«Seks u vialikim horadzie 2»: klimaks užo za vuhłom.
ZŠA, 2010, kalarovy, 146 chv.
Režysior: Majkł Patryk Kinh
Roli vykonvajuć: Sara Džesika Parkier, Kryścin Devis, Sincija Niksan, Kim Ketrał, Krys Not
Žanr: Nabor žanočych fietyšaŭ
Adznaka: 2 (z 10)
Čatyry śmiełyja siabroŭki ź vialikaha horadu adpraŭlajucca ŭ Arabskija Emiraty padryvać tamašniuju maral…
Jany iznoŭ tut. Jazykastaja Kery, jakaja vyśmiejvaje ŭłasny šlub, Miranda — jakaja zmahajecca za žanočuju pracu; Šarłota (samaja hłupaja z usioj kampanii) — jakaja achviarna spłaŭlaje dziaciej hrudastaj niani. I, narešcie, błandzinistaja Samanta — jakaja nie baicca ni Boha, ni čorta, ni, samaje hałoŭnaje — ciažarnaści. Jany pryjšli pakazać nam libieralnyja radaści modnych žančynaŭ.
Nie chaču pakazacca niavietlivym — ale heta radaści starečaha seksu.
I prablema nie ŭ tym, što stužka druhasnaja častka błahoj kopii telesieryjału. I navat nie ŭ tym, što zmaharki seksualnaje revalucyi dasiahnuli 50-hodździa.
Prosta kult samazaciataha hiedanizmu — heta zaŭždy staraść.Staraść Rymu, jaki abvaliŭsia pad naciskam barbaraŭ; staraść rakakošnaj francuskaj arystakratyi, abiezhałoŭlenaj hiljatynaj.
Finalnyja blastki sučasnaj raskošy: hłamurnaje viasielle sałodkich hiejaŭ (z vyčaplenaj dla hetaha ščaścia sapraŭdnaj Łajzaj Mineli); pazałočanyja apartamienciki sa słuhami; strakatyja farbački ŭschodniaha kirmašu; pantofliki, sukienački, chustački, valizački, kaktejliki i — revalucyjny krok — kandomčyki ŭ kabiecinym pašparcie.
Na vialikim ekranie — bliskučaja pustata. Jany kryčać i platkarać. Jany zmahajucca z patryjarchatam. Jany ciešać siabie nadziejaj, što paniavolenyja žančyny pad parandžoj upotajki nosiać viesnavuju kalekcyju 2010 (spadziavajciesia nadalej).
Ale va ŭłasnaj kvatery jany ŭžo tolki słužanki stomlenaje vintažnaści.
Biaździetnaja Kery źlakana pryznajecca, što varta prytrymlivacca tradycyi, chacia j stasavać jaje pad siabie.
Ci nie spaźniłasia, pannačka? Klimaks užo za vuhłom.
Stajać na adnoj nazie z knihaj na hałavie ŭ pamiać pra błakadu Leninhrada. Čynoŭniki zapuścili vielmi dziŭny čelendž da 9 Maja28
Kamientary