«Abo my ciabie zhvałcim, abo ty paholiš baradu razam z hałavoj». Łachvič raskazaŭ, što ź im adbyłosia
Biełaruski dobraachvotnik Alaksandr «Łachvič» Naŭkovič upieršyniu padrabiazna raskazaŭ svaju viersiju taho, jak jaho prymusili pahalić hałavu i baradu. Pavodle jaho, u hetaj historyi nie apošniuju rolu adyhrała dziaŭčyna, ź jakoj jon paznajomiŭsia ŭ internecie.
Alaksandr «Łachvič» Naŭkovič — były vajar bataljona «Litvin» Pałka Kalinoŭskaha.
Jon rehularna źjaŭlaŭsia ŭ publičnaj prastory jak błohier i ŭdzielnik palityčnych dyskusij. U svaich intervju i videa Łachvič časta kazaŭ pra biełaruskuju historyju, VKŁ, nacyjanalnuju hodnaść i šlachiecki kodeks pavodzin.
U 2024 hodzie Naŭkovič abraŭsia ŭ Kaardynacyjnuju radu. Jon naležaŭ da taho kryła dobraachvotnikaŭ, jakoje rehularna krytykavała biełaruskija demakratyčnyja siły za adsutnaść vyraznaj siłavoj stratehii i za adarvanaść ad ludziej sa zbrojaj.
Mienavita vakoł Naŭkoviča razhareŭsia adzin z samych hučnych kanfliktaŭ u biełaruskim dobraachvotnickim asiarodździ. 1 červienia 2026 hoda jon apublikavaŭ videa, na jakim biez svaich znakamitych vusoŭ nazyvaŭ siabie «śvinapasam», kazaŭ, što vusy — heta «adznaka šlachty», a jon svaimi ŭčynkami nibyta nie zasłužyŭ prava ich nasić.
Dalej išła sieryja abraźlivych frazaŭ pra samoha siabie, a taksama pra inšaha biełaruskaha dobraachvotnika — Alaksandra «Žerara» Krasoŭskaha, jaki znachodzicca ŭ SIZA va Ukrainie.
Paźniej Naŭkovič pryznaŭ, što videa źjaviłasia paśla kanfliktu z Radzivonam «Hienam» Batulinym. Tady jon śćviardžaŭ, što paśla sustrečy jany «pacisnuli adzin adnamu ruki i razyšlisia».
16 lipienia Łachvič apublikavaŭ amal 50‑chvilinnaje videa pad nazvaj «Kali svaje horš za akupantaŭ». U im jon upieršyniu padrabiazna raspavioŭ svaju viersiju taho, što adbyłosia.
Pavodle słoŭ Łachviča, prykładna za paŭtara miesiaca da incydentu jon paznajomiŭsia ŭ internecie ź biełaruskamoŭnaj dziaŭčynaj.
«Biełaruskamoŭnaja, idejnaja, jak ja zrazumieŭ. U pryncypie, hetym jana mianie i padkupiła».
Łachvič kaža, što jany rehularna pierapisvalisia i pamiž imi skłalisia dobryja adnosiny.
Za niekalki dzion da incydentu dziaŭčyna paviedamiła jamu, što budzie ŭ Iziumie ŭ haściach. Pa słovach Łachviča, jon taksama ŭ toj čas znachodziŭsia ŭ Charkaŭskaj vobłaści, tamu pahadziŭsia sustrecca praź niekalki dzion, 31 maja, bo nieabchodna było atrymać dazvoł kamandzira.
Jak zaŭvažaje Łachvič, sustreča adbyłasia litaralna praź niekalki dzion paśla jahonaha internet-kanfliktu z Radzivonam «Hienam» Batulinym. Jon nie admaŭlaje, što rezka vykazvaŭsia na adras Batulina, ale śćviardžaje, što heta nie apraŭdvaje taho, što adbyłosia paśla.
Pavodle Łachviča, napiaredadni sustrečy dziaŭčyna dasłała jamu adras. Pakul jon šukaŭ patrebny dom, jana sama vyjšła jaho sustreć.
«Vielmi maniernaja. Vitalisia rymskim pryvitańniem. Biełaruskamoŭnaja, idejnaja. Dumaju: nu, blin, kłas».
Paśla hetaha, pavodle jaho, dziaŭčyna adrazu prapanavała zajści ŭ dom.
«Ja kažu: «Moža, pojdziem pahulajem?» Jana adkazvaje: «Nie, niama času. Chutčej idzi ŭ duš. Lublu čystych mužčyn».
Łachvič pryznajecca, što lohka pahadziŭsia na prapanovu:
«Blin… Ja razumieju, što ŭ mianie prablema ź dziaŭčatami. Skažu jak jość: u mianie niama seksu. Hadami niama seksu. Tak užo skłałasia, tamu ja klunuŭ lohka».
Pavodle mužčyny, paśla taho, jak jon zajšoŭ u duš, bolš dziaŭčyny nie bačyŭ.
«Ja byŭ hoły. Dva ryły zajšło zdymać mianie na telefon. Troje stajała ŭ kvatery».
Pavodle jaho, u dušavuju zajšli Radzivon «Hiena» Batulin i Dzianis «Vaŭkałak» Urbanovič.
«Vaŭkałak zdymaje mianie na telefon. Navošta im hetyja videa — ja nie viedaju. Spytajciesia ŭ ich. Asabliva ŭ ich aŭdytoryi».
Dalej, pavodle Łachviča, jamu pastavili ŭltymatum:
«Čuvak, abo my ciabie zhvałcim, prynizim, abo ty paholiš baradu razam z hałavoj».
Jon śćviardžaje, što vybaru faktyčna nie było.
«Vybar nievialiki. Ja nie idyjot».
Paśla hetaha, pavodle jaho, było zapisana videa, jakoje paźniej razyšłosia ŭ sacyjalnych sietkach.
«I tamu źjaviłasia toje prynižalnaje videa. Ja jaho nie liču pakajannym. Jano było zapisana pad ciskam», — zajaŭlaje Łachvič.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski2
Kamientary