Pucin baicca zamachu i pieravarotu, pamiž siłavikami narastaje baraćba — raźviedka

Zaściarohi, vynikaje sa spravazdačy, pryviali da biesprecedentnaha ŭzmacnieńnia mier biaśpieki.

Fiederalnaja słužba achovy (FSA) faktyčna pieraviała prezidenta RF u režym poŭnaj izalacyi: jon pierastaŭ naviedvać zvykłyja rezidencyi ŭ Padmaskoŭi i na Vałdai, pravodziačy bolšuju častku času ŭ madernizavanych bunkierach, u tym liku ŭ Krasnadarskim krai.

Supracoŭnikam, jakija pracujuć pobač z Pucinym, ciapier zabaroniena karystacca internetam i hramadskim transpartam, a ŭ ich damach ustanoŭleny sistemy videanazirańnia.

Bolš za toje, FSA ciapier całkam kantraluje ŭsie miedyjnyja publikacyi z udziełam Pucina, a ŭ Maskvie pieryjadyčna adklučajuć sietki suviazi dla praduchileńnia napadaŭ dronaŭ.

Asablivuju naściarožanaść u Kramli vyklikaje postać Siarhieja Šajhu. Byłoha ministra abarony razhladajuć jak patencyjny faktar destabilizacyi, pakolki jon zachoŭvaje vialiki ŭpłyŭ u vojsku.

Aryšt jaho byłoha namieśnika Rusłana Calikava ŭ sakaviku hetaha hoda traktujecca jak razbureńnie niehałosnaj damovy ab biaśpiecy elit, što robić samoha Šajhu imaviernaj mišeńniu dla kryminalnaha pieraśledu.

Dakumient taksama raskryvaje hłyboki raskoł pamiž roznymi siłavymi strukturami.

Paśla sieryi napadaŭ na vysokapastaŭlenych aficeraŭ u Maskvie pamiž kiraŭnikom Hienštaba Valeryjem Hierasimavym, dyrektaram FSB Alaksandram Bortnikavym i kiraŭnikom Rashvardyi Viktaram Zołatavym adbyłasia vostraja svarka. Siłaviki pierakładali adzin na adnaho adkaznaść za niazdolnaść abaranić kamandavańnie ad napadaŭ ukrainskich śpiecsłužbaŭ.

Dyrektar Rashvardyi Viktar Zołataŭ davodziŭ, što najaŭnyja resursy nie mohuć vydzialacca na abaronu aficeraŭ Ministerstva abarony. 

U vyniku Hierasimavu ŭdałosia damahčysia ad Pucina pašyreńnia pracy FSA: zaraz pad uzmocnienuju achovu hetaha viedamstva, akramia samoha načalnika Hienštaba, uziatyja jašče dziesiać klučavych hienierałaŭ, uklučajučy kiraŭnikoŭ HRU i Hałoŭnaha apieratyŭnaha ŭpraŭleńnia.

Žurnalisty «Važnych historyj» zmahli niezaležna paćvierdzić šerah faktaŭ sa spravazdačy.

Krynicy ŭ FSB paviedamlajuć, što amal usia śpiectechnika dla prasłuchoŭvańnia ciapier pieranakiravanaja z kryminalnych spraŭ na kantrol za dziejnaściu samoha ŭrada. U jakaści ŭskosnaha dokazu krajniaj stupieni paranoi pryvodzicca toj fakt, što ŭ 2026 hodzie na parad Pieramohi na Čyrvonaj płoščy nie zaprasili nivodnaha deputata Dziaržaŭnaj dumy.

Zasnavalnik vydańnia «Važnyja historyi» Raman Anin u kamientary da publikacyi nazvaŭ spravazdaču jeŭrapiejskaj raźviedki adnoj z samych značnych navin apošniaha času. Na jaho dumku, Rasija ŭstupiła ŭ fazu, kali vajna siłavych kłanaŭ za stoł asłablenaha dyktatara stała niepaźbiežnaj.

Anin vyłučaje dva asnoŭnyja scenary, pa jakich moža pajści Rasija ŭ najbližejšaj pierśpiektyvie.

Iranski šlach, kali Pucin sprabuje stvaryć anałah iranskaha Korpusa vartavych isłamskaj revalucyi na bazie FSA i Rashvardyi. Heta budzie «novaja apryčnina» ź nieabmiežavanymi paŭnamoctvami, miarkuje Anin.

Biesprecedentnyja represii zakranuć navat tych, chto raniej ličyŭsia niedatykalnym. Krainu čakaje poŭnaja izalacyja ad internetu i źniešniaha śvietu, kab vykaranić lubuju krytyku.

Druhi scenar — čarhovaja smuta.

«Pucin sam vybudavaŭ hetuju sistemu i dobra razumieje, što jaho čakaje. Adsiul i ŭzmacnieńnie paranoi, i izalacyja ad naroda i ŭłasnaj śvity», — adznačaje Anin.

Jon ličyć, što abodva scenary zaraz majuć vysokuju stupień imaviernaści.

• 26
• 1
• 8
• 2
• 0
• 0
• 0
• 1