Ułaśnik «Miasnoj hubierni» prasoŭvaje na estradu vaśmihadovuju dačku. Jana ŭžo paśpieła zaśviacicca ŭ akcyi ŭ padtrymku Łukašenki
Vaśmihadovuju minčanku Lizu Viarcinskuju pradstaŭlajuć jak błohierku-miljońnicu — praŭda, vy možacie nie być z tych miljonaŭ, jakija pra jaje čuli. «Lusterka» raskazvaje, chto staić za školnicaj, jakaja aktyŭna vystupaje na praŭładnych mierapryjemstvach i pryvatnych viečarynkach.
Raptoŭnaja papularnaść
Liza Viarcinskaja pačała źjaŭlacca ŭ efiry TB jašče ŭ 2023 hodzie — na toj momant joj było piać hadoŭ. U telestudyju jaje pryvioŭ Ivan Zdaniuk — aŭtar piesień i pastajanny ŭdzielnik šmatlikich kancertaŭ, arhanizavanych uładami. Jon pradstaviŭsia piedahoham dziaŭčynki, a paśla staŭ aŭtaram niekalkich jaje piesień.
Viasnoj 2024 hoda Lizie zaviali YouTube-kanał i, padobna, pačali aktyŭna jaje raskručvać. U adnym ź pieršych jaje rolikaŭ źjaviŭsia papularny błohier Dźmitryj Siŭčyk (Dzim Dzimyč) i paabiacaŭ, što jaho kamanda «zrobić usio mahčymaje», kab u dziaŭčynki było šmat padpisčykaŭ. Nastupnyja niekalki miesiacaŭ na jaje videa milhali tvary łejbła Flagman Music.
U niejki momant Lizu naohuł pačali nazyvać dačkoj Siŭčyka i Anhieliny Michajłavaj (Anžylišy). U top papularnych taksama ŭvajšło videa «Podpišiś, i vyskočit multik pro Vłada A4» (ci varta kazać, što heta nie było praŭdaj).
Za niekalki miesiacaŭ takoj raskrutki YouTube-akaŭnt Lizy Viarcinskaj nabraŭ 1,1 miljona padpisčykaŭ — i na hetaj adznacy rost spyniŭsia, vynikaje sa źviestak servisu analityki Social Blade. Servis LUP acaniŭ uzrovień uciahnutaści jaje padpisčykaŭ jak vielmi nizki — 0,03%. To-bok tolki małaja dola aŭdytoryi reahuje na sami videa.
Na «Jandeks Muzycy» ŭ vykanaŭcy kala šaści tysiač słuchačoŭ za miesiac, na Spotify — 160, a samuju papularnuju pieśniu — «Pati u bati na chatie» — tam pasłuchali 17 tysiač razoŭ.
«Marafon adzinstva» i mara sustrecca z Łukašenkam
Zatoje Lizu pačali pradstaŭlać u publikacyjach dziaržSMI jak «zoračku, što hučna zajaviła pra siabie» i maje «zvyš dvuch miljonaŭ padpisčykaŭ u Instagram, YouTube i inšych sacsietkach».
Pierad prezidenckimi vybarami 2025 hoda «zoračku» ŭziali ŭ abarot: jana vystupała na kancertach «Marafonu adzinstva» ŭ Minsku i Hrodnie, a taksama razam ź inšymi błohierami chadziła pa biełaruskich pradpryjemstvach.
Dziaržahienctva «Minsk-Naviny» padrabiazna aśviatliła vizit siamji Viarcinskich na daterminovaje hałasavańnie. Aŭtary apublikavali takuju cytatu dziaŭčynki: «Płanuju stać papularnaj artystkaj. A jašče chaču, kab usie ŭ nas u krainie byli ščaślivyja. U mianie jość jašče adna vialikaja mara: vielmi chočacca asabista sustrecca z našym prezidentam. Dumaju, nam budzie pra što pahavaryć».
U kancy hoda Lizu zaprasili vystupać na «Słavianskim bazary» na kancercie «Zorki ciktoka» razam ź inšymi błohierami, jakija da hetaha ŭdzielničali ŭ pieradvybarčaj ahitacyi za Łukašenku.
«Kožny dzień ja śpiavaju, tancuju»
Ciapier Liza vučycca ŭ druhim kłasie i vielmi aktyŭna vystupaje. U adnym ź intervju jana pryznavałasia, što časam davodzicca padymacca a piataj ranicy, kab usio paśpieć.
— Kožny dzień ja śpiavaju, tancuju, zdymaju błoh i vučusia ŭ dźviuch škołach: minskaj himnazii № 30 imia Hieroja Savieckaha Sajuza B. S. Akreścina i muzyčnaj. Časam baćkam davodzicca krychu raniej zabirać mianie z urokaŭ, kab paśpieć na zdymki abo kancert.
Za apošnija paŭhoda jaje možna było pasłuchać na mierapryjemstvie «Błohier Pati» ŭ minskim Pałacy sportu, navahodnim kancercie na Niamizie, konkursie BRSM na najlepšuju pieršasnuju arhanizacyju, dziciačym pakazie prajekta Fashion Fabrique, maskoŭskim siamiejnym śviacie, niekalkich dabračynnych kancertach. A jašče — na samych roznych spartyŭnych spabornictvach Prezidenckaha spartyŭnaha kłuba: «Załataja rakietka», «Śniežny snajpier», «Pieršy rovar».
Dziaŭčynka źjaŭlajecca i na pryvatnych dziciačych śviatach. U publikacyi pra heta adznačajecca, što svabodnych dat zastałosia niašmat. «Lusterka» pad vyhladam patencyjnaha klijenta źviazałasia z pradstaŭnikom artystki. Toj paviedamiŭ, što jaje vystup na dni naradžeńnia kaštuje 1800 rubloŭ: u košt uvachodziać vinšavańnie imianińnika i muzyčnaja prahrama.
Školnica taksama milhaje na TB: jana źniałasia ŭ navahodnim šou telekanała Europa Plus TV, stała ambasadarkaj biełaruskaha teleprajekta «FAKTOR BY dieti». A jašče dała intervju ŭ šou «Našie utro» na ONT, «Dobraj ranicy, Biełaruś» na «Biełaruś 1», «Novoje utro» na RTR.
Da taho ž jana vypuskaje pieśni i klipy. Ciapier u aficyjnym pieraliku NCIU 12 kampazicyj, u jakich jana paznačanaja vykanaŭcaj. Jany vychodzili na roznych łejbłach, z 2025 hoda ich vypuskaje «Ura! Muzyka», jaki ŭvachodzić u strukturu «Hazpram-Miedyja Chołdynh».
Śpiavaje Liza ŭ asnoŭnym pra baćkoŭ, svaje pośpiechi i luboŭ da Biełarusi. Praŭda, u kancy 2025 hoda vyjšła pieśnia «Moj boj», dzie jość radki «O-o-o, ty takoj krasivyj. O-o-o, očień-očień stilnyj. O-o-o, tianiet k tiebie silno». Televiadoŭcy adnaho z ranišnich šou pacikavilisia ŭ vaśmihadovaj Lizy, pra jakoha chłopca idzie havorka. Dziaŭčynka adkazała, što praz uzrost joj nielha śpiavać pra chłopčykaŭ, a pieśnia pryśviečanaja hieroju hulni Roblox.
Chto baćki dziaŭčynki?
Mama Lizy — Natalla Viarcinskaja. Jana paznačanaja jaje pradstaŭnicaj i źjaŭlajecca pravaŭładalnicaj častki jaje piesień. U dadatak da muzyčnaj karjery dački Natalla kiruje studyjaj piermanientnaha makijažu ŭ Minsku. U 2025 hodzie jana atrymała ŭznaharodu ad Biełaruskaha sajuza žančyn na konkursie «Žančyna hoda» ŭ naminacyi «Staličnaja biznes‑łedzi».
Tata školnicy — Alaksandr Viarcinski — časta źjaŭlajecca na videa junaj błohierki. Jon źniaŭsia ŭ klipie na pieśniu «Papa možiet», jakaja, vidać, pryśviečanaja jamu samomu.
Alaksandr taksama zajmajecca biznesam. Jon uładalnik i kiraŭnik kampanii «Miasnaja hubiernia», jakaja vyrablaje miasnyja paŭfabrykaty. U adnym ź intervju jaho pradstaŭlali jak «miasnoha barona».
Pradukcyja hetaj kampanii pastupaje i ŭ handlovyja sietki, i ŭ dziaržarhanizacyi. Naprykład, u 2026 hodzie pradpryjemstva stała pastaŭščykom śvininy dla niekalkich biudžetnych ustanoŭ u Viciebsku — radzilni, onkadyspansera, abłasnoha kliničnaha centra psichijatryi i narkałohii, ahrarna-techničnaha kaledža i kaledža lohkaj pramysłovaści.
Što nie tak ź idejaj školnicy na scenie?
U apošnija hady možna sustreć historyi «junych zorak», jakija pastaleli i sutyknulisia ź ciažkaściami. Da prykładu, Kem Baret była dziciom-influensieram, mama pakazvała jaje žyćcio ŭ najdrabniejšych detalach. Dziaŭčyna raskazała The Washington Post, što publikacyi pryvodzili da ckavańnia i astrakizmu ŭ škole. Pastaleŭšy, Baret stała hramadskaj abaroncaj pryvatnaści dziaciej u internecie.
— Dziciačaja praca ŭ industryi anłajn-influensieraŭ pryvodzić da prablem, — zajaviŭ The Washington Post sienatar Ryčard Blumiental. — Uciahvańnie dziaciej u influensinh stvaraje surjoznuju ryzyku ekspłuatacyi: patencyjnaja adsutnaść pryvatnaści, praźmiernyja pracoŭnyja hadziny i adsutnaść spraviadlivaj kampiensacyi. Jany mohuć stvarać anłajn-kantent biez adekvatnaj abo naohuł bieź nijakaj abarony i nahladu.
Amierykanka Elisan Stoŭnier z šaści hadoŭ udzielničała ŭ madelnych konkursach i konkursach pryhažości, paśla pačała zdymacca ŭ telešou i klipach. U intervju The Guardian jana raskazała, što praz pastajannyja kastynhi sutyknułasia z prablemami ŭ pryniaćci svajho cieła i razładam charčovych pavodzin. Da taho ž na zdymkach jana sutyknułasia z darosłymi temami, da jakich na toj momant nie była hatovaja.
— Dumaju, było šmat darosłych z dobrymi namierami, jakija prosta chacieli padtrymać tuju, što zdavałasia zdolnym dziciem. Kali b ja mahła viarnucca ŭ minułaje, ja b nastojliva rekamiendavała niekamiercyjnyja, nieindustryjalizavanyja formy tvorčaści. U svajoj asnovie artystyzm — heta cudoŭnaje, hłyboka čałaviečaje samavyjaŭleńnie. Karparacyja ž, jakaja vałodaje tvaim imiem i vobrazam, — heta mienš naturalna.
Dziciačy psichaanalityk Vanda Chareł u artykule dla Psychology Today piša pra aktoraŭ, jakija pačali karjeru ŭ junym uzroście. Na jaje dumku, takija dzieci mohuć sutyknucca ź ciažkaściami ŭ navučańni paŭsiadzionnym zadačam, a taksama adčuvać siabie niajomka padčas znosin sa «zvyčajnymi» adnahodkami.
Jana pryvodzić u prykład cytatu viadomaj byłoj aktorki Mery-Kiejt Ołsen ź intervju časopisu Marie Claire, jakaja, kažučy pra svajo dziacinstva pierad kamierami, paraŭnała siabie i svaju siastru z «maleńkimi dresiravanymi małpačkami»: «Ja hladžu na svaje staryja fatahrafii i zusim nie adčuvaju suviazi ź imi… Ja b nikoli nie pažadała nikomu svajho vychavańnia… Ale ja b nie admoviłasia ad jaho nizašto na śviecie».
Ciapier čytajuć
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty24
Kamientary
Navošta, ja pračytaŭ pra hety pył čałaviečy???
Chutčej by. U chatu jaho, numar 28