Rasija i ZŠA ŭ AAN prybrali patrabavańnie pra kantrol čałaviekam nad vajskovym štučnym intelektam

Amierykanskija i rasijskija dypłamaty sumiesna asłabili prajekt mižnarodnaha pahadnieńnia ab vykarystańni aŭtanomnaj zbroi sa štučnym intelektam. Z dakumienta, siarod inšaha, prybrali patrabavańnie, kab čałaviek praviaraŭ vybranyja ałharytmam celi pierad naniasieńniem udaru, piša The Washington Post.

U pačatku vieraśnia sotni dypłamataŭ sabralisia ŭ Ženievie, kab vypracavać pieršyja hłabalnyja praviły vykarystańnia śmiarotnaj aŭtanomnaj zbroi na asnovie štučnaha intelektu. Adnak u apošni dzień pieramoŭ abmierkavańnie nabyło asabliva vostry charaktar.

Pavodle troch krynic vydańnia, znajomych z chodam pieramoŭ, pradstaŭniki ZŠA i Rasii na praciahu prykładna 15 hadzin unosili ŭ dakumient šmatlikija praŭki. Pasiadžeńnie prachodziła za začynienymi dźviaryma: kamiery AAN byli vyklučanyja, a pradstaŭnikoŭ hramadzianskaj supolnaści paprasili pakinuć zału.

Abiedźvie krainy pryviali na pieramovy kamandy pryblizna ź dziesiaci jurystaŭ — amal udvaja bolšyja, čym u bolšaści inšych delehacyj. Praŭki ŭnosilisia tak chutka, što pradstaŭniki inšych krain nie paśpiavali ich analizavać.

«Heta była śmierć ad tysiačy drobnych parezaŭ papieraj», — apisaŭ pieramovy adzin z surazmoŭcaŭ The Washington Post.

Pa źviestkach vydańnia, amierykanskija i rasijskija dypłamaty damahlisia vydaleńnia farmulovak, pavodle jakich aŭtanomnyja sistemy pavinny pracavać «pradkazalna» i «nadziejna». Z dakumienta taksama vyklučyli patrabavańnie ŭličvać etyčnyja mierkavańni pry vykarystańni zbroi sa štučnym intelektam.

Ale najbolš istotnaj stała admova ad pałažeńnia, jakoje abaviazvała čałavieka praviarać peŭnyja vajskovyja celi, vybranyja štučnym intelektam, pierš čym nanosić pa ich udar.

Pravaabaroncy papiaredžvajuć, što takoje asłableńnie praviłaŭ moža faktyčna dazvolić mašynam samastojna prymać rašeńni, ad jakich zaležać čałaviečyja žyćci.

«Heta moža aznačać, što mašyny zmohuć prymać rašeńni pra žyćcio i śmierć biez kantrolu z boku čałavieka. Praktyčnyja nastupstvy vidavočnyja: bolšaja škoda dla mirnaha nasielnictva, mienšaja adkaznaść i imklivy ruch da bolš ryzykoŭnaj aŭtamatyzavanaj vajny», — zajaviła namieśnica dyrektara Human Rights Watch pa pytańniach uzbrajeńniaŭ Vieryci Kojł.

Pieramovy adbyvajucca na fonie imknieńnia Pientahona jak maha chutčej ukaranić štučny intelekt u vajskovyja apieracyi. Pavodle The Washington Post, amierykanskija vajskoŭcy ŭžo vykarystoŭvali čat-bot kampanii Anthropic dla vyznačeńnia amal tysiačy celaŭ u pieršyja 24 hadziny vajny ź Iranam. Izrail taksama aktyŭna vykarystoŭvaje sistemy štučnaha intelektu padčas apieracyj u siektary Haza.

Pry hetym u 2023 hodzie Ministerstva abarony ZŠA abnaviła ŭłasnuju dyrektyvu ab aŭtanomnych sistemach uzbrajeńnia. Jana, u pryvatnaści, praduhledžvaje ŭdzieł čałavieka ŭ acency i praviercy takich sistem, a taksama patrabuje vykonvać zakony i zvyčai vajny.

U žniŭni 2024 hoda hienieralny sakratar AAN Antoniu Huteryš nazvaŭ vybar celaŭ ałharytmami «maralnaj miažoj, jakuju nielha pierachodzić», i zaklikaŭ pryniać jurydyčna abaviazkovaje mižnarodnaje pahadnieńnie, jakoje zabaraniała b sistemy ŭzbrajeńnia biez čałaviečaha kantrolu.

Nastupny raŭnd pieramoŭ projdzie ŭ Ženievie ŭ listapadzie. Krainy pavinny vyrašyć, ci atrymaje praca nad praviłami dla aŭtanomnaj zbroi aficyjny mandat.

• 0
• 0
• 0
• 0
• 0
• 0
• 3
• 0