Dźmitryj Łukašenka padpisany na ekstremiscki pablik u instahramie
«Biuro» znajšło tajemny instahram-akaŭnt Dźmitryja Łukašenki. Žurnalisty vyvučyli padpiski jahonaha profilu i daviedalisia, čym cikavicca siaredni syn kiraŭnika Biełarusi ŭ siecivie.
Profil byŭ zarehistravany ŭ vieraśni 2021 hoda ŭ Biełarusi pad imieniem Dźmitryj.
U profilu aformlenyja ŭzajemnyja padpiski ź siamiejnikami Dźmitryja Łukašenki: dočkami Anastasijaj, Darjaj i Alaksandraj. A taksama z žonkaj Hannaj Łukašenkaj — jana maje adrazu dva akaŭnty ŭ instahramie: aficyjny pad tvorčym psieŭdanimam Hanna Siałuk i asabisty pad dziavočym proźviščam — Hanna Haravikova.
Jašče adno nazirańnie — vialiki śpis uzajemnych chakiejnych kantaktaŭ mienavita z atačeńnia Dźmitryja Łukašenki.
Siarod fałovieraŭ Dźmitryja Łukašenki žurnalisty znajšli hałoŭnaha treniera kamandy Alaksandra Łukašenki Dźmitryja Baskava, biznes-profil Kłuba tenisa, jakim vałodaje PSK, i Juryja Šachury. Dziakujučy «Kibierpartyzanam» žurnalisty vyśvietlili, što jon byŭ vajskoŭcam v/č 01549 — słužby biaśpieki Łukašenki. Šachura niekalki razoŭ supravadžaŭ žonku Dźmitryja Łukašenki Hannu ŭ zamiežnych pajezdkach — jon moža być asabistym achoŭnikam kłana Dźmitryja Łukašenki.
Akramia taho, Dźmitryj Łukašenka sočyć za akaŭntami a-la astrałahičnyja parady dla Aviena. Siaredni syn Łukašenki naradziŭsia 23 sakavika, i pavodle znaka zadyjaka jon jakraz Avien.
U siecivie Dźmitryj Łukašenka nie tolki pracuje, ale i adpačyvaje. Jon sočyć za akaŭntami sa śmiešnymi videa, ahladami tavaraŭ z markietpłejsaŭ, lepšymi momantami kinastužak i navinami pra žyćcio zorak šou-biznesu.
Asobnaja katehoryja jahonych zacikaŭleńniaŭ — heta ličbavaja psichałohija. Naprykład, jon padpisany na pablik «Spaznaj siabie» — tam prapanoŭvajuć ubačyć siabie ź inšaha boku i adkryć tajamnicy psichałohii. Taksama Dźmitryj Łukašenka sočyć za profilem Denijeła Fłeša, jaki prasoŭvaje svoj unikalny mietad psichasamatyčnaj terapii.
Nu i, viadoma ž, Dźmitryj Łukašenka pracuje sa svaimi finansavymi patokami i zajmajecca hrašovymi afirmacyjami. U instahramie Dźmitryj padpisany na Siarhieja Adamoviča, jaki sam siabie nazyvaje «architektaram koda dušy» — vučyć raźbirać svoj asabisty kod dachodu i pakrokavaj sistemie finansavaj svabody.
Akramia taho, siaredni syn Łukašenki sočyć za akaŭntam błohierki Sašy Biełejr. Jana aŭtarka kursu pa hrašovych miedytacyjach z havarkoj nazvaj Ab.money, jaki, na jaje dumku, dapamahaje pryciahvać hrošy ŭ svajo žyćcio ŭ lohkaści i harmonii. Praŭda, u siecivie jana prasłaviłasia, chutčej, tym, što jejny muž — papularny błohier Siarhiej Kasienka, kinuŭ ich niemaŭla ŭ sumiot.
Taksama Dźmitryj Łukašenka sočyć i za navinami ŭ Biełarusi. Jon padpisany na aficyjnyja akaŭnty takich dziaržaŭnych ŚMI i pablikaŭ, jak: BiełTA, «Puł pieršaha», «Vałkavysk Life» i ONT music.
Ale, jak vyśvietliła «Biuro», Dźmitryj Łukašenka prabraŭsia i ŭ varožy łahier. Jon padpisany na instahram-akaŭnt @belarusnovosti2, jaki pryznany ekstremisckaj infarmacyjnaj pradukcyjaj.
Pavodle biełaruskaha zakanadaŭstva, za «sadziejničańnie ekstremizmu» (padpisku) Dźmitryju Łukašenku naležyć jak minimum administracyjnaje spahnańnie. Pakul prostych biełarusaŭ paŭsiudna pieraśledujuć za padpiski, łajki i reposty, abaviazvajuć płacić štrafy abo adbyvać pakarańnie za kratami, uźnikaje pytańnie: ci ŭsie roŭnyja pierad zakonam?
Kamientary