Ekanamist: Praz 10 hadoŭ siaredni biełarus budzie žyć udvaja biadniej, čym siaredni palak
U paraŭnańni z učorašnim dniom biełarusy buduć žyć lepiej, ale na fonie astatniaha śvietu naša ekanamičnaja situacyja budzie horšać, kali kurs u krainie nie źmienicca, kaža ekanamist Źmicier Kruk u efiry «Biełsata».
Apošnim časam zarobki ŭ Biełarusi raśli, adnak hety rost apiaredžvaŭ rost ekanomiki. Pryčyna — u deficycie pracoŭnych ruk praz demahrafiju i mihracyju.
«Apošnija hady ekanomika peŭny rost demanstruje, asabliva 2023—2024 hod, ale pry hetym zarobki, realnyja dachody ludziej vyraśli značna bolš. Naprykład, mahu dać ličby: kali pavodle ŭzroŭniu ŭsioj ekanomiki VUP vyras u paraŭnańni z dasankcyjnym davajennym pieryjadam dzieści na 6%, to zarobki vyraśli bolš jak na 40%. I heta nasamreč padsiłkoŭvaje taki spažyviecki aptymizm», — kaža ekanamist.
Jon miarkuje, što ŭ 2026 hodzie spažyviecki aptymizm u biełarusaŭ pačnie źnižacca praz paharšeńnie ekanamičnych umovaŭ i padzieńnie źniešniaha popytu.
Kali palityčny i ekanamičny kurs zastaniecca niaźmiennym, krainu nie čakaje imhnienny kałaps i razbureńnie. Ale my budziem značna adstavać ad taho, jak raźvivajucca susiednija jeŭrapiejskija krainy.
«Jašče raz padkreślu… ludzi ŭ paraŭnańni z učorašnim dniom buduć usio roŭna žyć lepiej, ale prablema ŭ tym, što ŭ paraŭnańni z tym, jak jany mahli b žyć i jak budzie žyć astatni śviet, heta budzie vyhladać horš i horš. Nu voś faktyčna ŭ 2040 hodzie, 2035‑m ci 2036-m, kali my siońnia kažam, što adstavańnie ad Polščy 35—40%, pavodle roznych dadzienych, to jano pavialičycca da 50—55%. To bok siaredni biełarus budzie žyć udvaja horš, biadniejšym budzie, čym siaredni palak», — adznačyŭ Źmicier Kruk.
Jon pryvioŭ prykład Ałbanii abo Arhienciny, dzie stahnacyja nazapašvałasia pastupova, pakul ludzi nie ŭśviadomili, što žyvuć u adstałym, niesučasnym śviecie. U vyniku ŭźnikła adčuvańnie, što kraina apynułasia ŭ chvaście raźvićcia, choć mahła b być siarod lidaraŭ.
Kamientary