Śpiavačka Lera Jaskievič raspaviała, kolki zarablaje ŭ miesiac na muzycy sa stryminhavych płatformaŭ

U svaim instahramie Lera Jaskievič raspaviała, što za sakavik i častkova krasavik zarabiła na svajoj tvorčaści na stryminhavych płatformach 25 dalaraŭ — i jaje heta raduje.

— Niechta skaža, što heta vielmi mała. Ja dumaju, što tak i jość. Ale ź inšaha boku, heta ŭžo 25 dalaraŭ. Nie 5 dalaraŭ, nie niekalki centaŭ. Uličvajučy, što muzyka sapraŭdy mała hrošaj źbiraje, uličvajučy, što ŭ mianie ciapier vielmi mała prasłuchoŭvańniaŭ — 2400 za miesiac na Spotify.

Lera kaža: kali kožny miesiac budzie kapać pa 25 dalaraŭ, u kancy hoda, moža, atrymajecca naźbirać na niešta. Dla paraŭnańnia, da kanfliktu ź mieniedžarkaj, praź jaki śpiavačka vydaliła ŭsie svaje treki z muzyčnych placovak, Lera atrymlivała ad stryminhavych siervisaŭ da 300 jeŭra za miesiac.

Ciapier artystka maje ŭ svajoj biblijatecy 14 piesień. I spadziajecca, što niekali atrymajecca viarnucca da toj raniejšaj sumy — ale nie viedaje, kolki času na heta spatrebicca.

— Ale najaŭnaść tut chacia b niejkich hrošaj daje mnie nadzieju. Bo kožny raz, kali ja baču, što maje videa z šyćciom nabirajuć bolš prahladaŭ, dumaju: «Nu ŭsio, kali videa z muzykaj nie źbirajuć prahladaŭ, značyć, muzyku nichto nie budzie słuchać i ja nie zmahu žyć za jaje košt, tamu treba šukać siabie ŭ inšym». Siońnia źjaviłasia nadzieja.

Nahadajem, u studzieni Lera Jaskievič raskazała fanatam, što paśla 16 lutaha jaje pieśni pierastanuć być dastupnymi na ŭsich muzyčnych placoŭkach — jana vydalić ich samastojna. Pryčynaj staŭ kanflikt śpiavački ź jaje eks-mieniedžarkaj i ŭ minułym najlepšaj siabroŭkaj Hannaj Navickaj.

Lera Jaskievič paznajomiłasia z Hannaj Navickaj, kali joj było 17 hadoŭ. Navickaja dapamahła Jaskievič pastupić u Biełaruski dziaržaŭny ŭniviersitet kultury i mastactvaŭ, zvaziła na ŭkrainski Ch-Faktar, mieniedžaryła jaje i była najlepšaj siabroŭkaj — dziaŭčaty navat zdymali razam kvateru.

Treki Lery zarehistravali ŭ Nacyjanalnym centry intelektualnaj ułasnaści, i, kab usio zaroblenaje dzialiłasia pamiž artystkaj i mieniedžarkaj 50 na 50, Hannu zapisali jak aŭtarku va ŭsich pieśniach, navat tam, dzie pa fakcie aŭtarkaj nie źjaŭlałasia. 

Siabroŭstva i supracoŭnictva chapiła na 10 hadoŭ, paśla jano dało raskolinu — Navickaja zajmajecca ŭ Biełarusi novym prajektam — hurtom «Barysaŭski trakt», a Jaskievič žyvie ŭ vymušanaj emihracyi ŭ Polščy.

Aburanaja Hanna Navickaja potym raspaviała svaju praŭdu. Kaža, što jašče da taho, jak prajekt «Lera Jaskievič» pačaŭ prynosić stabilny dachod, jana ŭkłała ŭ jaho raskrutku bolš za 20 tysiač dalaraŭ ułasnych srodkaŭ.

• 1
• 0
• 0
• 0
• 0
• 0
• 0
• 2