U Łyntupach amal za dva miljony dalaraŭ vystavili na prodaž budynki staroha brovara
U Pastaŭskim rajonie na prodaž vystavili były brovar u Łyntupach. Za vialiki kompleks histaryčnych i vytvorčych budynkaŭ prosiać 5 833 554 rubli — heta kala 1,93 miljona dalaraŭ, piša domovita.by.
Pradpryjemstva raźmieščanaje niedaloka ad litoŭskaj miažy na terytoryi płoščaj bolš za 6 hiektaraŭ. Usiaho ŭ skład hetaha kompleksu ŭvachodzić kala troch dziasiatkaŭ budynkaŭ. Niekali tut aktyŭna vyrablali śpirt, ale paśla surjoznaj avaryi 13 hadoŭ tamu vytvorčaść spynili, a zavod pastupova pieratvaryŭsia ŭ zakinuty pramysłovy kompleks.
Historyja pradpryjemstva pačałasia jašče ŭ časy, kali Łyntupami vałodaŭ šlachcic-pradprymalnik Juzaf Bišeŭski. U pačatku XX stahodździa jon zasnavaŭ tut vialikuju vinakurniu z čyrvonaj cehły, jakaja paźniej stała paŭnavartasnym brovaram. Pra Bišeŭskaha ŭ Łyntupach zachavałasia lehienda, nibyta jon układaŭ vialikija hrošy ŭ raźvićcio majontka, kab urazić francuzskuju aktrysu, u jakuju byŭ zakachany. Adnak aktrysa ŭ vyniku źjechała ŭ Paryž, a šlachcic tak i zastaŭsia chałaściakom.
Akramia vinakurni, Bišeŭski zakłaŭ u Łyntupach park z sažałkami, zasnavaŭ piŭny brovar i pabudavaŭ viežu-kapcilniu, vyjava jakoj ciapier jość na miascovym hierbie.
Paśla 1939 hoda zavod praciahnuŭ pracavać i ŭ saviecki čas staŭ dziaržaŭnym pradpryjemstvam. Na piku svajoj mahutnaści jon vyrablaŭ bolš za 600 tysiač dekalitraŭ śpirtu ŭ hod.
Adnak kala 13 hadoŭ tamu na pradpryjemstvie adbyłasia surjoznaja avaryja: u rektyfikacyjnym cechu vybuchnuła jomistaść. Paśla hetaha vytvorčaść spynili, budynki zakansiervavali, a zavod pačaŭ pastupova zaniepadać.
Ciapier na prodaž vystaŭleny kompleks płoščaj bolš za 6 hiektaraŭ. Najbujniejšy abjekt — vytvorčy korpus płoščaj bolš za 6200 kvadratnych mietraŭ. Akramia jaho, u łot uvachodziać administracyjny budynak, niekalki ziernieskładoŭ, kacielnia, śpirtaschovišča, staraja stałovaja, stajnia i nievialikaja krama. Ahulnaja płošča ŭsich budynkaŭ pieravyšaje 13 tysiač kvadratnych mietraŭ.
Na terytoryi jość čatyry ŭłasnyja artezijanskija śvidraviny, elektryčnyja sietki, ciepłatrasy i kanalizacyja. Taksama novamu ŭładalniku pieradaduć 68 adzinak abstalavańnia, jakoje zastałosia ŭ vytvorčych cechach.
Elektronnyja tarhi projduć na placoŭcy Gostorg. Prymać zajaŭki buduć da 21 vieraśnia, a sam aŭkcyjon pačniecca 22 vieraśnia. Dla ŭdziełu nieabchodna ŭnieści zadatak u pamiery 10% ad pačatkovaj cany — 583 355 rubloŭ.
Kali na tarhi pryjdzie tolki adzin udzielnik, jon zmoža nabyć kompleks pa pačatkovaj canie, pavialičanaj na 5%. Budynki pieradajucca ŭ pryvatnuju ŭłasnaść, a ziamielny ŭčastak — u pastajannaje karystańnie.
Pry hetym budučamu ŭładalniku daviadziecca ŭličvać histaryčnuju kaštoŭnaść častki abjektaŭ. Niekatoryja budynki majuć status historyka-kulturnych kaštoŭnaściaŭ, tamu ich pierabudovu abo istotnyja źmieny nieabchodna budzie ŭzhadniać ź Ministerstvam kultury.
«Abhruntavany sposab likvidacyi avaryjnaj pahrozy i naviadzieńnia paradku». Minabłvykankam padtrymaŭ znos carkvy XIX stahodździa — ci nie pieršy za apošnija paŭstahodździa
U Biełarusi vyrašyli źniščyć lubyja prajavy «polskaści»? Ułady ciškom rychtujuć hłabalnuju začystku Dziaržaŭnaha śpisu pomnikaŭ
U centry Minska pradajuć zavodski korpus za vielizarnyja hrošy
U Niaśvižy ź vialikaj źnižkaj pradajuć stohadovuju viłu polskich čynoŭnikaŭ. Za što jaje chvalili mižvajennyja krytyki?
Ciapier čytajuć
Paśla biełaruskaj vioski Šnajderaŭ bolš nie biantežyć pytańnie ŁHBT. Siamja z Hiermanii, jakaja stała hierojami prapahandy, viartajecca ŭ ES28
Kamientary