62‑hadovuju hramadzianku Ukrainy amal hod utrymlivajuć na Akreścina biez abvinavačvańnia

Natalla Batašava rodam z ukrainskaha horada Mirharad. Da zatrymańnia pracavała buchhałtarkaj u škole. Letam 2025 hoda Natalla razam z mužam pryjechali ŭ Biełaruś pa spravach.

Pavodle byłoj sukamiernicy žančyny, muž Batašavaj — biełarus, były vajskoviec, jaki šmat hadoŭ žyŭ va Ukrainie i tam prachodziŭ słužbu.

Ich zatrymali 23 červienia 2025 hoda ŭ Viciebsku naŭprost na vulicy i adrazu pavieźli ŭ Minsk. Natallu źmiaścili ŭ IČU na Akreścina, a miescaznachodžańnie muža da hetaha času nieviadomaje.

Žančynie nie tłumačać pryčynu jaje znachodžańnia za kratami, nie pradjaŭlajuć abvinavačvańnie, zabaraniajuć sustreču z advakatam i navat nie dazvalajuć źviazacca z rodnymi.

Jak adznačaje byłaja sukamiernica, na Natallu psichałahična cisnuć, tamu žančyna znachodzicca ŭ ciažkim psichałahičnym stanie. Taksama viadoma, što Natallu źmiaščali ŭ karcar.

Za čas źniavoleńnia zdaroŭje Natalli istotna pahoršyłasia, ale nieabchodnuju i jakasnuju miedycynskuju dapamohu joj nie akazvajuć — tolki pieryjadyčna vydajuć tabletki, jakija jość u najaŭnaści.

U traŭni hetaha hoda jana pieraniesła jak minimum try ciažkija prystupy tachikardyi, a ranicami ŭ Natalli zdaralisia prystupy surjoznaha sardečnaha kašlu. Aproč hetaha, za čas źniavoleńnia ŭ ukrainki zdarałasia mocnaje zapaleńnie padskivičnych limfatyčnych vuzłoŭ.

Aproč hetaha, siłaviki zabrali ŭ žančyny 1200 dalaraŭ u košt apłaty za ŭtrymańnie ŭ IČU. Pry hetym joj paabiacali, što departujuć jaje va Ukrainu.

«Natalla sprabavała pieradać viestačku, kab pazvanili blizkim u Mirharadzie i paviedamili, dzie jaje ŭtrymlivajuć, bo jaje ličyli źnikłaj. Ale paśla hetaha da jaje pryjšli kedebešniki, raspytvali kamu i navošta pieradavała viestku, i pužali jaje», — zhadvaje žančyna.

Praz toje, što ŭ Natalli niama svajakoŭ u Biełarusi, pieradačy jon nichto nie prynosić — za ŭvieś hod jana atrymała prykładna tolki dźvie. Tamu srodki hihijeny i źmiennaje adzieńnie jana atrymlivaje tolki dziakujučy dapamozie sukamiernic.

Kamiera, u jakoj znachodzicca žančyna, prykładna šeść na čatyry mietry, raźličanaja na piać čałaviek. Ale časam tam znachodzilisia i 12 žančyn, tamu spać prychodziłasia na padłozie.

Razam z Natallaj utrymlivajuć i inšych zamiežnic. U tym liku ź joj niekatory čas da departacyi znachodziłasia studentka-stamatołah Irana Chatery Chadadadzi, jakuju zatrymali ŭ Biełarusi za kamientary ab Iranie ŭ adnym z telehram-kanałaŭ. Joj spačatku pryznačyli 14 sutak aryštu, ale pa skančeńni terminu nie vyzvalili, a pakinuli čakać departacyi. Pa słovach surazmoŭcy «Viasny», praz toje, što Hruzija admoviłasia prymać Chatery, kab tam jaje nie vykrali iranskija ŭłady, jaje ŭ vyniku departavali ŭ Armieniju. Viadoma, što pakul jana znachodziłasia ŭ IČU, da jaje pryjazdžali žurnalisty i zdymali pra jaje siužet.

Taksama ŭ kamiery byli i niekalki palityčnych aryštantak. Pavodle byłoj sukamiernicy, u duš dvojčy na tydzień vadzili tolki zamiežnic, tady jak biełaruskim aryštantkam heta nie dazvalałasia.

Pravaabaroncy adznačajuć, što praciahłaje ŭtrymańnie čałavieka ŭ IČU biez pradjaŭleńnia abvinavačvańnia i biez dostupu da advakata supiarečyć jak biełaruskamu zakanadaŭstvu, tak i mižnarodnym standartam abychodžańnia z zatrymanymi.

• 0
• 0
• 0
• 1
• 0
• 2
• 5
• 0