U Biełarusi adzin za adnym admianiajuć fiestyvali. U čym pryčyna?

Arhanizatary fiestyvalu Wostrau, jaki ŭ apošnija hady prachodziŭ u Niaśvižy, tak patłumačyli pryčynu:

«Ustupleńnie ŭ siłu pastanovy Savieta Ministraŭ «Ab rejestry arhanizataraŭ kulturna-vidoviščnych mierapryjemstvaŭ» i adsutnaść u nas mahčymaści pryvozić zamiežnych artystaŭ samastojna robiać dla nas praviadzieńnie fiestyvalu niemahčymym na tym uzroŭni, da jakoha my pryzvyčailisia i jaki ličym dla siabie pravilnym».

Admienieny i Lidbeer, jaki dziesiać hadoŭ źbiraŭ dziasiatki tysiač hledačoŭ u Lidzie.

«Jak pryniata kazać u takich vypadkach, fiestyval nie adbudziecca pa nie zaležnych ad nas pryčynach», — napisali arhanizatary ŭ sacsietkach.

Tuju ž pryčynu admieny nazvali i arhanizatary rok-fiestyvalu «Soncastajańnie», jaki prachodziŭ u Pružanach.

Nie adbudziecca ŭ 2026 hodzie i haradski fiestyval Festiwow.

«My da apošniaha vieryli, što atrymajem dazvoł na praviadzieńnie našaha fiestyvalu, ale na žal, zakon jość zakon», — adznačana ŭ sacsietkach Festiwow.

Pavodle słoŭ arhanizataraŭ, mierapryjemstva sarvałasia litaralna ŭ apošni momant: damovy z artystami ŭžo byli padpisanyja, byŭ pryznačany start prodažu kvitkoŭ. Festiwow prachodziŭ na minskim stadyjonie «Dynama» ŭ 2024 i 2025 hadach.

Z bujnych fiestyvalaŭ daty abviaścili ŭ vyniku tolki Viva Braslav i belbet fest.

Čamu admianiajuć mierapryjemstvy?

U 2022 hodzie ŭ Biełarusi stvorany Rejestr arhanizataraŭ kulturna-vidoviščnych mierapryjemstvaŭ (z surjoznym abnaŭleńniem pravił u 2025 hodzie). Heta padzialiła historyju biełaruskaha šou-biznesu na «da» i «paśla», raskazaŭ u kamientary DW były arhanizatar kancertaŭ. Hałoŭnaja źmiena — biez uklučeńnia ŭ rejestr pravodzić kancerty zabaroniena.

Rašeńnie prymaje Respublikanskaja ekśpiertnaja kamisija, kudy ŭvachodziać staršynia Biełaruskaha sajuza žančyn Volha Špileŭskaja, rektarka Instytuta kultury Natalla Karatčeŭskaja, prapahandyst Ryhor Azaronak, artyst Vialikaha teatra opiery i baletu Uładzimir Hromaŭ, a taksama pradstaŭniki Mininfarma, Minkulta, Minadukacyi, Ministerstva pa padatkach i zborach, Minharvykankama i administracyi Łukašenki.

Kamisija vyvučaje reputacyju arhanizatara, jaho ideałahičnuju łajalnaść, prafiesijny ŭzrovień i adsutnaść «niepažadanych» suviaziaŭ, zapyt adpraŭlajuć u milicyju. Kali kampaniju vyklučajuć z rejestra (naprykład, za parušeńnie zakanadaŭstva abo «nizki mastacki ŭzrovień» mierapryjemstvaŭ), jana nie maje prava padavacca znoŭ na praciahu dvuch hadoŭ.

«Heta faktyčna aznačaje bankructva dla pryvatnaha ahienctva», — tłumačyć DW były arhanizatar kancertaŭ.

Adnak uklučeńnie ŭ rejestr — tolki pieršy krok. Dla kožnaha kankretnaha kancerta treba atrymać hastrolnaje paśviedčańnie. Jaho vydajuć miascovyja ŭłady, jakija praviarajuć nie tolki arhanizatara, ale i artysta: jaho sacsietki, minułyja vykazvańni i teksty piesień.

«Afišy stali adnastajnymi. Ź ich źnikli amal usie niezaležnyja rok-hurty i sučasnyja artysty, jakija nie padtrymlivajuć aficyjny paradak dnia, — praciahvaje surazmoŭca. — Ich miesca zaniali rasijskija zorki «druhoha ešałona» i ŭchvalenyja biełaruskija artysty».

Pry hetym dziaržaŭnyja struktury (fiłarmonii, teatry, telekanały) mohuć, ale nie abaviazanyja być u rejestry. Heta daje im kankurentnuju pieravahu pierad pryvatnikami. Dla pryvatnych ža kampanij ryzyki stali zaškalvać: možna arandavać zału i pačać prodaž kvitkoŭ, ale kali ŭ apošni momant admoviać u «hastrolcy» — arhanizatar hublaje ŭsio. Heta pryviało da samacenzury.

Kamu vyhadnyja novyja ŭmovy?

Adnak ułady źmianili praviły nie tolki dziela ideałohii, ale i dziela finansavaj vyhady, začyščajučy rynak dla «svaich», adznačyŭ pramoŭtar. Samy ŭpłyvovy hulec — «Muzyčnaja miedyjakampanija» (MMK), źviazanaja z Hannaj Łukašenkaj (Siałuk), žonkaj siaredniaha syna Alaksandra Łukašenki Dźmitryja. Kiraŭničuju pasadu ŭ kampanii zajmaje Taćciana Kułakova, rodnaja siastra Hanny. 30% «Muzyčnaj miedyjakampanii» naležać Kiraŭnictvu spravami Łukašenki, 70% — pryvatnaj kampanii «ANSŁ prodakšn» (abrevijatura ANSŁ całkam supadaje ź inicyjałami pa-rasiejsku Hanny Mikałajeŭny Siałuk-Łukašenki).

MMK źjaŭlajecca klučavym arhanizataram takich maštabnych mierapryjemstvaŭ, jak «Marafon adzinstva», «Pieśnia hoda Biełarusi», sieryja kancertaŭ-rekvijemaŭ «Kožny treci» i fiestyvalu belbet fest na stadyjonie «Dynama».

Dziakujučy partniorstvu z Kiraŭnictvam spravami Łukašenki, MMK maje pryjarytetny dostup da najlepšych placovak krainy (Pałac Respubliki, stadyjon «Dynama», kancertnaja zała «Minsk») i ščodraje biudžetnaje finansavańnie. Inšyja ahienctvy časta nie dapuskajucca da takich tendaraŭ abo nie mohuć kankuravać z «dziaržaŭna-pryvatnym» hihantam pa canie i ŭmovach arendy.

«Muzyčnaja miedyjakampanija» stvaryła zamkniony cykł: svoj pradakšn, svaje artysty (mnohija ź ich vykonvajuć pieśni aŭtarstva Siałuk), svajo radyjo i svaje placoŭki. Heta robić rynak nieprazrystym dla niezaležnych pramoŭtaraŭ, jakija raniej pryvozili suśvietnych zorak i rabili jakasnyja fiestyvali.

• 0
• 0
• 4
• 14
• 3
• 2
• 14
• 0