«My abaviazkova budziem śviatkavać hety dzień doma». Cichanoŭskaja pavinšavała biełarusaŭ z Dniom Voli
Z nahody 108‑j hadaviny abviaščeńnia niezaležnaści Biełaruskaj Narodnaj Respubliki, Śviatłana Cichanoŭskaja źviarnułasia da biełarusaŭ i biełarusak.
«Darahija biełarusy i biełaruski! Siońnia my razam adznačajem Dzień Voli. Śviata, jakoje jadnaje kožnaha z nas, kamu darahaja Biełaruś, niezaležna ad taho, dzie my ciapier: u Minsku ci Horadni, u Varšavie ci Vilniusie, u Kijevie, Tbilisi, Bierlinie, Ńju-Jorku. My raskidanyja pa śviecie, ale ŭ nas jość vielmi važnaja reč, jakaja zaŭsiody nas jadnała: žadańnie bačyć našuju krainu volnaj.
25 sakavika 1918 hoda była abvieščanaja Biełaruskaja Narodnaja Respublika. U toj momant narod ćviorda skazaŭ usiamu śvietu: Biełaruś maje prava na svaju dziaržavu. Heta byŭ śmieły krok, i jon staŭ častkaj našaj histaryčnaj pamiaci i našaj sučasnaj unutranaj apory. Z taho dnia i da siońnia my praciahvajem šlach zmahańnia i adkaznaści za svaju krainu.
Biełaruś budzie volnaj. I biełaruski narod nie admoviŭsia ad hetaj mety: ni ŭ 1918-m, ni ŭ 2020-m. My nie admovilisia ŭ samyja ciažkija hady našaj historyi, i nie admovimsia ciapier. Šlach da voli patrabuje ciarplivaści, štodzionnaj pracy i mužnaści. I, na žal, vielmi časta heta bol, straty i šmatlikija achviary.
Biełarusy addavali žyćcio za našuju svabodu ŭ roznyja časy našaj historyi. Biełarusy praciahvajuć zmahacca i ciapier. Chtości — u Biełarusi, chtości — u vyhnańni.
Vola — heta kožnaje našaje dziejańnie, jakoje robić krainu lepšaj. Heta praca biełaruskich hramadzianskich inicyjatyvaŭ i vałanciorskich supolnaściaŭ. Heta praca ŭ miedyja i padtrymka palitviaźniaŭ. Heta słužba ŭ šerahach ZSU i dobraachvotnickich farmavańniaŭ va Ukrainie. Kožny i kožnaja z vas robić svaju častku vialikaj pracy — ź Biełaruśsiu ŭ sercy.
Ja viedaju, jak stamlaje doŭhaja daroha. Jak chočacca, kab narešcie stała spakojna. Kab možna było pracavać, płanavać žyćcio, kachać, raścić dziaciej biez strachu ŭ svajoj krainie. Kab nie treba było aziracca na vulicy, bajacca hruku ŭ dźviery, bajacca za blizkich. Kab dom znoŭ byŭ miescam biaśpieki.
Ale navat kali byvaje ciažka, u nas jość toje, što nie zabrać nikoli i nikomu: našaja historyja, našaja pamiać, našaja takaja mocnaja biełaruskaja hodnaść. I jość my adno ŭ adnaho.
Biełaruś budzie volnaj. I my abaviazkova budziem śviatkavać hety dzień doma. Sa śviatam, maja Biełaruś! Sa śviatam, biełarusy i biełaruski! Z Dniom Voli!» — havorycca ŭ zvarocie.
Siońnia — Dzień Voli. 108 hadoŭ tamu była abvieščana niezaležnaść BNR
Mikoła Statkievič pavinšavaŭ biełarusaŭ z Dniom Voli, zapisaŭšy pieršaje VIDEA paśla vyzvaleńnia
«Nie davajcie nikomu nazyvać vas ahresarami susiedniaj krainy». Staršynia Rady BNR pavinšavała biełarusaŭ z Dniom Voli
«Kali b nie «Viasna-1996, my b byli Tatarstanam». 30 hadoŭ tamu biełarusy ŭžo pratestavali suprać Łukašenki i Rasii — jak heta było
Ciapier čytajuć
Aryštavany 75‑hadovy Źmicier Sańko — vieteran-vydaviec2
Kamientary
[Zredahavana]