«Heta ŭnikalny vypadak!» Kala «Minsk-Śvietu» zaŭvažyli ptušku hoda
U paniadziełak, 22 červienia, čytač Onlíner padzialiŭsia redkim zdymkam. Na fota, zroblenaje hetym ža rankam, patrapiŭ čorny busieł. Jaho zaŭvažyli ŭ lesaparkavaj zonie pamiž vulicaj Asanalijeva i rajonam «Minsk-Śviet». Sustreć hetuju ptušku navat u dzikaj pryrodzie — vialikaja ŭdača, nie kažučy ŭžo pra centr horada.
Čorny busieł ličycca redkim vidam va ŭsich krainach, dzie žyvie. U Biełarusi jon uklučany ŭ Čyrvonuju knihu. Darečy, u 2026 hodzie mienavita čorny busieł byŭ nazvany ptuškaj hoda.
Za kamientaryjem žurnalisty źviarnulisia da zaołaha kampanii «Dzikaja pryroda» Alaksandra Vinčeŭskaha. Śpiecyjalist adrazu vykazaŭ zdahadku, što busieł moh palacieć z zaaparka: zanadta vyklučnaja situacyja. Adnak razhledzieć kolca na nazie ptuški nie ŭdałosia.
— Viadoma, heta ŭnikalny vypadak! Pralatać nad Minskam jany mohuć, ale kab sieści ŭ horadzie… Maładyja ptuški jašče nie źlatali z hniozdaŭ. Chutčej za ŭsio, heta małady busieł, jaki viarnuŭsia z Afryki. Jany pačynajuć razmnažacca ŭ 5—6 hadoŭ, ale i da hetaha kožny hod prylatajuć z poŭdnia na radzimu. Dumaju, heta adna z takich ptušak. Kab darosłaja zalacieła ŭ horad? Nie ŭjaŭlaju takoha. Jany naohuł nie lubiać pakazvacca ludziam, bajacca. Zvyčajna palujuć u lesie, na kanałach i rečkach. Viaduć utojlivy ład žyćcia.
Taksama Alaksandr adznačyŭ, što niaredka za čornych busłoŭ prymajuć biełych, zapeckanych u mazucie. Admietnaja rysa mienavita čornych — hołaja čyrvonaja skura vakoł vačej.
U adroźnieńnie ad svajho biełaha surodziča, čorny busieł nikoli nie ŭtvaraje kałonij i nie sielicca bližej čym za kiłamietr ad susieda.
Lubimaje miesca žycharstva — bujnyja duby, asiny abo sosny z toŭstymi halinami. Drevy pavinny być dužymi, kab vytrymać hniazdo vahoj u niekalki socień kiłahramaŭ. Akramia taho, važnaja pyšnaja krona, jakaja zmoža schavać siamju ad drapiežnych ptušak.
Jak raspavioŭ zaołah, hniozdy mohuć vykarystoŭvacca dziesiacihodździami. Tak, u Biełarusi jość hniazdo, u jakim čornyja busły žyvuć užo amal 20 hadoŭ.
Kamientary