Pieršy tankier z rasijskim dyzielem užo padychodzić da bierahoŭ ZŠA

Kampanija marskoj analityki Windward AI adsočvaje tankier, jaki, vierahodna, viazie pieršuju partyju rasijskaha dyziela da ŭschodniaha ŭźbiarežža ZŠA. Čakajecca, što sudna prybudzie tudy pryblizna praz 48—72 hadziny.

Analityk i ekśpiertka ŭ śfiery nieprazrystaha sudnachodstva, «cieniavoha fłotu» i suśvietnaha handlu Mišel Vize Bokman adznačyła, što padziei raźvivajucca vielmi chutka. Mienš čym za sutki da hetaha Upraŭleńnie kantrolu za zamiežnymi aktyvami Ministerstva finansaŭ ZŠA (OFAC) vydała hienieralnuju licenziju № 135, jakaja časova dazvalaje prodaž i impart rasijskaha dyzielnaha paliva i hazojlu da krasavika 2027 hoda.

Pry hetym abjom rasijskaha dyziela i hazojlu, dastupnaha dla zakupki, abmiežavany. Pavodle acenki analityki, ciapier u ZŠA, vierahodna, možna budzie impartavać tolki niekalki partyj paliva. Takija pastaŭki naŭrad ci zmohuć likvidavać suśvietny deficyt abo istotna paŭpłyvać na ŭnutranyja ceny ŭ Złučanych Štatach.

Pavodle danych Vortexa, u trecim kvartale rasijski ekspart dyzielnaha paliva i hazojlu skaraciŭsia da 190 tysiač baralaŭ za dzień. Dla paraŭnańnia, u druhim kvartale hety pakazčyk składaŭ 690 tysiač baralaŭ, a ŭ pieršym — 850 tysiač.

U lipieni Rasija praciahnuła zabaronu na ekspart bienzinu i dyzielnaha paliva, sprabujučy pieraadoleć unutrany deficyt, jaki ŭźnik paśla atak na rasijskija naftapierapracoŭčyja zavody ŭ 2026 hodzie. Pavodle źviestak Ministerstva abarony Ukrainy na 4 kastryčnika, nie pracavała 51% naftapierapracoŭčych mahutnaściaŭ Rasii.

Deficyt paliva byŭ nastolki značnym, što ŭ trecim kvartale Rasija sama impartavała dyzielnaje paliva, hazojl i bienzin. Apošniuju takuju pastaŭku zafiksavali 7 kastryčnika: u rasijski port Vysock prybyli 150 tysiač baralaŭ dyziela na tankiery siaredniaha kłasa Soyana, jaki chodzić pad rasijskim ściaham i znachodzicca pad zachodnimi sankcyjami. Pra heta śviedčać danyja Vortexa.

Vize Bokman taksama źviarnuła ŭvahu, što šaścimiesiačny termin dziejańnia licenzii moža śviedčyć pra adsutnaść čakańniaŭ chutkaha adnaŭleńnia svabodnaha sudnachodstva ŭ Armuzskim pralivie.

Pakul ciažka skazać, ci paśla damoŭlenaści Donalda Trampa z Uładzimiram Pucinym tankieru apieratyŭna źmianili kančatkovy punkt pryznačeńnia, ci damoŭlenaść pamiž amierykanskim prezidentam i rasijskim kiraŭnikom mahła być dasiahnutaja značna raniej, jašče ŭ vieraśni, i tolki ciapier pra jaje abjavili publična.

• 1
• 1
• 2
• 4
• 0
• 0
• 3
• 0