Kaniec halivudskaj dramy: Warner Bros budzie nabyta Paramount, a nie Netflix

Amierykanski miedyjahihant Paramount Skydance abviaściŭ pra nabyćcio Warner Bros Discovery za 111 młrd dalaraŭ. Jon abyšoŭ stryminhavy servis Netflix u žorstkaj paŭhadavoj baraćbie za prava kupić adnu ź piaci najstarejšych kinastudyj Halivuda paśla taho, jak Netflix admoviŭsia ad svajoj prapanovy, piša Bi-bi-si.

Paramount atrymaje kantrol nad kinastudyjaj, jaje filmami i miedyjasietkami. Pahłynańnie takoha maštabu moža istotna źmianić kina– i miedyjałandšaft.

Abjadnanaja kampanija budzie ŭklučać CNN, CBS News, HBO i Nickelodeon, a taksama takija viadomyja franšyzy, jak «Hary Poter», «Hulnia tronaŭ», «Misija nievykanalnaja» i h.d.

Uhoda była adnahałosna ŭchvalena radami dyrektaraŭ abiedźviuch kampanij, miarkujecca, što jana budzie zavieršana ŭ trecim kvartale 2026 hoda, piša AFP.

Źlićcio, u vyniku jakoha budzie stvorana adna z najbujniejšych u śviecie kinastudyj, pavinna być uchvalena rehulatarami, u tym liku ŭ Kalifornii.

Jak nahadaŭ hienieralny prakuror štata Rob Bonta, patencyjnaje źlićcio «jašče nie źjaŭlajecca vyrašanym pytańniem».

«Ministerstva justycyi Kalifornii pravodzić adkrytaje rasśledavańnie, i my majem namier staranna jaho vyvučyć», — zajaviŭ jon. Paramount taksama spatrebicca ŭchvaleńnie Miniusta ZŠA, a taksama jeŭrapiejskich rehulujučych orhanaŭ.

Kampanija Warner Bros., jakaja viała pieramovy ab prodažy z 2025 hoda, napiaredadni zajaviła, što apošniaja prapanova Paramount «pieraŭzychodzić» prapanovu Netflix, jaki, u svaju čarhu, admoviŭsia pavysić svaju canu.

Kiraŭniki Netflix rastłumačyli svajo rašeńnie nie sprabavać pierabić prapanovu kankurentaŭ z Paramount tym, što «ŭhoda pa takoj canie bolš nie budzie finansava pryvabnaj».

Taki vynik nie byŭ pradvyznačany. U śniežni minułaha hoda kampanija Warner Bros užo pahadziłasia na prapanovu Netflix ab pahłynańni častki svaich aktyvaŭ u ramkach uhody, košt jakoj, uklučajučy doŭh, skłaŭ prykładna 82 młrd dalaraŭ.

Zatym Paramount zrabiła kankurujučuju prapanovu, jakaja była adchilena Warner Bros. Situacyja źmianiłasia, kali ŭ pačatku hetaha tydnia kampanija prapanavała canu jašče vyšej, plus adzin dalar za akcyju.

Što čakaje CNN

Uhoda pamiž Paramount i Warner Bros moža mieć surjoznyja nastupstvy dla adnaho z najbujniejšych navinavych brendaŭ ZŠA — telekanała CNN, jaki ŭvachodzić u Warner Bros.

Paramount uznačalvaje Devid Elisan, syn miljardera, zasnavalnika Oracle Łary Elisana, daŭniaha prychilnika i siabra prezidenta ZŠA Donalda Trampa i bujnoha sponsara Respublikanskaj partyi.

CNN tradycyjna bolš padtrymlivaje demakrataŭ, adnak adnosiny z Trampam u telekanała adkryta kanfrantacyjnyja. Staŭšy prezidentam u 2017 hodzie, jon nazvaŭ naviny CNN fake news i paśla časta krytykavaŭ navinavy kanał za aśviatleńnie jaho palityki. U śniežni 2025 hoda jon zajaviŭ, što, na jaho dumku, CNN pavinien być pradadzieny pry lubym zychodzie ŭhody z Warner Bros. Tramp nazyvaŭ kiraŭnictva CNN «karumpavanym abo niekampietentnym» i kazaŭ, što im nielha daviarać kiravańnie kanałam.

Kali stała viadoma, što pahadnieńnie z Paramount faktyčna dasiahnuta, kiraŭnik CNN Mark Tompsan razasłaŭ supracoŭnikam elektronny list, u jakim zaklikaŭ kaleh nie «rabić paśpiešnych vysnoŭ ab budučyni, pakul my nie daviedajemsia bolš», paviedamlajuć amierykanskija ŚMI. BBC źviarnułasia pa kamientary da CNN.

«Hledačy i čytačy CNN, mahčyma, zadajucca tym ža pytańniem, što i supracoŭniki CNN: što budzie aznačać kupla Paramount? Adkazy na hetaje pytańnie pakul mała, — pryznaje telekanał. — Kiraŭnictva Paramount u pryvatnych razmovach abmiarkoŭvaje mahčymaść abjadnańnia padraździaleńnia CBS News z CNN. Jany taksama vysoka aceńvajuć pracu navinavaj słužby CNN i jaje hłabalny achop. Ale supracoŭniki i hledačy CNN surjozna zaniepakojenyja tym, ci budzie kiraŭnik Paramount Devid Elisan padtrymlivać redakcyjnuju niezaležnaść telekanała va ŭmovach surjoznaj palityčnaj turbulentnaści».

Pakul pradstaŭniki Paramount ničoha nie paviedamili CNN, ni aficyjna, ni nieaficyjna, ab svaich płanach, adznačaje CNN. Paśla nabyćcia Paramount kantrolu nad kankurentam CNN — CBS News — Elisan źmianiŭ jaho kiraŭnictva, nahadvaje CNN.

U 2025 hodzie Tramp padaŭ u sud na CBS News za nibyta manipulacyi ź intervju jaho sapiernicy na vybarach prezidenta Kamały Charys, jakija, na dumku Trampa, pavinny byli schilić vybarščykaŭ da hałasavańnia za jaje. Sprava była ŭrehulavana paśla taho, jak Paramount pahadziłasia vypłacić 16 młn dołaraŭ Trampu, choć telekampanija viny nie pryznavała.

• 2
• 0
• 0
• 0
• 0
• 0
• 0
• 0