10 000 aŭtaraŭ u Brytanii vypuścili «pustuju» knihu, pratestujučy suprać vykarystańnia štučnaha intelektu
U knizie tolki śpis aŭtaraŭ.
Kala 10 tysiač aŭtaraŭ, u tym liku nobieleŭski łaŭreat Kadzua Isihura, aŭtar sieryi detektyvaŭ «Kłub zabojstvaŭ pa čaćviarhach» Ryčard Osman, aŭtar ekranizavanych nieašpijonskich ramanaŭ «Pavolnyja koni» i «Pa darozie z mohiłak» Mik Hieran i aŭtarka «Jašče adnoj z rodu Balejn» Filipa Hrehary, apublikavali «pustuju» knihu ŭ znak pratestu suprać taho, što kampanii, jakija zajmajucca štučnym intelektam, vykarystoŭvajuć ich tvory biez dazvołu, piša The Guardian.
U «Don't Steal This Book» («Nie kradzi hetu knihu») adzinym źmiestam źjaŭlajecca śpis ich imionaŭ. Asobniki vydańnia razdajuć naviedvalnikam London Book Fair u aŭtorak — za tydzień da taho, jak urad Vialikabrytanii pavinien apublikavać acenku ekanamičnych nastupstvaŭ prapanavanych źmien u zakanadaŭstvie ab aŭtarskim pravie.
Da 18 sakavika ministry pavinny pradstavić acenku ekanamičnaha ŭpłyvu, a taksama spravazdaču ab chodzie kansultacyj nakont reformy zakona. Usio heta adbyvajecca na fonie niezadavolenaści tvorčych prafiesijanałaŭ tym, jak ich pracy vykarystoŭvajucca kampanijami štučnaha intelektu.
Arhanizatar knihi Ed Ńjutan-Reks, kampazitar i aktyvist za abaronu aŭtarskich pravoŭ tvorcaŭ, zajaviŭ, što industryja ŠI «pabudavana na skradzienaj pracy… uziataj biez dazvołu i apłaty».
Jon dadaŭ: «Heta zusim nie biaskryŭdnaje złačynstva — hienieratyŭny štučny intelekt kankuruje ź ludźmi, na čyich pracach jon navučajecca, pazbaŭlajučy ich srodkaŭ da isnavańnia. Urad pavinien abaranić tvorčych ludziej Vialikabrytanii i admovicca lehalizavać kradziež tvorčych rabot ŠI-kampanijami».
«Zusim nie nierazumna čakać, što ŠI-kampanii buduć płacić za vykarystańnie knih aŭtaraŭ», — skazała piśmieńnica Mełary Błekman.
Vydaŭcy taksama płanujuć zapuścić inicyjatyvu licenzavańnia dla štučnaha intelektu na London Book Fair.
Siarod tych, chto vystupiŭ suprać pasłableńnia zakona ab aŭtarskim pravie, — Ełtan Džon, jaki nazvaŭ urad «absalutnymi niaŭdačnikami».
Ciapier čytajuć
Daišnik, jakoha źbiŭ mašynaj piensijanier pad Minskam, pamior u balnicy. Jamu zładzili pyšnaje pachavańnie18
Kamientary