Daradca Naŭsiedy: Na fonie abvinavačvańniaŭ Rasii ŭ bok Litvy mahčymyja pravakacyi
Na fonie abvinavačańniaŭ Rasii ŭ adras Litvy ŭ tym, što jana nibyta pradastaŭlaje pavietranuju prastoru dla nalotaŭ ukrainskich dronaŭ, suprać krainy mahčymyja vielmi surjoznyja pravakacyi, zajaviŭ daradca prezidenta pa pytańniach nacyjanalnaj biaśpieki Dejvidas Matulonis, paviedamlaje LRT.
Sami abvinavačańni daradca nazvaŭ absurdnymi.
«Heta absurd, i ŭ takoj abstanoŭcy suprać nas mahčymyja vielmi surjoznyja pravakacyi», — zajaviŭ Dejvidas Matulonis u aŭtorak u efiry Žinių radijas.
Jon nie ŭdakładniŭ, što mienavita maje na ŭvazie, adnak padkreśliŭ, što havorka idzie nie tolki pra prapahandu ŭ rasijskaj publičnaj prastory, ale i pra dziejnaść śpiecsłužbaŭ krainy.
«Ja nie chacieŭ by ŭdavacca ŭ detali, pakolki heta niepubličnaja infarmacyja, ale situacyja istotna abvastryłasia. Pavodle našaj acenki, heta byli nie tolki pytańni rasijskaj prapahandy. Usio išło značna hłybiej — z boku adpaviednych rasijskich struktur», — skazaŭ daradca prezidenta.
Takim čynam čynoŭnik adkazaŭ na prośbu padrabiaźniej prakamientavać papiaredžańnie prezidenta Litvy Naŭsiedy «vajujučym krainam Jeŭropy» nie vykarystoŭvać terytoryju Litvy dla nalotaŭ bieśpiłotnikaŭ.
Na minułym tydni Hitanas Naŭsieda zajaviŭ, što heta było b hrubym parušeńniem suvierenitetu i mižnarodnaha prava.
Pavodle Matulonisa, hetaje pasłańnie ŭ pieršuju čarhu było adrasavana Rasii, bo vidać, što jana ŭsio macniej razhaniaje hetuju temu.
«My pavinny byli vielmi vyrazna skazać, što abaraniajem svoj suvierenitet, svaju terytoryju i nie ŭdzielničajem niepasredna ŭ vajennych dziejańniach, chacia akazvali i budziem akazvać padtrymku Ukrainie», — padkreśliŭ daradca.
Na fonie taho, što ŭ apošnija miesiacy ŭ pavietranaj prastory krain Bałtyi ŭsio čaściej fiksujecca ruch ukrainskich dronaŭ, Maskva abvinavačvaje ich u pradastaŭleńni pavietranaj prastory dla atak bieśpiłotnikaŭ na rasijskuju enierhietyčnuju i vajennuju infrastrukturu.
U apošnija tydni rasijskija ŚMI taksama śpiekulujuć na temu taho, što nibyta z-za dazvołu krain Bałtyi vykarystoŭvać ich pavietranuju prastoru ŭkrainskimi dronami ŭźnikaje pahroza biaśpiecy Kalininhradskaj vobłaści.
Patrapić tudy z Ukrainy było b niemahčyma bieź pierasiačeńnia miažy Polščy abo Litvy.
Pradstaŭniki krain Bałtyi i inšyja čynoŭniki NATO śćviardžajuć, što ŭkrainskija drony trapili ŭ krainy Bałtyi paśla taho, jak Rasija srodkami radyjoelektronnaj baraćby adchiliła ich ad kursu.
Ciapier čytajuć
Mama Baženy Jaremič, jakaja rychtuje pryhažuń dla Łukašenki, kupiła elitny katedž koštam $837 tysiač24
Kamientary