U šviedskim Hioteborhu vypuścili na maršrut pieršy bieśpiłotny aŭtobus. Praz hadzinu jon sutyknuŭsia z tramvajem
Bieśpiłotny aŭtobus vytvorčaści tureckaj kampanii Karsan atrymaŭ udar zzadu ad tramvaja ŭ Hioteborhu 25 maja, usiaho praz hadzinu paśla taho, jak pačaŭ pieravozić pasažyraŭ, piša Reuters.
«Aŭtobus zatarmaziŭ, i ŭ jaho ŭrezaŭsia tramvaj», — skazaŭ Patryk Čy, pres-sakratar Vasttrafik, kampanii, jakaja naležyć rehijanalnamu ŭpraŭleńniu hramadskaha transpartu.
Hetaje nieščaślivaje sutyknieńnie, u jakim, na ščaście, nichto nie paciarpieŭ, uźniało pytańnie nakont intehracyi aŭtanomnych transpartnych srodkaŭ u haradski ruch, prytym jakraz u toj čas, kali Hioteborh tolki pačaŭ hadavoje vyprabavańnie aŭtanomnaha hramadskaha transpartu z vykarystańniem aŭtobusa ad Karsan.
Kampanija Karsan zajaviła, što poŭnyja detali zdareńnia zaraz aceńvajucca.
«Zhodna ź pieršapačatkovymi vysnovami, incydent vyhladaje jak darožna-transpartnaje zdareńnie ŭ miežach ahulnaha haradskoha patoku, a nie jak prablema, źviazanaja ź sistemaj aŭtanomnaha kiravańnia», — zajavili ŭ kampanii.
Kadry na sajcie hramadskaha viaščalnika SVT pakazali paškodžańni aŭtobusa i baner na jahonaj zadniaj častcy z nadpisam: «Trymajcie dystancyju! Aŭtobus moža rezka zatarmazić».
Patryk Čy adznačyŭ, što akaličnaści sutyknieńnia jašče treba rasśledavać, dadaŭšy, što na borcie aŭtobusa znachodziŭsia kiroŭca-vyprabavalnik, jaki byŭ hatovy ŭ vypadku nieabchodnaści ŭziać kiravańnie mašynaj na siabie.
Kamientary