Pry ŭźviadzieńni doma ŭ Minsku budaŭniki zamianili kieramzitabieton na «hipsakardon». Ludzi zabili tryvohu

Pieršym na toje, što adbyvajecca, źviarnuŭ uvahu adzin z dolščykaŭ, jaki vykłaŭ u ahulny čat žycharoŭ fatahrafii novych kanstrukcyj. Jon adznačyŭ, što pavodle prajektnaj dekłaracyi ŭnutranyja ścieny pavinny być zroblenyja z kieramzitabietonnych błokaŭ, jakija ludzi časta nazyvajuć «cahlanymi». Tamu ŭ budučych žycharoŭ uźnikła pytańnie, čamu faktyčna vykarystoŭvajecca inšy materyjał i ci zakonnaja takaja zamiena.

Uvohule infarmacyja vyklikała aktyŭnaje abmierkavańnie siarod dolščykaŭ. Mnohija vykazali niezadavolenaść, bo paličyli, što hipsakardonnyja pieraharodki mohuć horš abaraniać ad šumu pamiž pakojami ŭ paraŭnańni z bolš masiŭnymi błokami. Akramia taho, ludzi zaŭvažyli, što takija ścieny značna lahčej demantavać pry pierapłaniroŭcy, tamu niekatoryja mierkavali, što hetaje rašeńnie moža być vyhadnaje tolki tym, chto źbirajecca źmianiać płaniroŭku žylla.

Pavialičyć

Pakolki ŭ prajektnaj dekłaracyi sapraŭdy było paznačana vykarystańnie kieramzitabietonnych błokaŭ dla ŭnutranych pieraharodak, uźnikła pytańnie, ci moh zabudoŭščyk samastojna źmianić prajektnyja rašeńni.

U dziaržaŭnym vytvorčym abjadnańni «Minskbud», jakoje vystupaje zabudoŭščykam hetaha kvartała, patłumačyli, što havorka idzie tolki pra budaŭničy ekśpierymient. Lohkija stalnyja tonkaściennyja kanstrukcyi (ŁSTK) z abšyŭkaj hipsakardonam byli ŭstalavanyja tolki ŭ dźviuch kvaterach dla pravierki mahčymaści vykarystańnia novaj technałohii.

Pavodle pradstaŭnikoŭ zabudoŭščyka, meta ekśpierymientu — u tym, kab vyvučyć, ci možna zrabić budaŭnictva bolš ekanamična vyhadnym, zrabić kvadratny mietr žylla tańniejšym i paskoryć praces uźviadzieńnia damoŭ za košt bolš sučasnych technałohij.

Adnak u «Minskbudzie» padkreślili, što žycharam hetaha doma turbavacca nie treba. Ekśpierymient, maŭlaŭ, nie budzie raspaŭsiudžany na ŭvieś dom, a ŭsie pieraharodki buduć vykananyja ŭ adpaviednaści z prajektnaj dekłaracyjaj. Takim čynam, kanstruktyŭnaja schiema budynka zastaniecca takoj, jak była zaćvierdžanaja pieršapačatkova.

Taksama ŭ arhanizacyi raskazali pra raźvićcio ŭsiaho žyłoha kvartała ŭ rajonie vulic Vyhockaha i Paŭliny Miadziołki. Budaŭnictva hetaj terytoryi pačałosia ŭ kancy 2022 hoda. Pierad uźviadzieńniem damoŭ byli zahadzia pabudavanyja nieabchodnyja inžyniernyja sietki i transpartnaja infrastruktura.

Usiaho ŭ novym kvartale płanujecca pabudavać dziesiać šmatpaviarchovych žyłych damoŭ ahulnaj płoščaj bolš za 100 tysiač kvadratnych mietraŭ. Žyllo pryznačajecca ŭ asnoŭnym dla hramadzian, jakija majuć patrebu ŭ palapšeńni žyllovych umoŭ. Damy buduć mieć 2—3 siekcyi i 19 pavierchaŭ, a ich kanstrukcyi buduć vyrablenyja na Zavodzie efiektyŭnych pramysłovych kanstrukcyj.

Asablivaściu kvartała stanie poŭny pierachod na elektrazabieśpiačeńnie: u kvaterach ustalujuć elektrakanviektary dla aciapleńnia i bojlery dla nahrevu vady. Adnačasova z žyłymi damami budzie stvaracca i sacyjalnaja infrastruktura — zapłanavana budaŭnictva dziciačaha sada na 350 miescaŭ, škoły na 1020 vučniaŭ i niekalkich adkrytych aŭtastajanak.

Hety kvartał taksama budzie źviazany z maštabnym prajektam raźvićcia terytoryi žyłoha kompleksu «Paŭnočny Bierah».

Asobna adznačana, što dom, dzie pravodziŭsia ekśpierymient z novymi pieraharodkami, budujecca pa inšaj technałohii. Heta dvuchsiekcyjny 19‑paviarchovy zborna-manalitny dom na 150 kvater, u jakim taksama praduhledžany elektryčny farmat zabieśpiačeńnia i azdableńnie kvater.

Śpiecyjalisty nahadali, što ŭsia prajektna-kaštarysnaja dakumientacyja pa budaŭnictvie prajšła dziaržaŭnuju ekśpiertyzu. Pry hetym padčas budaŭnictva prajektnyja rašeńni, materyjały abo technałohii mohuć źmianiacca, ale tolki pry abaviazkovym infarmavańni dolščykaŭ pra takija źmieny.

• 0
• 0
• 2
• 4
• 0
• 0
• 3
• 0