Za vybuch u minskim mietro sudzili nie tolki Kanavałava i Kavalova. Jak skłaŭsia los jašče troch fihurantaŭ spravy?

Pra ich dalejšy los stała viadoma dziakujučy infarmacyi ad «Kibierpartyzanaŭ».

Praparščyk Vital Rahačeŭski ŭviečary 11 krasavika 2011 hoda dziažuryŭ na stancyi «Frunzienskaja» i nie źviarnuŭ uvahu na Dźmitryja Kanavałava ź vialikaj sumkaj, jaki prachodziŭ u mietro. Užo 18 krasavika jaho zvolnili ź milicyi «za parušeńnie słužbovaj dyścipliny». Za niadbajnaje vykanańnie słužbovych abaviazkaŭ Rahačeŭskamu prysudzili try hady kałonii-pasialeńnia.

Zrešty, jon pravioŭ u źniavoleńni nie bolš za pałovu prysudžanaha terminu.

Pavialičyć

Paśla vyzvaleńnia Rahačeŭski pracavaŭ u minskich kramach — vidavočna, achoŭnikam. Były siłavik adznačyŭsia ŭ bazach tym, što pieryjadyčna telefanavaŭ u milicyju, kali łaviŭ drobnych złodziejaŭ na pracoŭnym miescy.

Apošnija niekalki hadoŭ mužčyna pracavaŭ u stalicy dvornikam — «rabočym pa kompleksnaj uborcy». Ciapier jamu 49 hadoŭ.

Staršaha ekśpierta-kryminalista ź Viciebska Rusłana Sinicyna, jakomu ciapier 46 hadoŭ, paśla vybuchu ŭ mietro asudzili na try hady kałonii-pasialeńnia za słužbovuju chałatnaść.

Sinicyn da prychodu ŭ milicyju pracavaŭ u hramadzianskaj avijacyi (jon skončyŭ Minski vyšejšy avijacyjny kaledž). Paśla byŭ ekśpiertam fanaskapičnaj łabaratoryi ekśpiertna-kryminalistyčnaha centra ŭpraŭleńnia ŭnutranych spravaŭ Viciebskaha abłvykankama. Zajmaŭsia vyličeńniem «telefonnych terarystaŭ», potym pravodziŭ daktyłaskapiju.

U 2009‑m jon pavieryŭ pryzyŭniku Dźmitryju Kanavałavu, kali toj skazaŭ, što ŭžo zdavaŭ adbitki palcaŭ. Sinicyn vydaŭ jamu daviedku pra toje, što jon byccam prajšoŭ daktyłaskapiju. U vyniku Kanavałava daŭžej šukali ŭ 2011‑m (i nie praviarali na datyčnaść da vybuchu ŭ Minsku 4 lipienia 2008).

Pavialičyć

Padčas adsiedki ŭ horackaj kałonii-pasialeńni Sinicyn pracavaŭ na miascovych pradpryjemstvach «Kamunalnik», PMK №1 i «Budaŭnik». U pačatku 2013 hoda jon vyzvaliŭsia.

Były kapitan milicyi pajšoŭ na Viciebski miasakambinat, a potym u «Biełciepłaizalacyju». U 2015—2017 hadach Sinicyn pracavaŭ u hrodzienskaj jevanhielična-luteranskaj supołcy. Paźniej jon kančatkova pajšoŭ u łahistyku i pracavaŭ u roznych kampanijach.

Pavialičyć

Samy žorstki prysud z hetaj trojki — šeść hadoŭ kałonii — atrymaŭ Maksim Žołudzieŭ. Jašče ŭ pačatku nulavych jon, tady kursant vajskovaj čaści 22249, skraŭ try traciłavyja šaški, jakija ŭrešcie trapili ŭ ruki Kanavałava i stali asnovaj dla bomby.

Pavialičyć

Paśla vyzvaleńnia ŭ 2015 hodzie Žołudzieŭ zastaŭsia viernym budaŭničaj śfiery, u jakoj pracavaŭ da pasadki. Žołudzieŭ źmianiŭ niekalki pracoŭnych miescaŭ, pierajšoŭšy z «Viciebskabłsielbuda» ŭ pryvatnyja kampanii.

Mužčyna pamior u Viciebsku 9 sakavika 2023 hoda ad nastupstvaŭ karanavirusa. Jamu było 43 hady.

• 1
• 1
• 0
• 6
• 3
• 12
• 0
• 0