U Charkavie sud praciahnuŭ utrymańnie pad vartaj biełaruskaha dobraachvotnika Žerara. Jon patłumačyŭ, adkul u jaho byli 1,4 miljona jeŭra

SZČ i bojeprypasy 

Čarhovaje pasiadžeńnie suda adbyłosia ŭ paniadziełak, 11 maja. Sud razhladaŭ prośbu abvinavačvańnia praciahnuć termin utrymańnia pad vartaj biełaruskaha dobraachvotnika Alaksandra Žerara Krasoŭskaha, jaki z 2022 hoda vajavaŭ za Ukrainu. 

Pačatak suda byŭ zapłanavany na 9:30 ranicy, ale pasiadžeńnie raściahnułasia na ŭvieś dzień. Spačatku adkłali, bo vajara nie dastavili svoječasova ŭ zału, paśla pieranosili na niekalki hadzin, bo toj paprasiŭ pierakładčyka. Potym jašče musili dačakacca druhoha advakata: abaroncaŭ uvohule nichto nie papiaredziŭ pra pasiadžeńnie, im nie paviedamili, kali buduć sudzić ich klijenta, jany šukali infarmacyju sami. 

Padazrajuć biełaruskaha dobraachvotnika va Ukrainie ciapier pavodle dvuch kryminalnych artykułaŭ — u samavolnym pakidańni vajskovaj čaści i zachoŭvańni bieź nieabchodnaha dazvołu zbroi i bojeprypasaŭ. Na sudzie Žerar zajaviŭ, što nie pryznaje svaju vinu, abarona ž ličyć spravu sfabrykavanaj. 

Sam Žerar i jahonyja advakaty zaŭvažajuć, što na hety momant jon nie maje statusu vajskoŭca ŭvohule, bo byŭ zvolnieny z čaści ŭ listapadzie. Ale sudziać jaho mienavita jak vajskoŭca. Taksama abarona nahadvaje, što va Ukrainie dobraachvotnik žyvie na padstavie DNŽ i maje biełaruskaje hramadzianstva, i jak inšaziemiec maje inšyja pravy ŭ armii. 

«U materyjałach spravy jość zajavy śviedkaŭ, što Krasoŭski nie źjaviŭsia ŭ vajskovuju čaść (paśla taho, jak byŭ adklikany kamandavańniem z adpačynku. — «Biełsat»). A na toj momant užo razhladaŭsia jahony rapart pra zvalnieńnie, bo jak inšaziemiec jon moža razarvać kantrakt u luby momant. Jašče da taho, jak vajskovaja čaść pravodziła niejkaje słužbovaje rasśledavańnie, Krasoŭski ŭžo nie byŭ vajskoŭcam: jaho zvolnili. Na hety momant jon užo nie jość vajskoŭcam.

Tady pytańnie: jak kamandavańnie, jakoje mahło spačatku kazać, što situacyja patrabuje adklikać Krasoŭskaha z adpačynku, paśla samo ž zvolniła jaho?» — zadavaŭsia pytańniem advakat Bahdan Bałynski. 

Z ulikam taho, što va Ukrainie šmat vajskoŭcaŭ pajšli z čaściej ci pazicyj u tak zvanaje SPČ (samavolnaje pakidańnie častki) i nie znachodziacca pad vartaj miesiacami, a navat trapiŭšy za kraty, vychodziać pad zakład, abarona raźličvała na bolš miakkaje rašeńnie suda i ŭ spravie Krasoŭskaha, čyjo SPČ, pavodle abvinavačańnia, doŭžyłasia tolki niekalki dzion da zvalnieńnia. 

Taksama, zhodna z abvinavačvańniem, u arandavanym pryvatnym budynku biełarusa znajšli bolš jak 500 patronaŭ i try hranaty. Žerar na sudzie adznačyŭ, što daje žyllo inšym vajskoŭcam, u tym liku inšaziemcam, a dostup na padvorak i padvał adkryty. 

«Dźviery ŭ padvał nie začyniajucca, brama ŭ dvor nie zamykajecca. Znojdzienyja rečy (havorka pra patrony i hranaty. — «Biełsat») znachodzilisia ŭ miachu razam z asabistymi rečami bajca H. (pazyŭny nie nazyvajecca ŭ metach zachavańnia asabistych danych. — «Biełsat»). Pamier adzieńnia tam — M, zusim nie moj. I hety vajskoviec paćvierdziŭ, što ŭ maim domie było šmat vajskoŭcaŭ», — tłumačyć Krasoŭski. 

Bolš jak paŭmiljona jeŭra

Jašče adna hučnaja detal, jakaja prysutničaje ŭ spravie biełarusa Žerara, — znojdzienyja ŭ tym ža padvale 680 tysiač jeŭraŭ. Raniej inšy biełaruski dobraachvotnik Dzianis Urbanovič abvinavačvaŭ Krasoŭskaha ŭ «karumpavanych schiemach». 

Pavialičyć

Ranicaj u paniadziełak 11 maja razhladałasia i pytańnie pra hetyja kanfiskavanyja padčas vobšuku hrošy — Žerara ŭ hety čas u zale nie było. 

Užo paśla, čakajučy sud adnosna padaŭžeńnia terminu varty, jon ahučyŭ svaju viersiju. Biełarus zapeŭnivaje, što hrošy atrymaŭ ad zachodnich partnioraŭ, jakija praź jaho dapamahajuć ukrainskamu vojsku. Pavodle słoŭ vajara, ludzi achviarujuć hrošy mienavita vajskoŭcam, aścierahajučysia trapić na sumnieŭnyja schiemy pry zakupkach vajskovymi strukturami ci dziaržavaj, pra jakija hramadstva daviedvajecca padčas karupcyjnych skandałaŭ. 

Va Ukrainie sapraŭdy šmat ludziej danaciać niepasredna padraździaleńniam i asobnym vajskoŭcam na kankretnyja patreby, a tyja paśla publikujuć publičnyja spravazdačy. 

Biełarus raskazaŭ, što suma, jakuju achviaravali, była našmat bolšaj — kala 1 miljona 400 tysiač jeŭra. Mužčyna zapeŭnivaje, što na častku hetych hrošaj užo zakupiŭ mabilnyja kazarmy dla padraździaleńnia i maje dakumientalnyja paćviardžeńni hetamu.

«A tyja 680 tysiač tak vyrašyli adžać. Heta prosta biezzakońnie. Jość rašeńnie apielacyjnaha suda, jaki pastanaviŭ viarnuć mnie hetyja hrošy», — skazaŭ Žerar. 

Parazmaŭlać z Alaksandram asobna i zadać pytańni śledčyja žurnalistcy nie dazvolili. Ale pamiž słuchańniami jon adznačyŭ: paśla apielacyi prajšło inšaje pasiedžańnie — biez prakurora, advakataŭ i jaho samoha, na jakim sudździa pastanaviŭ addać hrošy inšaj asobie. Pytańnie pra ich los jašče razhladajuć charkaŭskija sudy. 

Što viadoma pra stan i ŭmovy ŭtrymańnia biełarusa? 

Alaksandr na sudzie nie vykazvaŭ skarhaŭ na stan zdaroŭja ci na staŭleńnie z boku administracyi i supracoŭnikoŭ SIZA. Adznačyŭ, što atrymlivaje ŭsio nieabchodnaje. 

Taksama ciapier u biełarusa jość suviaź z žonkaj — jamu dazvolena telefanavać, što raniej zabaraniali śledčy i prakuror. Chacia navat ciapier abvinavačvańnie zajaŭlała, što jak inšaziemiec jon moža pieradavać niejkuju sakretnuju infarmacyju ci šyfry pa-biełarusku padčas zvankoŭ, a supracoŭniki, jakija prasłuchoŭvajuć razmovy, nie razumiejuć movy. Usio ahułam, maŭlaŭ, moža być pahrozaj nacyjanalnaj biaśpiecy Ukrainy. Heta taksama asprečvali advakaty. 

Taksama prakuror miarkuje, što Krasoŭski, kali vyjdzie pad zakład ci budzie pad chatnim aryštam, moža pieradać sakretnuju infarmacyju pra raźmiaščeńnie vojskaŭ i ŭzbrajeńnia, łahistyčnych maršrutaŭ USU jak čałaviek, jaki znachodziŭsia na froncie i kiravaŭ padraździaleńniem.

Hučała navat toje, što źviestki mohuć pieradavacca ŭ Biełaruś i nibyta jość ryzyka, što sam Žerar moža ŭciačy na radzimu. Chacia biełaruskija ŭłady padali vajara ŭ vyšuk i zavočna abvinavačvajuć u «najomnictvie» i pahražajuć vialikimi terminami. 

Pavialičyć

Čym skončyŭsia sud

Alaksandr Krasoŭski padčas pasiadžeńnia źviartaŭ uvahu na svaje zasłuhi i dobryja vyniki padraździaleńnia, jakim kiravaŭ. Taksama adznačaŭ, što źjaŭlajecca kvalifikavanym śpiecyjalistam, jaki moža prynosić karyść ukrainskaj armii zamiest taho, kab siadzieć za kratami, bo akurat pierad zatrymańniem źbiraŭsia pierajści ŭ inšaje padraździaleńnie i praciahvać słužbu. 

«Ja dobraachvotna pryjšoŭ abaraniać Ukrainu, atrymlivaŭ ranieńni, atrymaŭ viedamasnyja i dziaržaŭnyja ŭznaharody, jakija byli zdabytyja kryvioj i potam, — kazaŭ u svajoj pramovie Alaksandr. — Pad maim kamandavańniem adździaleńnie za paŭtara hoda zrabiła bolš jak 500 evakuacyj braniatechniki. Za hety čas pad maim kiraŭnictvam nie było nivodnaha SPČ, a majo padraździaleńnie — dva ŭzvody — paniesła straty tolki tryma «trochsotymi» i adnym «dvuchsotym».

Rasiejcy na mianie palujuć, pavodle ich zamovy była spalenaja maja mašyna. U Biełarusi mnie dali 15 hadoŭ zavočna za «najomnictva» — za toje, što vajuju za Ukrainu. Hrošy, jakija mnie pieradajuć maje siabry i partniory z-za miažy, jany pieradajuć tamu, što viedajuć, što ja adkazny čałaviek i vydatkuju ŭsio na abaronu Ukrainy. Uličvajučy ŭsio skazanaje, nie viedaju, kali ja nie varty vychadu pad zakład, to chto tady varty? Pramych dokazaŭ majoj vinavataści ŭ materyjałach spravy niama», — zrabiŭ vysnovu biełarus. 

Jak i raniej jahonyja abaroncy, jon nahadvaŭ pra maleńkuju dačku ź invalidnaściu i žonku, jakaja vymušanaja i pracavać, i zajmacca reabilitacyjaj chvoraha dziciaci samastojna. 

Pasiadžeńnie z ulikam pieranosaŭ doŭžyłasia amal da 21:00, kali sudździa začytała pastanovu. Jana padtrymała bok abvinavačvańnia — termin utrymańnia pad vartaj Žeraru padoŭžyli na 35 dzion. Biełaruski dobraachvotnik zastaniecca ŭ SIZA prynamsi da 14 červienia biez mahčymaści vyjści pad zakład. 

«Biełaruś 2.0. Biezzakońnie», — skazaŭ Krasoŭski pierad tym, jak jamu nadzieli kajdanki i vyvieli z zały suda. 

Advakaty padali apielacyju na pryniataje rašeńnie i abskardžvajuć taksama toje, što nie byli papiaredžanyja pra pasiadžeńnie, i sud nad klijentam moh prajści bieź ich udziełu i viedama.

• 1
• 0
• 0
• 8
• 1
• 5
• 5
• 0