Biełarusku ŭ Šviejcaryi sudzili za bojku sa svaimi 11‑hadovymi dziećmi. Dziaciej zabrali

Apielacyjny sud kantona Ženieva 24 sakavika 2026 hoda vynies rašeńnie ŭ spravie biełaruski, jakuju abvinavačvali ŭ hvałcie nad dvuma ŭłasnymi dziećmi. Pieršaja instancyja pryznała jaje vinavataj pa dvuch epizodach. Apielacyja pakinuła tolki adzin — niekalki ŭdaraŭ kardonnaj papkaj pa tvary dački. Pa epizodzie z synam jaje apraŭdali. Ale hałoŭnaje, što možna ŭbačyć z materyjałaŭ, — heta historyja, chutčej, nie pra žorstkuju maci, a pra dziaciej, jakich zaciahnuli ŭ baćkoŭskuju vajnu za apieku.

Chto jana

Žančyna (u rašeńni jaje imia schavanaje) naradziłasia ŭ 1979 hodzie ŭ Biełarusi, u Šviejcaryju pierajechała ŭ 2009-m. Ciapier maje pastajanny vid na žycharstva, pracuje inžynierkaj-prahramistkaj. Sudzimaściej nie mieła. U jaje troje dziaciej: starejšy syn ad inšaha šlubu, jaki žyvie ź joj, i dvajniaty — dačka i syn 2011 hoda naradžeńnia — ad šlubu z mužam, ź jakim jana razvodzicca.

Što adbyłosia

Incydent zdaryŭsia 20 kastryčnika 2022 hoda padčas abiedu ŭ siamiejnym domie pad Ženievaj. Maci paprasiła dziaciej prybrać talerki. Adzinaccacihadovaja dačka ŭ adkaz kinuła joj «ta gueule» («zatknisia») — i paŭtaryła heta hruba. Maci padyšła, vychapiła ŭ dački kardonnuju papku, jakoj taja razmachvała, i niekalki razoŭ lapnuła joj pa ščace.

Na kryk prybieh syn, jaki byŭ na druhim paviersie. Jon daŭ maci poŭchu (sama jana kazała, što kułakom), a potym pasprabavaŭ uciačy. Maci schapiła jaho — spačatku za futbołku, parvaŭšy jaje, potym za šyju, adnoj rukoj, kab utrymać. U adkaz chłopčyk udaryŭ jaje kułakom u nos da kryvi. Paśla hetaha jana padniałasia navierch, patelefanavała mužu, a kali viarnułasia — raźbiła ab stoł vazu.

Mienavita baćka, jakoha ŭ toj momant doma nie było, vyklikaŭ palicyju. Kali patrul pryjechaŭ, dzieci płakali na vulicy razam ź im. Aryštavali i pavieźli ŭ pastarunak mienavita maci; noč u zatrymańni joj potym zaličać u pakarańnie. Na fotazdymkach z pastarunka ŭ syna — pačyrvanieńnie na šyi i ruce, u maci — śled ad udaru na nosie.

Vajna za apieku

Z materyjałaŭ vynikaje, što za incydentam staić praciahły siamiejny kanflikt. Žančyna padała na razvod, muž byŭ suprać. Jana z 2021 hoda źviartałasia ŭ centr dapamohi achviaram hvałtu — praź fizičny, ale najpierš psichałahičny hvałt z boku muža.

Šviejcarskaja słužba achovy niepaŭnaletnich (SPMi) nazvała siamiejny klimat «nadzvyčaj škodnym» dla raźvićcia dziaciej. Školnaja lekarka pisała, što baćka «vampiryzuje dziaciej», a sami dvajniaty schilnyja ačarniać maci i idealizavać baćku. Sud havoryć pra «kanflikt łajalnaści», u jaki trapili dzieci paśla razryvu baćkoŭ.

Hety kantekst akazaŭsia klučavym dla acenki śviedčańniaŭ. Pieršyja, spantannyja słovy dziaciej palicyi (maci biłasia papkaj; schapiła za šyju) sud paličyŭ praŭdzivymi. Ale bolš ciažkija abvinavačańni — nibyta maci «dušyła» syna, «ściskała šyju dźviuma rukami», «cisnuła pastupova» — źjavilisia ŭžo paśla taho, jak dzieci jechali z baćkam u pastarunak.

Sud paličyŭ vierahodnym, što baćka paśpieŭ paŭpłyvać na ich apovied, i hetym paźniejšym słovam nie pavieryŭ. Nie pierakanali sud i paźniejšyja zajavy (praz apiekuna), byccam maci hadami biłasia ź imi — ustaŭlała paznohci ŭ šyju, ciahała za ruki, kidała na padłohu: jany supiarečyli pieršapačatkovym pakazańniam.

Što vyrašyŭ sud

Apielacyjny sud raździaliŭ dva epizody.

Chapańnie syna za futbołku i šyju sud paličyŭ sprobaj utajmavać dzicia, jakoje tolki što ŭdaryła maci i sprabavała ŭciačy, — heta dziejańnie ŭ vychavaŭčych, a nie ahresiŭnych metach. Tut žančynu apraŭdali.

A voś udary kardonnaj papkaj pa tvary dački pryznali niedapuščalnymi: udary pradmietam pa tvary mohuć usprymacca dziciem jak prynižeńnie, i «pravam na pakarańnie» heta nie apraŭdvajecca. Tut — vina.

Ale i za heta jaje vyzvalili ad pakarańnia: sud paličyŭ vinu niaznačnaj, nastupstvaŭ dla dziciaci nie ŭbačyŭ (psichołahi nie znajšli ŭ dziaŭčynki razładaŭ), a raniej žančyna hvałtu da dziaciej nie ŭžyvała. Cyvilnyja pazovy dziaciej — prykładna pa 1100 jeŭra kožnamu za maralnuju škodu — sud adchiliŭ. Abvinavačańnie ŭ pahrozach (kinutaja vaza) spynili jašče raniej, bo zajavu nichto nie padavaŭ.

Što dalej

Paśla toj historyi maci bolš nie bačyła dziaciej — apieku addali baćku.

Maci pakazała daviedku psichaterapieŭta: z maja 2024 hoda ŭ ciažkim psichałahičnym stanie praź siamiejnuju situacyju, vielmi choča znoŭ ubačyć dziaciej.

• 1
• 2
• 4
• 26
• 3
• 21
• 2
• 0