Premjer Brytanii zajaviŭ, što Rasija ŭmiešvałasia ŭ refierendum pa breksicie dziesiać hadoŭ tamu

Premjer-ministr Vialikabrytanii Endzi Biornem zajaviŭ, što Rasija sapraŭdy ŭmiešvałasia ŭ refierendum ab vychadzie Vialikabrytanii ź Jeŭrasajuza ŭ 2016 hodzie, i papiaredziŭ, što Maskva zajmajecca padobnym u Francyi i Hiermanii, piša Bi-bi-si.

Biornem raskazaŭ u padkaście The Rest is Politics, što, upieršyniu trapiŭšy na Daŭninh-stryt paśla abrańnia lidaram Lejbarysckaj partyi i pryznačeńnia premjer-ministram, jon spytaŭ pra mahčymaje ŭmiašańnie Rasii ŭ toje hałasavańnie.

«Ja atrymaŭ vyrazny adkaz: tak, takoje mieła miesca», — skazaŭ Biornem.

«Ja liču, što my nasamreč zanadta pasiŭna reahavali na heta i niedastatkova infarmavali ludziej pra toje, u jakoj stupieni z-za miažy sprabujuć destabilizavać palityčny praces», — dadaŭ jon.

Biornem nie pryvioŭ dadatkovych padrabiaznaściej pra charaktar abo maštaby dziejnaści Maskvy padčas refierendumu pa breksicie.

Zajava vyklikała krytyku z boku prychilnikaŭ niezaležnaści Vialikabrytanii ad ES. Hrupa aktyvistaŭ Britain Unbound nazvała kamientaryi Bierniema «jašče adnoj hrubaj sprobaj padarvać lehitymnaść rašeńnia, pryniataha brytanskim narodam u 2016 hodzie».

U zajavie hrupy adznačajecca, što zamiežnaje ŭmiašańnie ŭ vybary ŭ Vialikabrytanii «vidavočna nieprymalnaje», ale dadajecca: «Niama važkich padstaŭ mierkavać, što na vynik refierendumu 2016 hoda paŭpłyvała ŭmiašańnie Rasii». «Akramia taho, abraźliva mierkavać, što vybarščykaŭ tak lohka padmanuć», — zajavili aktyvisty.

U intervju viadučym padkasta, jakoje pavinna vyjści ŭ efir u paniadziełak, Biornem zajaviŭ, što abmiarkoŭvaŭ prablemu rasijskaha ŭmiašańnia z kancleram Frydrycham Miercam padčas svajho vizitu ŭ Hiermaniju ŭ pačatku tydnia.

«Biezumoŭna, isnuje dezinfarmacyja, jakaja zychodzić z Rasii i ŭpłyvaje na niamieckuju palityku», — skazaŭ jon.

Kiraŭnik brytanskaha ŭrada praciahnuŭ: «Ciapier važna vyrazna zafiksavać hetyja fakty, i ja miarkuju, što heta dapamoža vybarščykam u Hiermanii i Francyi zrazumieć: častka hetaj palityki inicyjujecca našymi vorahami, a mienavita Rasijaj».

Upieršyniu za 10 hadoŭ z momantu refierendumu i paśla źmieny siami ŭradaŭ premjer-ministr krainy zajaviŭ, što Rasija sprabavała paŭpłyvać na vynik refierendumu.

Adnak papiaredžańni pra sproby Kramla ŭździejničać na palityku Vialikabrytanii hučać rehularna.

U 2020 hodzie parłamiencki Kamitet pa raźviedcy i biaśpiecy apublikavaŭ dakład pra ŭmiašańnie Rasii ŭ vybary i refierendumy ŭ Vialikabrytanii.

U dakładzie nie było adnaznačnaj vysnovy pra toje, ci sprabavała Rasija paŭpłyvać na vyniki refierendumu ab vychadzie ź ES, adnak u im raskrytykavali ŭrady, jakija źmianiali adzin adnaho, za toje, što jany nie zmahli ŭ poŭnaj miery acanić hetuju pahrozu i supraćstajać joj.

U vieraśni, vystupajučy na Hienieralnaj Asamblei AAN, Endzi Biornem abvinavaciŭ rasijskija śpiecsłužby ŭ vykarystańni «ŭsich dastupnych im srodkaŭ dla raspaŭsiudžvańnia chłuśni i dezinfarmacyi, a taksama dla śpiekulacyi na strachach ludziej».

Biornem zajaviŭ, što Vialikabrytanija stvoryć novy centr dla «strymlivańnia atrutnaj chvali» dezynfarmacyi.

• 0
• 0
• 0
• 0
• 0
• 0
• 0
• 0