Kvatery ŭ novabudoŭli ŭ centry Hrodna raspradali za ličanyja chviliny, ale tolki zirnicie, što tam nabudavali
U novym kvartale pobač z histaryčnym centram Hrodna kvatery raspradali za 2,5 chviliny. Na žal, na takoje žytło ŭsio jašče jość popyt.
Što za dom i čamu taki popyt?
Novy kvartał budujecca ŭ niepasrednaj blizkaści ad histaryčnaha centra Hrodna, dzie raniej znachodzilisia haražy i składy. I heta, badaj, adno z apošnich, kali nie apošniaje miesca ŭ centry, dzie možna pabudavać kvartał sa šmatkvaternymi damami.
Kvartał budzie składacca z šaści šmatpaviarchovikaŭ vyšynioj ad 6 da 10 pavierchaŭ, u jakich budzie 570 kvater. Zabudoŭščyk — «Hrodnažyłbud», jaki viadomy budaŭnictvam adnastajnych panelek.
Niahledziačy na toje, što tam i biez taho samy darahi kvadrat u damach, jakija buduje «Hrodnažyłbud», kvatery ŭ hetych panelkach karystajucca šalonym popytam.
Naprykład, tak było jašče ŭ śniežni minułaha hoda, kali kvatery ŭ 10‑paviarchovym domie razabrali za hadzinu.
Chto nie paśpieŭ — toj pralacieŭ
Dniami zabudoŭščyk zapuściŭ anłajn-rehistracyju dla braniravańnia kvater a 12‑j hadzinie 28 maja i, pa słovach ludziej, jakija nie paśpieli zarehistravacca, usie 100 miescaŭ u anłajn-čarzie ŭ domie na 90 kvater razabrali za 2,5 chviliny.
Praz heta ludzi, jakim nie chapiła miescaŭ, hatovyja za hrošy vykupić miesca ŭ čarzie na kuplu kvatery.
«Hrodna! Chto siońnia paśpieŭ zarehistravacca na novabudoŭlu na Astroŭskaha, 4, źviažyciesia sa mnoj, hatovy vykupić vaša miesca», — napisaŭ mužčyna ŭ Tredsie.
Paźniej mužčyna adpisaŭ, što, dziakujučy Tredsu, znajšlisia dobryja ludzi, hatovyja addać svaju rehistracyju za simvaličnuju płatu, ale ŭsio heta akazałasia biessensoŭnym, bo ŭ «Hrodnažyłbudzie» nie dali mahčymaści pamianiacca ź inšym čałaviekam.
Maŭlaŭ, kali sam zarehistravacca nie paśpieŭ, to, ličy, ty pralacieŭ, dadaje jon.
I kali pierakupić miesca ŭ čarzie niemahčyma, to pieraprodaž kvatery całkam realny.
U zabudoŭščyka kvadrat u dvuškach kaštavaŭ 3500 rubloŭ. U adnym z susiednich damoŭ anałahičnuju płaniroŭkaj i pamieram kvateru na 55,8 mietra pradajuć za 220 tysiač rubloŭ (80 tysiač dalaraŭ), što amal pa 4000 rubloŭ za mietr.
Admietna, što 3 500 za mietr ad zabudoŭščyka i 4 000 ad pryvatnika — heta nie samy darahi kvadrat u hetym kvartale.
U domie na rahu mietr u adnapakajoŭkach na 50 kvadrataŭ pradajecca pa 4 500 rubloŭ (kala 1 600 dalaraŭ). U dvuchpakajoŭkach na 85 mietraŭ — pa 3 900 rubloŭ (kala 1 380 dalaraŭ), a ŭ troškach na 90 kvadrataŭ mietr pa akcyi kaštuje 3 600 rubloŭ (kala 1 272 dalaraŭ). Heta pry tym, što siaredni košt mietra žytła ŭ Hrodnie składaje kala 1 163 dalaraŭ.
Čamu taki popyt na kvatery ŭ kvartale na Astroŭskaha?
Niahledziačy na toje, što heta i biez taho samaje darahoje žytło ad zabudoŭščyka, šalony popyt na kvatery ŭ hetym kvartale pierš za ŭsio abumoŭleny nie tym, što samo pa sabie žytło jakasna inšaha ŭzroŭniu, a pierš za ŭsio łakacyjaj.
Bo faktyčna heta šarahovyja panelki ad «Žyłbuda» biez padziemnych parkovak i inšych atrybutaŭ jakasnaha darahoha žytła.
Pa słovach mieścičaŭ, jakija cikavilisia kuplaj nieruchomaści ŭ hetym kvartale, mnohija abjekty vykuplajuć dziela taho, kab paśla možna było vyhadna zdavać kvatery na sutki, bo histaryčny centr tam litaralna za paru krokaŭ.
Kažuć, što kvatery ŭ hetych damach vykuplajuć u tym liku staličnyja inviestary. A pakolki pad zdaču ŭ asnoŭnym biaruć nievialikija pa płoščy kvatery, to mienavita na ich samy vialiki popyt, bo ŭ niekatorych damach, jakija ŭžo dabudavali, u samoha zabudoŭščyka jość pa niekalki kvater. Ale heta žytło ź vialikaj kvadraturaj.
Doraha, ale nie kruta?
Niahledziačy na vysoki popyt i vydatnuju łakacyju, mnohim haradžanam niedaspadoby hety kvartał praz toje, što heta šarahovyja panelki, jakija ŭvatknuli amal u samy centr horada. Pra reakcyju haradžan na hetuju zabudovu «Naša Niva» pisała raniej.
U pryvatnaści krajaznaŭca Miečysłaŭ Jan Supron, jaki šmat hadoŭ zmahajecca za zachavańnie histaryčna-kulturnaj spadčyny Hrodna, nazyvaje takuju zabudovu ŭ centry žachlivaj.
Mnohija haradziency ličać, što ŭ takoj łakacyi varta było budavać sučasnaje nizkapaviarchovaje žytło, a nie panelki vyšynioj da dziesiaci pavierchaŭ. Tym bolš, što kali i takija kvatery raźbirajuć jak haračyja piražki, to całkam mahčyma, što byŭ by popyt i na bolš darahoje, ale bolš sučasnaje žytło, jakoje mahło b stać hodnym praciaham staroha horada, a nie čarhovym kvartałam sa šmatpaviarchovymi panelkami, jakimi zabudoŭvajuć uskrainy.
Ciapier čytajuć
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?4
Kamientary
21 stahodździe, centr Jeŭropy, a hetyja kahłaśniki buduć damy ŭ centry biez padziemnaha parkinha…