Śpiecpasłańnik Trampa prapanavaŭ FIFA zamianić zbornuju Irana na čempijanacie śvietu jeŭrapiejskaj kamandaj. Ideja pa-valuntaryscku dziŭnaja
Prapanova źjaŭlajecca sprobaj załahodzić kanflikt pamiž Trampam i kiraŭnictvam hetaj krainy, ź jakoj pasvaryŭsia prezident ZŠA.
Śpiecyjalny pasłańnik prezidenta ZŠA Donalda Trampa pa hłabalnych partniorstvach Paała Zampoli prapanavaŭ FIFA zamianić zbornuju Irana kamandaj Italii na budučym čempijanacie śvietu pa futbole 2026 hoda, jaki projdzie ŭ ZŠA, Mieksicy i Kanadzie. Pra heta zajaviŭ sam Zampoli, paviedamlaje Financial Times.
«Paćviardžaju, što ja prapanavaŭ Trampu i Infancina zamianić Iran na čempijanacie śvietu Italijaj», — skazaŭ haziecie Zampoli.
Jon adznačyŭ, što źjaŭlajecca italjancam pa pachodžańni, «i było b maraj ubačyć «skuadru adzuru» na turniry, jaki pravodzicca ŭ ZŠA».
Jak śćviardžaje śpiecpasłańnik, čatyry tytuły čempijona śvietu, zavajavanyja Italijaj [1934, 1938, 1982 i 2006, bolš tytułaŭ (piać) maje tolki Brazilija — NN], apraŭdvajuć prapanovu joj miesca na čempijanacie.
Pavodle słoŭ krynic FT, znajomych ź situacyjaj, hetaja prapanova źjaŭlajecca sprobaj adnavić adnosiny pamiž Donaldam Trampam i premjer-ministram Italii Džordžaj Miełoni paśla taho, jak pamiž imi adbyŭsia kanflikt na fonie krytyki, jakoj jon abmianiaŭsia z Papam Lvom XIV z-za vajny ź Iranam.
Prapanova ab zamienie Irana Italijaj była vyłučana paśla taho, jak zbornaja apošniaj nie zmahła kvalifikavacca na čempijanat śvietu, jaki projdzie ŭ ZŠA, Mieksicy i Kanadzie ŭ červieni—lipieni.
Zbornaja Italii nie zmahła kvalifikavacca na čempijanat śvietu pa futbole, prajhraŭšy ŭ vynikovym stykavym matčy pa pienalci zbornaj Bośnii. Heta treci zapar čempijanat śvietu, na jaki Italija nie trapiła. Pryčym jana vyjhrała čempijanat Jeŭropy ŭ 2021 hodzie.
Paśla pačatku kanfliktu ŭ Iranie kiraŭnictva futbolnaj zbornaj hetaj krainy nieadnarazova zajaŭlała, što moža nie adravić kamandu na čempijanat śvietu. Usie try matčy hrupavoha turniru Iran pavinien pravieści ŭ ZŠA. Prapanovy pieranieści hulni ŭ Mieksiku FIFA i futbolnaja fiederacyja Mieksiki adkinuli.
Taksama hučali zamianić Iran inšaj zbornaj. Ale łohika padkazvaje, što heta pavinna być družyna z Azijackaj futbolnaj kanfiederacyi, i nastupnaj pa rejtynhu źjaŭlajecca zbornaja AAE.
Kamientary