Čałaviek hadami chodzić pa brytanskich sudach i patrabuje biełaruskaha pierakładčyka, choć sam piša pa-anhlijsku

Vysoki sud Anhlii admoviŭ žycharu Łondana Sierdžya Hraftu (Sergio Graft) adrazu ŭ troch skarhach. U sudovych pasiadžeńniach jon udzielničać nie choča, pakul jamu nie daduć pierakładčyka ź biełaruskaj movy, jaki b jašče i vałodaŭ «uschodnim dyjalektam». Pry hetym sudździ adznačajuć, što pa-anhlijsku jon piša svabodna.

22 vieraśnia 2026 hoda sudździa Vysokaha suda Chezier Uiljams razhledzieła try zajavy Hrafta na sudovy pierahlad (judicial review). Adna datyčyła rašeńnia akruhovaha suda Uiłzdena, dźvie — rajona Chamierśmit i Fulem. Hraft pryjšoŭ u Karaleŭskija sudy na vulicy Strend, ale ŭ zału nie zajšoŭ. Supracoŭniku suda jon pieradaŭ «paviedamleńnie sudu». U im jon piša, što nie moža ŭdzielničać u pracesie, bo jamu «niezakonna admovili» ŭ «abaviazkovych razumnych prystasavańniach»: u pasredniku ź dziaržaŭnaj prahramy Miniusta i ŭ biełaruskim pierakładčyku.

Heta ŭžo treci raz, kali Hraft prychodzić u budynak suda i admaŭlajecca zajści ŭ zału. Toje ž samaje było ŭ lipieni 2025 hoda ŭ akruhovym sudzie Uiłzdena i ŭ žniŭni 2026 hoda ŭ Vysokim sudzie.

Sudździ sumniavajucca, što Hraftu patrebny pierakładčyk. Jašče ŭ žniŭni sudździa Endru Kinijer pisaŭ, što pavodle dakumientaŭ Hraft maje «dobry, navat svabodny» ŭzrovień anhlijskaj. Jon daŭ Hraftu «apošni šaniec» dakazać, navošta jamu pierakładčyk i pasrednik, i papiaredziŭ: «prostych śćvierdžańniaŭ budzie niedastatkova».

Hraft i sam pryznaŭ, što składaje dakumienty i viadzie pierapisku pa-anhlijsku. Adnak, na jahonuju dumku, udzieł u vusnych słuchańniach — «asobnaje pytańnie». Pierakładčyk, piša jon, pavinien siadzieć pobač ź im, bo ŭ jaho drenny słych. Sudździa Uiljams adznačyła, što nijakich miedyčnych dokazaŭ prablem sa słycham Hraft sudu nie daŭ. Jon taksama ni razu nie prasiŭ ničoha źviazanaha sa słycham, naprykład indukcyjnuju piatlu.

Sudździa dadała, što Hraft «vyrazna vykłaŭ svaju pazicyju» prynamsi ŭ čatyroch piśmovych arhumientach. Adnojčy jon dasłaŭ u sud list na 105 punktaŭ. Jana taksama zaŭvažyła, što ŭ adnoj sa skarhaŭ Hraft spasyłaŭsia na čatyry sudovyja spravy, i try ź ich znajści nie ŭdałosia.

Sudździa dapuściła, što heta moža być vynik «halucynacyj» štučnaha intelektu, ale nie mieła mahčymaści spytać pra heta ŭ Hrafta.

Sud hatovy byŭ dapamahać Hraftu inačaj: dać jamu bolš času na adkazy, rabić pierapynki, havaryć pavolna. Pra heta sudździa zahadzia napisała ŭ svajoj pastanovie. Ale ŭ zału Hraft tak i nie zajšoŭ.

U Łondanie Hraft žyvie daŭno. Z 2016 hoda jon zdymaje kvateru ŭ žyllovaj arhanizacyi Peabody u Fulemie. U mai 2025 hoda rajon zabaraniŭ u joj žyć praz syraść i ćvil. Peabody choča zrabić ramont i prapanuje Hraftu časova pierasialicca. Pavodle Peabody i rajona, jon nie puskaje rabočych i ad pierasialeńnia admaŭlajecca. Hraft heta asprečvaje, i ciapier sprečku razhladaje mahistracki sud. Sam Hraft patrabuje, kab jaho pieraviali ŭ pieršuju čarhu na žyllo. Vysoki sud pryznaŭ jahonyja skarhi nieabhruntavanymi. Adzin ź iskaŭ, akramia taho, sud adchiliŭ pa pracedurnaj pryčynie: Hraft nie dastaviŭ jaho adkazčyku, bo dumaŭ, što heta abaviazak suda.

Jašče adna historyja — isk da ŭłasnaj palikliniki za miedyčnuju niadbajnaść. Hety isk adchilili jašče ŭ 2022 hodzie. Z taho času Hraft padaŭ prynamsi siem zajaŭ, kab spravu adnavili, a taksama źviazanyja ź joj zajavy. Paliklinika prosić pryznać ich całkam biespadstaŭnymi i maje namier damahacca, kab Hraftu zabaranili padavać novyja zajavy.

Pra siabie Hraft piša, što maje invalidnaść. Taja samaja paliklinika North End Medical Centre u listach 2017—2024 hadoŭ śviedčyć, što jon pakutuje na «chraničnyja prablemy ź psichičnym zdaroŭjem, uklučajučy posttraŭmatyčnaje stresavaje rasstrojstva i psichozy», i tamu nie moža pracavać. Pavodle lista 2018 hoda, PTSR jamu dyjahnastavali ŭ 2002 hodzie, šyzafreničnyja rasstrojstvy — u 2009-m, rasstrojstva asoby — u 2014-m.

Ci biełarus Hraft, z sudovych dakumientaŭ nie vynikaje: pra hramadzianstva i pachodžańnie tam ničoha niama.

• 3
• 0
• 1
• 0
• 3
• 1
• 1
• 0