BČ časova admienić ciahniki Minsk — Brest i skarocić maršruty da Maskvy i Sankt-Pieciarburha
Biełaruskaja čyhunka źmienić ruch šerahu pasažyrskich ciahnikoŭ 22 i 29 kastryčnika praz płanavy kapitalny ramont čyhunačnaha mosta na pierahonie Haradzieja — Paharelcy na ŭčastku Minsk — Brest. Źmieny zakranuć ciahniki pamiž Minskam i Brestam, a taksama sastavy z Maskvy i Sankt-Pieciarburha.
U hetyja dni całkam admieniać ciahniki № 727/728, № 725/726 i № 737/738, jakija kursujuć pamiž Minskam i Brestam.
Ciahnik № 51 Sankt-Pieciarburh — Brest, jaki adpravicca z Sankt-Pieciarburha 21 i 28 kastryčnika, budzie dajazdžać tolki da Minska. U stalicu Biełarusi jon prybudzie 22 i 29 kastryčnika adpaviedna. U advarotnym kirunku ciahnik № 52 Brest — Sankt-Pieciarburh u hetyja dni budzie adpraŭlacca nie z Bresta, a ź Minska.
Anałahičnyja źmieny zakranuć ciahnik № 27 Maskva — Brest. Sastavy, jakija vypraviacca z Maskvy 21 i 28 kastryčnika, buduć kursiravać tolki da Minska i prybuduć tudy 22 i 29 kastryčnika.
Źmienicca i maršrut ciahnika № 680 Hrodna — Viciebsk ź bieśpierasadačnymi vahonami Hrodna — Sankt-Pieciarburh. 22 i 29 kastryčnika jon adpravicca z Hrodna ŭ 14:01 i budzie jechać da Minska praź Lidu i Maładziečna. Paśla Minska ciahnik vierniecca na zvyčajny maršrut.
Kab zabiaśpiečyć pieravozki pamiž Minskam, Baranavičami i Brestam, na 22 i 29 kastryčnika pryznačać dadatkovyja ciahniki.
Ciahnik № 655 Minsk — Brest adpravicca ź Minska ŭ 18:39 i prybudzie ŭ Brest u 23:35. Ciahnik № 886 Brest — Baranavičy vypravicca z Bresta ŭ 8:09 i prybudzie ŭ Baranavičy ŭ 10:04.
Ciahnik № 887 Baranavičy — Brest 22 kastryčnika adpravicca ŭ 15:05 i prybudzie ŭ Brest u 17:07. 29 kastryčnika jon vypravicca ŭ 14:55 i prybudzie ŭ 17:00.
Akramia taho, u hetyja dni častka rehijanalnych ciahnikoŭ ekanomkłasa na ŭčastku Minsk — Baranavičy budzie kursiravać pavodle źmienienych maršrutaŭ i raskładu.
Pravieryć raskład možna na sajcie Biełaruskaj čyhunki, u mabilnym dadatku «BČ. Moj pojezd» abo pa telefonie 105.
Kamientary