«Niama mahčymaści dalej ciahnuć biaspłatny farmat». Fiestyval Tutaka ŭpieršyniu budzie brać hrošy za ŭvachod
Fiestyval Tutaka, jaki štohod prachodzić u Polščy kala miažy ź Biełaruśsiu, hetym letam upieršyniu zrabiŭ płatny ŭvachod. Takaja infarmacyja źjaviłasia ŭ sacyjalnych sietkach prajekta. Doŭhi čas hety open-ejr i jaho papiarednik «Basovišča» prymali haściej biez kvitkoŭ. Vydańnie «Lusterka» vyvučyła canu ŭvachodu i pahavaryła z arhanizataram pra pryčyny takoha kroku.
Kolki kaštuje ŭvachod i načleh
Pradstaŭniki kamandy paviedamili pra daty čarhovaha iventu na svajoj staroncy ŭ fejsbuku. Śviata adbudziecca z 16 pa 19 lipienia 2026 hoda. Upieršyniu za dostup na terytoryju pryjdziecca zapłacić.
- Dzieciam da šaści hadoŭ uklučna kvitok nie patrebny, raźmiaščeńnie ŭ kiempinhu dla ich taksama ničoha nie kaštuje.
- Dzieciam ad 7 da 13 hadoŭ kvitok abydziecca ŭ 30 złotych (kala 7 jeŭra), a miesca ŭ pałatačnym haradku — jašče ŭ 50 (kala 11,5 jeŭra). Vynikovaja suma składzie 80 złotych (kala 18,5 jeŭra).
- Dla moładzi (14—24 hady) kvitok pradajuć za 80 złotych (kala 18,5 jeŭra). Načleh abydziecca ŭ 100 złotych (kala 23,3 jeŭra). Sumarna za ŭsie dni vyjdzie 180 złotych (kala 41,8 jeŭra).
- Darosłym naviedvalnikam (25—63 hady) za ŭvachod treba addać 150 złotych (kala 35 jeŭra). Pry žadańni pastavić pałatku košt vyraście da 250 złotych (kala 58,3 jeŭra).
- Ludzi starejšyja za 64 hady addaduć 100 złotych za muzyčnuju častku i stolki ž za adpačynak na pryrodzie (usiaho 200 złotych (kala 46,6 jeŭra).
Čamu ŭviali apłatu
Dyrektar fondu Tutaka Pavieł Stankievič patłumačyŭ «Lusterku» pryčyny admovy ad volnaha ŭvachodu. Pavodle jaho słoŭ, inicyjatyva patrabuje inšaha padychodu z-za svajho maštabu.
«Fiestyval vyras, heta aznačaje, što ŭžo prosta niama mahčymaści dalej ciahnuć biaspłatny farmat, — tłumačyć Stankievič. — Ale ź inšaha boku, heta taksama častka pracesu. My chočam rabić fiestyval razam z aŭdytoryjaj. I hety kvitok ličym hramadskim unioskam. Tamu što fiestyval — heta try dni roznych inšych padziej: kancertaŭ, dyskusij, lekcyj. Košt — simvaličny. Kali ŭziać luby inšy fiestyval padobnaha maštabu, to akažacca, što cana adnaho kancerta supastaŭnaja z sumaj, jakuju čałaviek tracić za viečar u horadzie».
Pavieł Stankievič taksama kaža, što ŭ minułyja hady fiestyval Tutaka, jaki prachodziŭ biaspłatna, mocna zaležaŭ ad sponsaraŭ. U hetym hodzie jany taksama jość, ale dla bolšaj finansavaj ustojlivaści było vyrašana ŭvieści płatu za ŭvachod.
«Štohod my palapšajem umovy i samoha fiestyvalu, i žyćcia na im, a heta ciahnie vielizarnyja vydatki, — kaža Stankievič. — U nas užo zdarałasia, što raptam adzin z donaraŭ źnik, i što nam rabić tady? A jak naohuł raźvivacca? Fiestyvalu piać hadoŭ, i štohod my jaho ciahnuli ŭ vielmi ciažkich umovach. Ja nie skažu, što ciapier z-za kvitkoŭ nam budzie značna lahčej, ale heta mahčymaść realna raźvivać fiestyval dalej. Rabić jaho jašče bolš cikavym i zručnym dla ludziej».
Adkazvajučy na pytańnie pra ŭdzielnikaŭ Tutaka 2026, Stankievič adznačyŭ, što śpis vykanaŭcaŭ budzie apublikavany paźniej.
«Pakul što trymajem jaho ŭ tajamnicy. Ale ŭžo viedajem, što budzie sama mieniej šeść biełaruskich hurtaŭ. Ciapier paličycie, kolki b kaštavaŭ kvitok na kožny paasobku, i pahladzicie na košt uvachodu na Tutaka, — prapanuje arhanizatar. — Važna razumieć, što heta ŭsio ž taki nie tolki muzyčny fiestyval. U minułyja hady inšych aktyŭnaściaŭ było ŭ try razy bolš, čym kancertaŭ. I nam važna, kab fiestyval byŭ realna nahodaj, kab biełaruskaje hramadstva (i nie tolki — zaprašajem taksama palakaŭ) raźvivałasia ŭ razumieńni svajoj adkaznaści za dziaržavu, budučyniu i kulturu».
Ciapier čytajuć
Jakija retranślatary na miažy maje na ŭvazie Ukraina?37
Kamientary