Byłaja pres-sakratarka Zialenskaha pajšła da Takiera i pierakazała tezisy rasijskaj prapahandy
Julija Miendel zajaviła, što ŭ 2022 hodzie ŭkrainski lidar nibyta byŭ hatovy addać Danbas Rasii. U Ofisie prezidenta Ukrainy Miendel acharaktaryzavali jak asobu, što «daŭno nie ŭ sabie».
Julija Miendel, byłaja pres-sakratarka Uładzimira Zialenskaha (z červienia 2019 da lipienia 2021 hoda), pajšła ŭ efir Takiera Karłsana — amierykanskaha viadučaha, viadomaha svajoj prarasijskaj rytorykaj i intervju z Pucinym i Duhinym.
Adnoj z samych rezanansnych stała zajava Miendel, što ŭ 2022 hodzie ŭkrainski lidar nibyta byŭ hatovy addać Danbas Rasii dziela miru. Miendel śćviardžała, što padčas pieramoŭ u Stambule viasnoj 2022 hoda ŭkrainskaja delehacyja nibyta pahadziłasia na ŭsie patrabavańni Kramla. Jana spasłałasia na kanfidencyjnyja razmovy ź nienazvanymi ŭdzielnikami sustrečy, jakija nibyta paćvierdzili asabistuju zhodu Zialenskaha na terytaryjalnyja sastupki.
U Ofisie prezidenta Ukrainy adreahavali na vypad byłoj supracoŭnicy vielmi rezka. Hetuju infarmacyju tam nazvali absurdnaj, a samu Miendel charaktaryzavali jak asobu, jakaja «daŭno nie ŭ sabie». U OP padkreślili, što Miendel na momant pieramoŭ užo nie pracavała ŭ dziaržaŭnych strukturach i nie mieła nijakaha dačynieńnia da pieramoŭnaha pracesu ci pryniaćcia rašeńniaŭ.
Pradstaŭniki prezidenta Ukrainy adznačyli, što kamientavać słovy čałavieka, jaki znachodzicca ŭ takim psichaemacyjnym stanie, «niesurjozna».
Taksama Julija Miendel ahučvała šmatlikija tezisy, jakija paŭtarajuć naratyvy rasijskaj prapahandy. Pavodle jaje słoŭ, Zialenski «emacyjna niekantralavany», «nie maje empatyi, a tolki hraje jaje», jon «nievierahodny akcior, hulnia jakoha pazbaŭlenaja źmiestu».
Padčas pracy Miendel u Ofisie prezidenta jana nibyta nieadnarazova čuła ad Zialenskaha, što «Ukraina nie hatovaja da demakratyi», a «dyktatura — heta paradak».
Byłaja pres-sakratarka prezidenta kaža, što Zialenski «śviadoma zaciahvaje vajnu», kab utrymacca pry ŭładzie, bo dla jaho jaje zaviaršeńnie budzie aznačać «palityčnaje samahubstva».
Miendel pastaviła znak roŭnaści pamiž prezidentami Rasii i Ukrainy.
«My bačym Pucina jak zło, ale Zialenski — taksama zło. Prosta schavanaje. Na kamieru jon hraje plušavaha miadźviedzika, ale kali śviatło haśnie, jon pieratvarajecca ŭ hryźli, jaki niščyć ludziej».
Heta daloka nie pieršy vypadak skandałaŭ ź Miendel. Raniej jana ŭžo pryciahvała ŭvahu ŚMI historyjami pra ŭnutranuju kuchniu ŭkrainskaj ułady. Jana śćviardžała, što kiraŭnik Ofisa prezidenta Andrej Jarmak nibyta praktykuje mahiju, naviedvaje mohiłki i vykarystoŭvaje «miortvuju vadu». Jana nazyvała Jermaka «vielmi niebiaśpiečnym čałaviekam» i zajaŭlała pra pahrozu svajoj biaśpiecy.
Kamientary
Ja nie kažu pravilna heta było ci nie, ale sami udzielniki hetych pieramovaŭ (toj ža Arachamija) heta paćviaržali