Litoŭskaja mytnia pačała aryštoŭvać niekatoryja aŭtamabili, jakimi kirujuć biełarusy. Voś u čym prykoł
Apošnimi dnia pačała źjaŭlacca infarmacyja pra toje, što ŭ biełarusaŭ aryštoŭvajuć mašyny, kali jany ŭjazdžajuć na ich u Litvu. Heta zdaryłasia z Mazda CX-5, jakaja vyjechała ź ES 31 sakavika, a 3 červienia na joj viartalisia nazad. Toje samaje adbyłosia prynamsi z adnym Jeep Grand Cherokee i adnoj Audi Q7. Ale tyčycca heta tolki peŭnaj katehoryi aŭtamabilaŭ i źviazana z sankcyjami.
Tema zatrymańnia mašyn aktyŭna abmiarkoŭvajecca ŭ kołach dalnabojaŭ i tematyčnych błohieraŭ. Paźniej pra parušeńni paviedamili i ŭ litoŭskaj mytni.
Čamu mienavita dalnaboi zahavaryli pieršymi?
Reč u tym, što ŭ dalnabojnickich kołach, asabliva za apošnija niekalki hadoŭ, stała papularnaj tema afarmleńnia tak zvanych pašpartoŭ sieryi RR.
Raniej biełaruskija hramadzianie, jakija aficyjna vyjechali na pastajannaje miesca žycharstva ŭ inšuju krainu, atrymlivali pašpart admysłovaj sieryi RR.
Apošnija niekalki hadoŭ pašpartoŭ sieryi RR nie vydajuć, zamiest hetaha staviać štampy ab pastanoŭcy na pastajanny konsulski ŭlik u zvyčajny pašpart, ale ŭ narodzie hetuju praceduru pa-raniejšamu nazyvajuć atrymańniem pašparta RR.
Dalnabojam i inšym hramadzianam Biełarusi, jakija pracujuć u ES, ale chočuć pryjazdžać na radzimu na mašynie, taki pašpart daje adrazu dźvie pieravahi: pa-pieršaje, možna pryjazdžać na aŭto z zamiežnaj rehistracyjaj i afarmlać časovy ŭvoz jak zamiežnik, to-bok nie pakidajučy finansavaj harantyi, jakaja raŭniajecca mytam za ŭvoz hetaha transpartnaha srodku.
Prostymi słovami — heta daje mahčymaść jeździć pa Biełarusi na mašynach ź litoŭskimi, polskimi ci jašče jakimi numarami i nie płacić myta, utylizacyjny zbor dy inšyja płaciažy.
Aproč taho, aŭto na jeŭrapiejskich numarach — heta jašče i mahčymaść biez abmiežavańniaŭ pierasiakać miežy Biełarusi i ES.
Kab dalnaboi i inšyja biełarusy abmiažoŭvalisia tolki hetymi pieravahami aŭto ź jeŭrapiejskaj prapiskaj, to nijakich prablem na miažy ŭ ich by nie ŭźnikała.
Ekanomija, jakaja pačała vyłazić bokam
Druhaja pieravaha «pašparta RR» kryjecca ŭ tym, što ich uładalniki mohuć nie tolki aficyjna vyjechać na pastajannaje miesca žycharstva ŭ inšuju krainu, ale i viarnucca nazad.
Pry hetym čałaviek, jaki staŭ na pastajanny konsulski ŭlik, pry viartańni ŭ Biełaruś moža pryvieźci svaju majomaść, jakuju jon mieŭ u inšaj krainie, biez apłaty myta.
U hety śpis uvachodziać i aŭtamabili. Hałoŭnaje, kab takaja mašyna ci inšy transpartny srodak prabyli na ŭliku ŭ krainie, kudy čałaviek vyjechaŭ na PMŽ, nie mienš za šeść miesiacaŭ da viartańnia ŭ Biełaruś.
I jak pakazvaje praktyka, mnohija dalnaboi aktyŭna karystajucca takoj mahčymaściu i, dačakaŭšysia ŭsich farmalnaściej pa terminach vałodańnia aŭto za miažoj, viartajucca z zamiežnaha PMŽ u Biełaruś.
A pakolki aŭto ličycca asabistaj majomaściu, to jaho ŭvoziać u Biełaruś biez apłaty myta, što dazvalaje ekanomić nie adnu tysiaču jeŭra.
I čym bolšy abjom ruchavika, tym bolšaja ekanomija na mycie, pad «pašpart RR» staralisia pryhaniać aŭto ź vialikim abjomam. I heta važny momant, bo jašče ź leta 2024 hoda sankcyi zabaraniajuć ekspart u Biełaruś aŭto z abjomam, bolšym za 1,9 litra.
Vyklučeńnie — mašyny, starejšyja za piać hadoŭ, ale ŭ takim vypadku klirens musić być mienšy za 165 mm, tamu džypy, parkietniki, mikraaŭtobusy i niekatoryja miniveny z abjomam, bolšym za 1,9 litra, faktyčna apynulisia pad poŭnaj zabaronaj na ekspart u Biełaruś.
U navinie pra zatrymańnie dźviuch mašyn u Miednikach razmova akurat idzie pra padsankcyjnyja aŭto: krasovier Mazda CX-5, jaki maje minimalny abjom ruchavika 2.0, i Jeep Grand Cherokee, u jakoha minimalny abjom u liniejcy składaje 3 litry.
U Biełaruś zajechali na litoŭskim aŭto, a vyjechali ŭžo na biełaruskim
Pavodle infarmacyi ad litoŭskaj mytni, Mazda CX-5 pakinuła terytoryju ES 31 sakavika 2026 hoda. Na toj momant aŭtamabil mieŭ litoŭskuju rehistracyju, ale ŭžo 3 červienia taja samaja Mazda CX-5 viartałasia ź Biełarusi ŭ Litvu jak aŭto, zarehistravanaje ŭ Biełarusi, biez afarmleńnia ekspartu ź Litvy ŭ trecija krainy. Heta i stała padstavaj dla zatrymańnia aŭto i zaviadzieńnia administracyjnaj spravy.
Anałahičnaja situacyja adbyłasia z Jeep Grand Cherokee, jaki pakinuŭ ES 14 kastryčnika 2025‑ha ź litoŭskimi numarami, ale taksama paźniej byŭ zarehistravany ŭ Biełarusi biez afarmleńnia ekspartu.
Adzin z błohieraŭ-dalnabojaŭ, jaki aktyŭna aśviatlaje hetuju temu, dniami začytvaŭ pratakoł, jaki jamu dasłaŭ niechta z padpisčykaŭ. Ź jaho vynikaje, što razmova idzie pra vyvaz aŭto ŭ Biełaruś u abychod sankcyj. A fakt mytnaha afarmleńnia ŭ Biełarusi byŭ u tym liku pravierany praz aficyjnuju bazu na sajcie biełaruskaj mytni.
I heta nie adzinkavy vypadak, kali padsankcyjnyja aŭto zatrymlivajuć na miažy. Taksama mytnia Litvy dniami paviedamlała pra zatrymańnie Audi Q7, jakaja pryjechała ź Biełarusi, i VW Transporter z Rasii, jaki, jak vyśvietliłasia, byŭ adnačasova zarehistravany ŭ Litvie i Rasii, a jahony ŭładalnik źmianiaŭ numary ŭ zaležnaści ad miažy, jakuju toj pierasiakaje.
Jak treba rabić pa zakonie?
Abiedźvie mašyny zatrymanyja praz padazreńni ŭ abychodzie sankcyj. Dalejšy los hetych mašyn budzie vyrašać sud.
U svaich paviedamleńniach litoŭskaja mytnia nahadvaje, što dla zakonnaha ekspartu aŭto ź ES u trecija krainy abaviazkova treba afarmlać ekspartnuju (JECH) dekłaracyju.
I kali razmova idzie pra aŭto, jakija nie padsankcyjnyja, to zrabić heta nie składana, a voś z padsankcyjnymi nie ŭsio tak prosta.
U teoryi, viadoma, zajaŭnik moža sprabavać spasyłacca na toje, što ekspart u Biełaruś adbyvajecca ŭ miežach pieravozki svajoj majomaści, tamu sankcyi nibyta tut ni pry čym.
Ale ž situacyja, kali čałaviek sapraŭdy praz doŭhi čas viartajecca ź ES u Biełaruś, i vypadki, apisanyja vyšej, chutčej za ŭsio, nie majuć ničoha ahulnaha.
Bo kali čałaviek, jaki pracuje ŭ Litvie, afarmlaje na siabie aŭto i paśla vyvozić jaho ŭ Biełaruś, dzie rehistruje na biełaruskija numary i viartajecca nazad u Litvu, pastajannaje miesca pražyvańnia jon źmianiaje tolki farmalna, bo jedzie nazad u Litvu, dzie maje dazvoł na žycharstva i pracuje, jak i raniej.
To-bok de-fakta hetaja ščylina ŭ zakanadaŭstvie vykarystoŭvajecca pierš za ŭsio dla taho, kab abyści abmiežavańni Jeŭrasajuza i nie płacić myta ŭ Biełarusi.
Pry hetym varta adznačyć, što pra nijakija abmiežavańni dla hramadzian Biełarusi ź jeŭrapiejskimi DNŽ pa kupli aŭto ŭ ES, a taksama pa pajezdkach na ich u Biełaruś razmova nie idzie.
U zonie ryzyki nie tolki kiemlivyja dalnaboi
Vyhladaje, što zajmieć prablemy pry ŭjeździe ŭ ES na aŭto ź biełaruskimi numarami mohuć nie tolki tyja ludzi, jakija skarystalisia hetaj ščylinaj.
Aŭtamabil, raniej pryviezieny pa takoj samaj schiemie, praź niejki čas moža nabyć luby achvotny. A pra toje, što mašyna trapiła ŭ Biełaruś u abychod jeŭrapiejskich normaŭ, novy ŭłaśnik moža navat nie zdahadvacca.
Da taho ž u Biełarusi za apošnija dva hady źjaviłasia peŭnaja kolkaść mašyn, jakija admysłova pryvieźli pad zamovu abo na prodaž u abychod jeŭrapiejskich sankcyj.
Takija aŭto taksama ŭ zonie ryzyki, bo ich ekspart u Biełaruś byŭ nielehalnym. I niavažna — zroblena heta praz ekspart u trecija krainy abo mašyna prosta tak vyjechała ź ES biez ekspartnaj dekłaracyi.
Tamu biełarusam, jakija nabyvajuć patrymanyja aŭto, treba trymać u hałavie dumku pra hetuju dadatkovuju ryzyku.
Pravieryć datu mytnaha afarmleńnia aŭto ŭ Biełarusi možna pa VIN-numary na sajcie mytni. Kali vy bačycie, što aŭto pryvieziena ź Jeŭropy i razmytniena ŭ Biełarusi paśla 4 červienia 2024 hoda, to varta dadatkova pahladzieć, ci nie było jano na toj momant padsankcyjnym.
Ciapier čytajuć
«Spasibo, Lena! Prodołžajtie viesti nabludienije». Aficer, jaki pisaŭ Charysavaj, paśviŭsia ŭ čatach palitemihracyi, a niekatorym dziaŭčatam navat prapanoŭvaŭ abmianiacca niudsami9191
Kamientary
De-fakta jany tupa vykarystoŭvali hety schiematoz vyklučna dziela taho, kab najahoryć adrazu dva baki: ES i RB.
Miarkuju, što sud uličyć fakt taho, što ŭsie hetyja pierajezdy byli fiktyŭnymi i vyniasie im prysud za abychod sankcyj. I tut usio vielmi prosta dakazać, bo jany sami jechali na tych ža aŭto na pracu ŭ Litvu, tolki ź bieł numarami, a heta značyć, što ŭ ich jość litoŭski VNŽ i dla Litvy, jany jak byli jajnymi padatkovymi rezidentami, tak i zastalisia i kazki pra vyvaz svajoj majomaści nie prakanajuć. Hetyja jołupni sami sabie prablem narabili, bo dumali, što samyja razumnyja.