U machlaroŭ novaja pastka dla piensijanieraŭ: admovicca amal niemahčyma
Ašukancy namacali čarhovuju schiemu, jakaja pracuje amal biezdakorna, bo bje pa zrazumiełym žadańni čałavieka atrymać bolš.
U machlaroŭ ciapier novaja zamanucha dla piensijanieraŭ, paviedamlajuć bresckija milicyjanty. Spačatku pažyłomu čałavieku telefanuje vietlivy hołas, jaki pradstaŭlajecca sacyjalnym rabotnikam ci supracoŭnikam piensijnaha fondu.
Nieznajomiec aharošvaje pryjemnaj navinoj: vam naležyć pieraraźlik vypłat, dziaržava hatovaja dakinuć hrošaj. Raźlik idealny, bo chto admovicca ad prybaŭki da piensii? I čałaviek hatovy vykanać instrukcyju.
Na hetaj chvali machlary lohka vymańvajuć pašpartnyja danyja abo kody, jakija prychodziać čałavieku ŭ paviedamleńni na telefon.
Dalej — standartnaja schiema. Telefanuje nibyta pravaachoŭnik. Jon šakuje navinoj, što złačyncy prosta ciapier zavałodali asabistymi danymi piensijaniera i voś-voś skraduć usio da kapiejki. Na čałavieka pačynajuć cisnuć, uvodziać u stres i nie dajuć chviliny, kab pieravieści duch. Kab «vyratavać» svaje kroŭnyja, piensijanier biažyć da bankamata i pieravodzić uvieś aščadak na «biaśpiečny rachunak» albo prosta vynosić pakunak z hrašyma kurjeru.
Milicyja raić jašče raz nahadać baćkam, babulam i dziadulam. Kali razmova zachodzić pra hrošy abo kody z sms — treba prosta kidać słuchaŭku.
Kamientary