Były śpiecyjalny pradstaŭnik prezidenta ZŠA pa pytańniach Ukrainy Kit Kiełah zajaviŭ, što Uładzimir Pucin moža chutka zaviaršyć vajnu suprać Ukrainy, kali abviaścić rasijanam pra «pieramohu» i vyviedzie rasijskija vojski z akupavanych terytoryj.
«Ja miarkuju, što dla rasijan heta vajna moža skončycca ŭžo zaŭtra i vielmi lohka. Usio, što Pucinu treba zrabić, heta abviaścić pra «pieramohu» i vybiracca preč dadomu», — paraiŭ Kiełah kiraŭniku Kramla.
Jon taksama vykazaŭ mierkavańnie, što Pucin nie maje namieru zachoplivać usiu terytoryju Ukrainy. Adnoj z pryčyn hetaha Kiełah nazvaŭ toje, što Rasija, na jaho dumku, prosta nie maje takich mahčymaściaŭ:
«U jaho niama bajavych mahčymaściaŭ dla hetaha. I jon zaŭsiody atakuje centry nasielenych punktaŭ».
Asobna Kiełah vykazaŭsia pra pazicyju Ukrainy i vysoka jaje acaniŭ.
«Ukraina nie źbirajecca zdavacca. Ukraincy nie źbirajucca dobraachvotna addavać ziamlu. Jany — vydatnaja bajavaja siła. Jany vykanali vyklučnuju, nadzvyčajnuju pracu. I ja dumaju, što nam prosta treba skazać prezidentu Pucinu taho, čaho jon nie choča rabić: vam čas viarnucca dadomu i spynić hetuju vajnu!» — zajaviŭ jon, źviartajučysia da Pucina.
Kiełah taksama skazaŭ, što, na jaho dumku, Rasija nikoli nie zmoža pieramahčy ŭ hetaj vajnie.
Ciapier čytajuć
Što viadoma pra viciebčuka, jakoha vinavaciać u sprobie padryvu samalota ŭ Hiermanii16
Kamientary