Estonskija palityki mocna raskrytykavali Zialenskaha: zapałochvajučy krainy Bałtyi, toj nie dabjecca pośpiechu
Prezident Ukrainy Uładzimir Zialenski zajaviŭ u teleintervju, što abmiežavańnie dostupu da internetu ŭ Rasii moža być źviazana z mabilizacyjaj dla napadu na krainy Bałtyi. U Estonii paryrujuć: Zialenski ahučyŭ kramloŭski naratyŭ, i padobnyja vykazvańni nie palahčajuć supracoŭnictva, piša ERR.
U niadzielnym intervju nacyjanalnamu telemarafonu Uładzimir Zialenski vykazaŭ zdahadku, što Rasija błakuje internet nie dla padaŭleńnia krytyki ŭrada, a z metaj praduchilić niezadavolenaść, jakuju moža vyklikać zapłanavanaja maštabnaja mabilizacyja. Pavodle acenki prezidenta Ukrainy, metaj mabilizacyi źjaŭlajecca masiravanaja ataka na Ukrainu abo na krainy Bałtyi.
Zialenski vykazaŭ sumnievy, kali adkazvaŭ na pytańnie ab tym, ci zadziejničaje NATA 5‑y artykuł ab kalektyŭnaj abaronie ŭ vypadku napadu na krainy Bałtyi.
«Ja dumaju, što, mahčyma, nie ŭsie krainy zachočuć padtrymać [Bałtyju], ale, na moj pohlad, u krain NATA niama vybaru — u advarotnym vypadku NATA bolš nie budzie. Jany pavinny dziejničać i reahavać na toje, što Pucin patencyjna moža zrabić», — skazaŭ Zialenski.
Ministr zamiežnych spraŭ Estonii Marhus Cachkna paviedamiŭ ERR, što Ukraina z pačatku poŭnamaštabnaj vajny ŭ 2022 hodzie nieadnarazova ŭkazvała na toje, što jany mohuć być nie adzinymi, na kaho napadzie Rasija. Bolš za toje, naŭprost zhadvalisia krainy Bałtyi.
Pavodle słoŭ Cachkna, padobnyja zajavy sajuźnika nijak nie spraščajuć supracoŭnictva. Akramia taho, ministr dadaŭ, što ŭ słovach Zialenskaha niama praŭdy.
«Takija vykazvańni, pa-pieršaje, nie adpaviadajuć našym raźvieddanym i našaj acency pahroz. My nie bačym taho, kab Rasija kancentravała svaje vojski ci naohuł niejak rychtavałasia ŭ vajskovych adnosinach da napadu na NATA ci krainy Bałtyi — chutčej naadvarot. Rasija znachodzicca ŭ nie vielmi mocnym stanoviščy na ŭkrainskim froncie, a taksama ŭ ekanamičnym płanie», — adznačyŭ Cachkna.
Na dumku Cachkna, pra razbureńnie piataha artykuła NATA kazać nielha.
«Viadoma, nie dadaje siły toje, što prezident ZŠA Tramp krytyčna stavicca da jeŭrapiejskich sajuźnikaŭ u kantekście NATA. Ale heta nie aznačaje, što NATA nie zdolnaje reahavać. NATA absalutna dakładna adreahuje, kali taja ci inšaja dziaržava-člen budzie atakavanaja, tut niama nijakich sumnievaŭ», — zajaviŭ Cachkna, padkreśliŭšy, što ŭ Estonii, akramia aljansu, jość i ŭłasnaja abaronazdolnaść.
Michkielsan: hetyja paviedamleńni vyznačana padsiłkoŭvajuć rasijski naratyŭ
Staršynia kamisii Ryjhikohu (parłamient Estonii) pa zamiežnych spravach Marka Michkielsan taksama adznačyŭ, što heta nie pieršy vypadak, kali kiraŭnictva Ukrainy zajaŭlaje, što krainy Bałtyi — nastupnyja.
«U bok Jeŭropy jak by pahražajuć palcam. Maŭlaŭ, hladzicie, kali my niejak apyniemsia ŭ bolš słabaj pazicyi ci prajhrajem, to nastupnymi budziecie vy, ci ŭ asnoŭnym krainy Bałtyi. Heta, viadoma, niepryjemna i padsiłkoŭvaje rasijski naratyŭ pra toje, što «my — bok, jaki pieramoh, my atakujem, a vy adstupajecie i prajhrajecie», — skazaŭ Michkielsan.
Pavodle słoŭ Michkielsana, hetaja tema padymałasia i na sustrečach z ukraincami. Jon ličyć, što ŭ vypadku surjoznaj pahrozy sajuźniki pavinny abmieńvacca takimi paviedamleńniami pamiž saboj, a nie padymać šum u ŚMI. Pry hetym paviedamleńni, jakija pieradajucca praz presu, čaściakom zastajucca na ŭzroŭni śpiekulacyj.
«Zialenski padkreśliŭ, što NATA pavinna być adzinym i hatovym reahavać na dziejańni Pucina. Ja zhodny, što nivodzin čałaviek nie padryvaŭ davier da piataha artykuła tak mocna, jak prezident ZŠA Donald Tramp, ale i prezident Ukrainy ciapier jaho padryvaje», — zajaviŭ Michkielsan.
Pavodle słoŭ kiraŭnika kamisii pa zamiežnych spravach, prezident Ukrainy nie pavinien spryjać raspaŭsiudžvańniu rasijskich tezisaŭ.
Marcin Chielme: my sami stvaryli hety naratyŭ
Pavodle słoŭ lidara EKRE Marcina Chielme, u pasłańni Zialenskaha niama ničoha novaha, adnak, na jaho dumku, Estonija i sama zrabiła ŭkład u stvareńnie hetaha naratyvu.
«Mnie zdajecca, što jany [dypłamaty] nasamreč sami stvaryli hety naratyŭ. Z samaha pačatku vajny va Ukrainie asnoŭnym pasyłam Partyi reform było toje, što ludziej treba zvodzić z rozumu ad strachu pierad Rasijaj, i pad prykryćciom hetaha strachu možna pavyšać lubyja padatki i demanizavać unutrypalityčnuju apazicyju jak pasobnikaŭ Kramla», — skazaŭ Chielme.
Metaj Zialenskaha ŭ takich vystupach, na dumku Chielme, źjaŭlajecca stvareńnie fonu strachu, jaki prymusiŭ by sajuźnikaŭ davać jamu bolš techniki.
«Biaskoncaje daviadzieńnie ludziej da stresu i zapałochvańnie ŭ vyniku bolš nie pracujuć na toje, kab usie pačali dziejničać bolš skancentravana dla praduchileńnia vajskovaj pahrozy ci lepšaha płanavańnia — heta pieratvaryłasia ŭ rytaryčnyja napadki», — skazaŭ Chielme.
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary
A potym byŭ napad Rasiei na Ukrainu i Jeŭropa try dni maŭčała. I ničym nie dapamahała.
Ciapier toje ž samaje samaŭspakajeńnie baču ŭ krain Bałtyi.
Bajusia, što kali Rasieja napadzie na krainy Bałtyi, Jeŭropa taksama budzie spačatku try dni maŭčać.
Ale terytoryja krain Bałtyi (pahladzicie na kartu) našmat mieńšaja za ukrainskuju.
Za hetyja try dni ad haradoŭ krain Bałtyi zastanucca ruiny jak u Maryŭpali (kali miascovyja vajskoŭcy voźmuć zbroju i buduć supraciŭlacca sami), ci budzie ŭstanoŭlena kałanijalnaja rasiejskaja ŭłada, kali miascovaja ŭłada pojdzie na chaŭrus z rasiejskimi akupantami (jak u haradach Ukrainy, dzie na vysokich pasadach byli padkuplenyja śpiecsłužbami RF kałabaranty).
Zialenski sprabuje danieści vopyt Ukrainy. Ale chto nie byŭ va Ukrainie, chto nie pieražyŭ akupacyju i małankavy nastup rasiejskich vojskaŭ, nie moža adčuć usiu surjoznaść prablemy. Što adlik budzie iści nie na dni, i navat nie na hadziny. Što nie budzie času ni na što, ni na pasiedžańni, ni na zvaroty, ni na zakłapočanaści. I źbiehčy nie paśpieješ. Uvieś ruch budzie paralizavany.
Tolki schvacić zbroju i adrazu stralać.