Namieśnikam ukrainskaha hałoŭnakamandujučaha USU Drapataha pryznačyli 32‑hadovaha ajcišnika

Ab pryznačeńni Martynienki namieśnikam hałoŭnakamandujučaha Uzbrojenymi siłami Ukrainy Michaiła Drapataha 23 vieraśnia paviedamiŭ Hienieralny štab USU. Adpaviedny zahad byŭ padpisany jašče 1 vieraśnia. Na hetaj pasadzie jon źmianiŭ bryhadnaha hienierała Andreja Lebiadzienku, jakoha zvolnili paśla aŭdytu. Centralnaje ŭpraŭleńnie inavacyjnaj dziejnaści USU, jakoje jon kuryravaŭ, rasfarmavali.

Martynienka budzie adkazvać za ličbavuju transfarmacyju i inavacyi va Uzbrojenych siłach Ukrainy.

Pryjšoŭ u vajskovy IT jašče studentam

Dakładnaja data i miesca naradžeńnia Arcioma Hievorkaviča Martynienki ŭ adkrytych krynicach nie nazyvajucca. U vieraśni 2024 hoda Forbes Ukraine uklučyŭ jaho ŭ śpis «30 da 30». Na toj momant Martynienku było 30 hadoŭ. Ciapier jamu 32 hady.

Pavodle LinkedIn Martynienki, u 2012 hodzie jon pastupiŭ u Vajskovy instytut telekamunikacyj i infarmatyzacyi ŭ Kijevie (VITI). U 2016‑m atrymaŭ stupień bakałaŭra pa infarmatycy, a ŭ 2017‑m — mahistra.

Pracavać nad vajskovym prahramnym zabieśpiačeńniem jon pačaŭ jašče padčas vučoby. U lutym 2016 hoda Martynienka staŭ małodšym raspracoŭščykam u vajskovaj častcy A2724, dzie stvarałasia DELTA.

U 2017 hodzie Martynienka, tady siaržant i kursant vypusknoha kursa, uvajšoŭ u kamandu z šaści ŭkrainskich vajskovych IT-śpiecyjalistaŭ, jakaja pieramahła na mižnarodnym spabornictvie NATA, apiaredziŭšy 13 inšych kamand.

Ź lutaha 2022 hoda Martynienka paralelna pracavaŭ architektaram u Centry inavacyj i raźvićcia abaronnych technałohij Minabarony. U tym ža hodzie jon byŭ kapitanam i ŭznačalvaŭ adździeł raspracoŭki centra.

U 2024‑m Martynienka mieŭ zvańnie majora, a ŭ 2025‑m — padpałkoŭnika i byŭ namieśnikam načalnika centra. Paśla zvalnieńnia kiraŭnika jon časova ŭznačaliŭ ustanovu. Ciapier Martynienka — pałkoŭnik.

U 2024 hodzie namieśnik ministra ličbavaj transfarmacyi Ukrainy Alaksiej Vyskub nazvaŭ jaho adnym z «niepubličnych hierojaŭ», dziakujučy jakim Ukraina efiektyŭna supraćstaić Rasii.

Što takoje ŭkrainskaja sistema DELTA

DELTA pačynałasia jak ličbavaja karta pola boju, a z časam pieratvaryłasia ŭ kompleksnuju sistemu dla kiravańnia bajavymi dziejańniami. Jana źbiraje infarmacyju ź bieśpiłotnikaŭ, spadarožnikaŭ i inšych krynic i dazvalaje vajskoŭcam bačyć aktualnuju situacyju na poli boju, abmieńvacca danymi i płanavać apieracyi.

Martynienka paraŭnoŭvaŭ DELTA z Google Workspace dla vojska: zamiest adnoj prahramy heta nabor źviazanych pamiž saboj instrumientaŭ. U 2024 hodzie sistemu aficyjna ŭviali ŭ ekspłuatacyju va ŭsich padraździaleńniach Sił abarony Ukrainy. Jaje taksama vypraboŭvali padčas vučeńniaŭ NATA na sumiaščalnaść ź sistemami krain aljansu.

Pavodle danych, jakija ŭ 2024‑m hodzie pryvodziła vydańnie Forbes Ukraine, štomiesiac u DELTA fiksavali kala 600 tysiač abjektaŭ praciŭnika i płanavali 106 tysiač misij bieśpiłotnikaŭ.

Paśla pačatku poŭnamaštabnaha ŭvarvańnia Rasija sprabavała atakavać DELTA i jaje infrastrukturu. Paśla źniščeńnia data-centraŭ sistemu pieranieśli ŭ vobłaka.

• 9
• 0
• 0
• 0
• 0
• 0
• 0
• 0