Pucin źmianiŭ «płan pieramohi»: zamiest praryvu na froncie — vajna haradoŭ

Jašče ŭ 2024 hodzie Uładzimir Pucin zajaŭlaŭ: «Našy vojski prasoŭvajucca pa ŭsioj linii sutyknieńnia». Maskva spadziavałasia źniasilić ukrainskuju armiju i ŭrešcie pieramahčy na poli boju.

Adnak rasijski nastup nie prynios čakanaha pierałomu, a straty praciahvajuć raści. Pavodle acenak brytanskich vajskoŭcaŭ, jakija pryvodzić Frankfurter Allgemeine Zeitung,

Rasija straciła zabitymi i paranienymi kala 1,5 miljona vajskoŭcaŭ. Prykładna 500 tysiač ź ich mahli zahinuć.

Tamu, piša ahladalnik FAZ, Pucin pierachodzić da inšaha «płana pieramohi» — tak zvanaj vajny haradoŭ.

Jaje meta — sistematyčnymi ŭdarami pa ŭsioj terytoryi Ukrainy razburyć ekanomiku, uskładnić žyćcio nasielnictva i prymusić Kijeŭ prasić miru.

Blizki da rasijskich vajskoŭcaŭ telehram-kanał Rybar apisvaje hety raźlik jašče bolš adkryta: Ukrainu chočuć pieratvaryć u nastolki prablemny i zatratny aktyŭ, kab zachodnim sajuźnikam stała niavyhadna jaje padtrymlivać. Pry hetym rakiety i bieśpiłotniki, na dumku aŭtaraŭ kanała, abychodziacca Rasii tańniej, čym utrymańnie i papaŭnieńnie vialikaj armii na froncie.

Hałoŭnaj mišeńniu stanovicca Kijeŭ

Šviejcarskaje vydańnie NZZ źviartaje ŭvahu na pavieličeńnie maštabu atak na ŭkrainskuju stalicu. Rasijskija bieśpiłotniki pačali metanakiravana atakavać kijeŭskija masty cieraz Dniapro.

Paśla niekalkich udaraŭ Paŭdniovy i Paŭnočny masty, a taksama most Patona całkam pierakryvali. Ruch pa moście Mietro, jakim karystajucca aŭtamabili i ciahniki, abmiažoŭvali.

Paškodžańnie hetych abjektaŭ moža paralizavać značnuju častku stalicy. Dniapro padzialaje Kijeŭ na dźvie častki: na pravym bierazie znachodziacca dziaržaŭnyja ŭstanovy, biznes i značnaja častka pracoŭnych miescaŭ, a na levym žyvuć sotni tysiač ludziej.

The New York Times papiaredžvaje pra mahčymy «łahistyčny kašmar». Mahčymaściaŭ abjechać paškodžanyja masty amal niama: najbližejšy aŭtamabilny most na poŭdzień ad Kijeva znachodzicca prykładna za 145 kiłamietraŭ.

Adnačasova Rasija atakuje škoły, pasažyrskija ciahniki, zapraŭki, pamiežnyja punkty, składy, data-centry, miedycynskija schoviščy i pramysłovyja pradpryjemstvy. Adzin ź bieśpiłotnikaŭ trapiŭ u kijeŭskuju škołu padčas zaniatkaŭ. Dzieci i nastaŭniki paśpieli schavacca va ŭkryćci, tamu achviar nie było.

Pierad hetym byli paškodžanyja budynak Akademii navuk i radzilny dom.

«Rasijanie nie zmahli nas akupavać. Tamu ciapier jany ździajśniajuć masavanyja ataki i masavyja zabojstvy», — zajaviŭ Uładzimir Zialenski.

Pavodle jaho, ukrainskaja raźviedka atrymała źviestki, što Pucin zahadaŭ bolš nie prytrymlivacca nijakich abmiežavańniaŭ: «Ciapier — nijakich praviłaŭ».

Raźlik na zimu i słabuju supraćpavietranuju abaronu

Novaja stratehija Maskvy stanovicca bolš niebiaśpiečnaj praź niedachop va Ukrainy srodkaŭ supraćpavietranaj abarony. Pavodle NZZ, zapasy rakiet dla amierykanskich kompleksaŭ Patriot značna skaracilisia, a častka resursaŭ ZŠA ciapier idzie na vajnu ź Iranam.

Adnačasova Rasija naroščvaje vytvorčaść reaktyŭnych bieśpiłotnikaŭ. Kali raniej Ukraina pierachoplivała kala 90% pavietranych celaŭ, to ŭ vieraśni pakazčyk źniziŭsia da 55—57%.

Asablivuju staŭku Maskva, na dumku Konrada Šulera, robić na nastupnuju zimu. Udary pa elektrastancyjach, sistemach aciapleńnia i pramysłovych pradpryjemstvach pavinny stvaryć ciažkija ŭmovy dla miljonaŭ ludziej i ŭzmacnić ekanamičny cisk na Kijeŭ.

Razam z tym Rasija rychtujecca nie tolki da zimovaj kampanii, ale i da praciahłaj vajny. U nastupnym hodzie Maskva płanuje pavialičyć vajskovyja vydatki prykładna na 40% u paraŭnańni z raniejšym płanam.

• 0
• 0
• 1
• 0
• 0
• 2
• 27
• 0