Čamu skandalny maskoŭski dresiroŭščyk Zapašny pryjazdžaŭ u Baranavičy
Dniami Park žyvioł «Dypryz» u Baranavickim rajonie prymaŭ kiraŭnika Vialikaha Maskoŭskaha cyrka Edharda Zapašnaha. Miascovaja rajonka vypuściła pra heta zachopleny repartaž, apisvajučy, jak artyst hulaŭ pa valjerach, sadžaŭ klon i schadziŭ na 15‑chvilinnaje spatkańnie z kapibaraj. Adnak za ŭsim hetym chavaŭsia zvyčajny kamiercyjny intares, daviedałasia vydańnie BGmedia.
Rekłamny tur
Miascovaja hazieta «Naš kraj» apublikavała liślivy materyjał pra vizit rasijskaha hastralora.
«Žyvioły — heta zaŭsiody pravilnaje vychavańnie, adkaznaść i luboŭ», — hetymi słovami Zapašny sypaŭ pierad žurnalistami, pakul dziaržaŭnaja presa maŭčała pra kamiercyjny padtekst pajezdki da baranavickaj kapibary Kapi.
Sapraŭdnuju metu vizitu maskoŭskaha artysta vykryŭ miascovy błohier, jaki zaŭvažyŭ u rukach Zapašnaha karobki z antysieptykam «Mirasiept» ad kampanii «Farmłend». Braty Zapašnyja ŭžo nie pieršy hod źjaŭlajucca ambasadarami hetaha brenda. Pavodle rekłamnaha siužeta, pryručalnikam drapiežnikaŭ nibyta nieabchodna haić drapiny ad kipciuroŭ.
«Akazvajecca, taki bujny rytejł, jak «Farmłend», i Edhard Zapašny ŭžo niekalki hadoŭ pracujuć z adnym brendam «Mirasiept»», — prakamientavaŭ aŭtar rolika.
Vyhladaje, što ŭ Baranavičy rasijanin pryjechaŭ prosta adpracoŭvać markietynhavy kantrakt.
Skandalny šlejf bratoŭ Zapašnych
Vizit dresiroŭščyka ŭ park, jaki pazicyjanuje siabie jak miesca humannaha staŭleńnia da pryrody, vyhladaje nieadnaznačna na fonie reputacyi artysta.
Braty Zapašnyja aktyŭna zmahajucca suprać cyrkaŭ biez žyvioł i navat prasili Pucina zabłakavać u Rasii hastroli kanadskaha Cirque du Soleil, jaki pryncypova nie pracuje sa źviarami. Pry hetym Centr abarony pravoŭ žyvioł «Vita» raniej publikavaŭ videa sa źbićciom tyhraniaci ŭ ich cyrku, a ŭ presie źjaŭlałasia infarmacyja, što adpracavanych źviaroŭ jany addajuć na stancyi dla trenirovak palaŭničych sabak.
Akramia žorstkaści da žyvioł, Edhard Zapašny viadomy ahresiŭnymi vykazvańniami ŭ bok ludziej. U 2019 hodzie, kamientujučy pavodziny futbolnych fanataŭ, jon zajaviŭ: «Ja b uvioŭ AMAP, pakryšyŭ by hetych zaŭziataraŭ. Papierałomvaŭ by častki cieła».
Z 2012 hoda braty źjaŭlajucca davieranymi asobami Uładzimira Pucina, jany aktyŭna padtrymali anieksiju Kryma i paŭnamaštabnuju vajnu va Ukrainie.
Kamientary