i navat krain. U dadatku jość unutranaja «valuta», maniety, i za adzin svajp možna atrymać 0,1 ad hetaj maniety — praŭda, azartu heta nie dadaje.

Aŭtary dadatku apisvajuć jaho jak prahramu dla tych, chto stamiŭsia ad biaskoncych pierapisak i choča hłybini, ale nie prapanujuć dla hetaha ničoha pryncypova novaha. Akramia hetaha, jany abiacajuć idei dla spatkańniaŭ. Heta niabłaha, voś tolki ŭ samim dadatku tak i nie atrymałasia znajści adpaviedny raździeł. Jašče abiacajuć aktyŭna zmahacca z botami i fejkami.

Kali karystaješsia prahramaj, nie pakidaje adčuvańnie, što ankiet u joj vielmi mała. Naprykład, dadatak pa druhim kole prapanuje karystalnikaŭ, jakich ty ŭžo acaniŭ, abo chutka pačynaje padkidvać ankiety ludziej nie tvajho ŭzrostu.

Viadoma, dla maładoha dadatku mieć mała karystalnikaŭ — heta nie strašna, ale ž niezrazumieła, čamu Zorki musiać uźlacieć. Dadatak maje tuju ž chvarobu, jak i jaho bolš słavutyja kankurenty, dy i amal nie adroźnivajecca ad ich. Karystańnie im, nibyta karystańnie tym ža tyndaram, padobnaje da vymotvalnaj pracy pa pošuku svajho čałavieka, i nie kožny hatovy na heta vydatkavać čas.

Da taho ž, Zorki sprabujuć zajści na rynak, dzie ŭžo šmat hadoŭ pracujuć ich bolš słavutyja kankurenty. Jość i dadatki, dzie možna padbirać partniora pa intaresach i pa metach u adnosinach. Vierahodna, prahramu čakaje zabyćcio, i chutkaje, kali biełarusy nie pasprabujuć stvaryć niešta pryncypova novaje — viadoma, kali heta mahčyma.

• 0
• 1
• 1
• 6
• 0
• 1
• 0
• 0