Pad Minskam chočuć pabudavać carkvu ŭ vyhladzie vielizarnaha zvona z cybulinaj
Kaplicu ŭ honar praviednaj Safii Słuckaj prapanavali ŭźvieści na mohiłkach kala vioski Papiernia Minskaha rajona. Jaje niezvyčajnaja forma, vidać, źbiantežyła navat carkoŭnych ekśpiertaŭ.
Sinadalny adździeł Biełaruskaj pravasłaŭnaj carkvy pa carkoŭnaj architektury i restaŭracyi razhledzieŭ na dniach eskizny prajekt novaj kaplicy.
Jak vynikaje z pradstaŭlenaha eskiza, kaplica ŭ honar praviednaj Safii Słuckaj pavinna źjavicca na terytoryi mohiłak «Papiernia Novyja» (abo «Papiernia-2»). Hetyja mohiłki znachodziacca na poŭnač ad vioski Papiernia Minskaha rajona, akurat na skryžavańni trasy R-58 i Druhoj minskaj kalcavoj aŭtadarohi.
Hałoŭnaja asablivaść prapanavanaha budynka ŭ tym, što jaho abjom maje formu carkoŭnaha zvona. Unutr viadzie vysoki ŭvachodny partał z aračnym vitražnym škleńniem. Sam asnoŭny abjom nie maje inšych bačnych akonnych prajomaŭ na hałoŭnym fasadzie, što moža aznačać ich najaŭnaść z tylnaha boku dla zabieśpiačeńnia aśviatleńnia. Zaviaršajecca kanstrukcyja śvietłavym barabanam i łuskavatym kupałam-cybulinaj. Nad kupałam i ŭvachodnaj hrupaj raźmieščany masiŭnyja mietaličnyja karunkavyja kryžy.
Pakolki na abmierkavańnie była vyniesiena hołaja 3D-madel biez nakładzienych tekstur, pakul nieviadoma, ź jakoha mienavita materyjału i ŭ jakim kolery płanavałasia realizavać abjekt.
Aŭtaram eskiznaha prajekta vystupiŭ biełaruski architektar Uładzimir Arturavič Kuźmin. Prezientacyja prajekta adbyłasia ŭ pačatku lutaha ŭ prychodzie minskaha chrama abraza Božaj Maci «Usich harotnych Radaść». Analiz prajekta pradstavili architektary Aleh Maślijeŭ i Vital Arabiej.
Aceńvała prajekt narada z daśviedčanych śpiecyjalistaŭ, siarod jakich jaje staršynia mastactvaznaviec i architektar Hienadź Łaŭrecki, jaki źjaŭlajecca dekanam mastackaha fakulteta Akademii mastactvaŭ, a taksama protaijerej i duchoŭnik adździeła Ihar Karaścialoŭ, jaki da pryniaćcia sanu sam pracavaŭ śvieckim architektaram.
U aficyjnym relizie Biełaruskaj pravasłaŭnaj carkvy strymana adznačajecca, što členy adździeła vykazali aŭtaru prapanovy pa dalejšym prajektavańni kaplicy. U praktycy architekturnych savietaŭ takaja farmuloŭka zvyčajna śviedčyć pra toje, što prajekt nie byŭ zaćvierdžany ŭ pradstaŭlenym vyhladzie i patrabuje pierapracoŭki.
Vidać, prafiesijnaja rada pastaviłasia da takoha pramoha kapiravańnia formy zvona biez asablivaj prapracoŭki z dolaj skiepsisu i adpraviła eskiz na dapracoŭku.
«Naša Niva» — bastyjon biełaruščyny
Kamientary