Jak K-pop, tolki B-pop — śpiavačka Palina Dabravolskaja zapisała novy albom na biełaruskaj i polskaj movach
Śpiavačka, režysiorka i aktrysa Palina Dabravolskaja (CHORNABROVA) prezientavała poŭnafarmatny albom M.I.L.A. — u im jana śpiavaje na biełaruskaj i polskaj movach, takim čynam malujučy karcinu svajho žyćcia jak emihrantki ŭ Polščy pamiž dźviuch kultur.
Ale ŭ hetym relizie niešta pra siabie adšukaje luby čałaviek, adkul i kudy b jon nie źjazdžaŭ.
U albomie šmat pra pošuk siabie i svaich karanioŭ, pra adčuvańnie choładu na čužynie, jaki možna paraŭnać z choładam miortvaha cieła. Ale taksama niamała samaironii i prademanstravanych vostrych zuboŭ, kab raskazać pra biełarusaŭ nie tolki z punktu hledžańnia zručnaści i cichaści. My možam pastajać za siabie i svaich i nie budziem admoŭčvacca, jak prypiače — davodzić artystka.
Palina farmuluje, što albom možna lohka nazvać biełaruskim popam: jość K-pop, niachaj budzie i B-pop. Ale heta nie monažanravaja praca — tut jość elemienty chip-chopa i elektronščyny. Dadatkova jarka prajaŭlenaja teatralnaja častka aŭtarki — u albomie hučać dakumientalnyja aŭdyjazapisy.
M.I.L.A stvoranaja ŭ suaŭtarstvie z žonkaj Paliny. A adzin z trekaŭ Bies zapisany razam ź biełaruskim žanočym choram «Śpievy», udzielnicaj jakoha artystka źjaŭlajecca sama.
Heta ŭžo čaćviorty albom na rachunku Paliny. Pieršyja dva — «Słova» i «Sarmatyja» — byli napisanyja na biełaruskaj movie, a treci, «COMA», staŭ całkam anhłamoŭnym. Darečy, z tekstu Maryi Martysievič «Sarmatyja» Dabravolskaja taksama zrabiła adnajmienny śpiektakl u žanry muzyčnaj dramy.
Palina Dabravolskaja — vypusknica Akademii mastactvaŭ. Da emihracyi pracavała jak aktrysa ŭ staličnaj «Terytoryi miuzikła», a taksama staviła ŭ jakaści režysiorki ŭłasnyja śpiektakli («Pakoj pamiraje», «Boh jeździć na rovary», «Sviciaź»). Užo ŭ Polščy dziaŭčyna prezientavała «Sarmatyju», «Vyjdu ź lesu, vyciahnu chrybiet, i jon budzie mnie słužyć zamiest miača», «Ryk».
Kamientary