Паводле даных аналітычнай кампаніі Vortexa, танкер сярэдняга класа MINERVA ZEN выйшаў з Санкт-Пецярбурга 22 верасня з грузам каля 280 тысяч бараляў дызельнага паліва і газойлю. З таго часу пункт прызначэння судна не раскрываўся.
Кампанія марской аналітыкі Windward AI адсочвае танкер, які, верагодна, вязе першую партыю расійскага дызеля да ўсходняга ўзбярэжжа ЗША. Чакаецца, што судна прыбудзе туды прыблізна праз 48—72 гадзіны.
Аналітык і экспертка ў сферы непразрыстага суднаходства, «ценявога флоту» і сусветнага гандлю Мішэль Візэ Бокман адзначыла, што падзеі развіваюцца вельмі хутка. Менш чым за суткі да гэтага Упраўленне кантролю за замежнымі актывамі Міністэрства фінансаў ЗША (OFAC) выдала генеральную ліцэнзію № 135, якая часова дазваляе продаж і імпарт расійскага дызельнага паліва і газойлю да красавіка 2027 года.
Пры гэтым аб’ём расійскага дызеля і газойлю, даступнага для закупкі, абмежаваны. Паводле ацэнкі аналітыкі, цяпер у ЗША, верагодна, можна будзе імпартаваць толькі некалькі партый паліва. Такія пастаўкі наўрад ці змогуць ліквідаваць сусветны дэфіцыт або істотна паўплываць на ўнутраныя цэны ў Злучаных Штатах.
Паводле даных Vortexa, у трэцім квартале расійскі экспарт дызельнага паліва і газойлю скараціўся да 190 тысяч бараляў за дзень. Для параўнання, у другім квартале гэты паказчык складаў 690 тысяч бараляў, а ў першым — 850 тысяч.
У ліпені Расія працягнула забарону на экспарт бензіну і дызельнага паліва, спрабуючы пераадолець унутраны дэфіцыт, які ўзнік пасля атак на расійскія нафтаперапрацоўчыя заводы ў 2026 годзе. Паводле звестак Міністэрства абароны Украіны на 4 кастрычніка, не працавала 51% нафтаперапрацоўчых магутнасцяў Расіі.
Дэфіцыт паліва быў настолькі значным, што ў трэцім квартале Расія сама імпартавала дызельнае паліва, газойль і бензін. Апошнюю такую пастаўку зафіксавалі 7 кастрычніка: у расійскі порт Высоцк прыбылі 150 тысяч бараляў дызеля на танкеры сярэдняга класа Soyana, які ходзіць пад расійскім сцягам і знаходзіцца пад заходнімі санкцыямі. Пра гэта сведчаць даныя Vortexa.
Візэ Бокман таксама звярнула ўвагу, што шасцімесячны тэрмін дзеяння ліцэнзіі можа сведчыць пра адсутнасць чаканняў хуткага аднаўлення свабоднага суднаходства ў Армузскім праліве.
Пакуль цяжка сказаць, ці пасля дамоўленасці Дональда Трампа з Уладзімірам Пуціным танкеру аператыўна змянілі канчатковы пункт прызначэння, ці дамоўленасць паміж амерыканскім прэзідэнтам і расійскім кіраўніком магла быць дасягнутая значна раней, яшчэ ў верасні, і толькі цяпер пра яе аб'явілі публічна.
Трамп: Украіне прыйшоў час завесці новага прэзідэнта
Трамп заявіў аб галавакружнай хуткасці ўрэгулявання баёў ва Украіне
Трамп заявіў, што паспяхова дамовіўся з Пуціным пра пастаўкі паліва
Мінфін ЗША зняў усе санкцыі з расійскага дызелю
ЗША пагражаюць Украіне спыненнем перадачы разведвальных даных, калі ўдары па расійскіх НПЗ працягнуцца
Крэмль: Пуцін сказаў Трампу, што падумае, калі аднавіць перамовы па Украіне
Цяпер чытаюць
У Мінску прадаюць дом на вадзе. Колькі просяць за незвычайны аб'ект на Чыжоўскім вадасховішчы?3
Каментары