Vydaviectva «Papury» anansuje dziasiatak knih dla dziaciej i darosłych
Vydaviectva «Papury» padzialiłasia najbližejšymi vydavieckimi płanami.
Chutka maje vyjści dziesiać navinak na biełaruskaj movie, siarod jakich novyja aryhinalnyja knihi dla dziaciej roznaha vieku, a taksama pieravydańni kłasiki i nie tolki, piša bellit.info.
Tak, nieŭzabavie ŭ farmacie poket-book vyjduć knihi Maksima Hareckaha «Dźvie dušy / U čym jaho kryŭda?», Sałamiei Pilštynovaj «Avantury majho žyćcia» i zbornika kazak, lehiendaŭ i padańniaŭ «Siniaja śvita».
Amataraŭ kłasika biełaruskaj knižnaj hrafiki Valeryja Słavuka paraduje aformlenaja im kniha «Kazka na noč»Leanida Dzinierštejna, padziei jakoj adbyvajucca ŭ lesie.
Nadzieja Jaśminska napisała historyju dla maleńkich čytačoŭ ad 10 hadoŭ, jakaja vučyć uśviedamlać svaje pačućci i žyć u zhodzie z saboj. Knihu «Prykry Kryŭs» aformiła mastačka Śviatłana Michałap. Kryŭs — škadlivaja istota, jakaja robić prykraści. Adkul uziaŭsia hety Kryŭs, nie razumieje hałoŭny hieroj — Staś, u jakoha dzień nie załadziŭsia ad samaha pačatku…
Śviatłana Stankievič u knizie «Žyŭ na śviecie hnom abo Jak zavodziacca siabry» apaviadaje pra Ninu, jakaja nie mahła znajści siabroŭ u novaj škole i pra hnoma Fluša — haspadara i achoŭnika sadu.
Taksama ŭ kišennym farmacie zapłanavany vychad adrazu troch knih z tvorami Kastusia Tarasava, siarod jakich «Try žyćci kniahini Rahniedy», «Apošniaje kachańnie kniazia Mindoŭha» i «Pahonia na Hrunvald».
Usie navinki nieŭzabavie majuć źjavicca ŭ kniharniach u Biełarusi i na papularnych markietpłejsach.
Ciapier čytajuć
Kaledž chacieŭ zasudzić studenta i spahnać ź jaho 13 tysiač rubloŭ — ale junak daŭ adpor sistemie6
Kamientary