Dekretnyja dapamohi źbirajucca raźličvać z ulikam zarobkaŭ baćkoŭ dziciaci
U Biełarusi płanujuć źmianić paradak raźliku dapamohi pa dohladzie dziciaci va ŭzroście da troch hadoŭ. Miarkujecca, što pamier vypłaty budzie zaležać ad zarobku baćkoŭ da vychadu ŭ adpačynak pa dohladzie dziciaci. Adpaviedny zakonaprajekt užo pieradadzieny na razhlad va ŭrad, paviedamiła namieśnica ministra pracy i sacyjalnaj abarony Julija Bierdnikava.
U Ministerstvie pracy nieabchodnaść źmienaŭ tłumačać demahrafičnymi zruchami. Za apošnija 25 hadoŭ siaredni ŭzrost biełaruskich žančyn pry naradžeńni pieršaha dziciaci pavialičyŭsia z 22 da 27,5 hoda. Raniej adziny pamier dapamohi ličyŭsia apraŭdanym, bo mnohija maładyja baćki jašče vučylisia i nie paśpiavali pabudavać karjeru. Ciapier ža da naradžeńnia dziciaci mnohija siemji ŭžo majuć pracoŭny vopyt i stabilny zarobak, tamu pierapynak u pracy moža istotna źnizić ich zvykłyja dachody.
Prapanavanaja sistema praduhledžvaje, što pry vyznačeńni dapamohi buduć uličvać realny zarobak baćkoŭ da vychadu ŭ adpačynak pa dohladzie dziciaci. Takim čynam ułady chočuć nablizić pamier vypłaty da papiarednich dachodaŭ čałavieka.
Pry hetym u Ministerstvie pracy raniej zajaŭlali, što paśla źmieny paradku raźliku dapamoha nie pavinna być mienšaj za ciapierašniuju.
Zaraz dapamoha pa dohladzie pieršaha dziciaci składaje 1057,7 rubla ŭ miesiac. Heta 35% siaredniaha zarobku rabotnikaŭ u krainie. Kali novyja praviły prymuć, baćki z dastatkova vysokimi dachodami da dekretnaha adpačynku zmohuć atrymlivać bolš.
U jakaści maksimalnaha pamieru štomiesiačnaj vypłaty prapanujecca ŭstanavić siaredni zarobak pa krainie. U žniŭni 2026 hoda jon składaŭ 3135,9 rubla. Takim čynam, pry realizacyi inicyjatyvy dapamoha ŭ asobnych vypadkach moža nablizicca da hetaj sumy. Adnak kankretny pamier vypłaty budzie zaležać ad umoŭ, zamacavanych u kančatkovaj viersii zakona, i nie ŭsie baćki zmohuć raźličvać na maksimalnuju sumu.
Raniej mierkavałasia, što zakonaprajekt razhledziać na vosieńskaj siesii parłamienta adrazu ŭ dvuch čytańniach. Kali jaho prymuć u zapłanavanyja terminy, novyja praviły mohuć pačać dziejničać z 1 studzienia 2027 hoda. Adnak hetaja data pakul nie kančatkovaja: dakumient pavinien prajści ŭsie nieabchodnyja pracedury i być aficyjna pryniaty.
U Kitai ŭžo daŭno niama palityki adnaho dziciaci, ale ludzi nie chočuć naradžać bolš. Čamu?
Ci mohuć mužčynie admović u dekretnym adpačynku pa dohladzie za dziciom?
Biełarusy horača spračajucca, ci varta pryviazvać dapamohu na dzicia da zarobku maci
Ministr adkazaŭ na čutki pra skaračeńnie dekretnaha adpačynku ŭ Biełarusi
Kamientary
vyrubić elektryčnaść, jak va Ukrainie? tady buduć pładzicca i razmnažacca?
tam z demahrafijaj usio norm?
pra nas nie kažu... u nas ža "stabilnaść"