Bukmiekiery, «naša kava» ŭ «Mak.baj» i vajaŭničyja litoŭcy. Pahladzieli novaje humarystyčnaje šou ad STB
Stvaralniki novaha «DCH Šou», što na STB, abiacajuć niečakany humar. My pahladzieli pieršy vypusk i raskazvajem, što atrymałasia.
Za pieradačaj «DCH Šou» stajać ludzi, jakija nie pieršy hod na telebačańni. Heta prajekt mahiloŭskaj kamandy KVZ «Doktar Chaŭs». Stvoranaja ŭ mahiloŭskaj škole ŭ 2008-m, kamanda ŭ 2020‑m dabrałasia da vyšejšaj lihi KVZ, a ŭ 2022‑m jaje vyjhrała.
Tady mahiloŭskich chłopcaŭ i paciahnuła ŭ televizijnyja prajekty. U 2023‑m jany pryjšli ŭ šou «Kancerty» na TNT. U tym ža hodzie kapitan kamandy Pavieł Małachaŭ i adzin z aŭtaraŭ, Anton Łapyšaŭ, dałučylisia da kamandy Comedy Club Production i pačali pisać žarty dla šou «Adnojčy ŭ Rasii» na tym ža TNT. Jany taksama zdymajucca ŭ humarystyčnym šou «Kamandy» na rasijskim Pieršym kanale.
Ciapier mahiloŭskija kvzšniki ŭziali na siabie zadaču źniać, pavodle ich słovaŭ, pieršaje biełaruskaje humarystyčnaje šou — chacia, viadoma, humarystyčnyja prajekty rabili i raniej.
Pieršy vypusk «DCH Šou» vyjšaŭ na STB uviečary 23‑ha maja. Na scenie — chłopcy z «Doktar Chaŭs», u zali — biełaruskija sielebryci: kampazitar Valer Šmat z praŭładnaha art-hurta «Biełarusy», błohier Arkadź Łohvin i jahony bolš viadomy kaleha Kakabaj. U pieršych šerahach — Siaroha, pryjšoŭ taksama kiraŭnik STB Alaksandr Asienka.
Pačynali z abmierkavańnia navinaŭ. Pavieł Małachaŭ, kapitan «Doktar Chaŭs» i adnačasova viadučy prajekta, raskazaŭ, što ŭ Biełarusi źjaviłasia marožanaje z sollu, jakoje musić zacikavić łasioŭ, a taksama pavinšavaŭ Arynu Sabalenku z tytułam spartoŭki hoda pa viersii premii Laureus World Sports Awards. Jak kaža Małachaŭ, kali b Sabalenka jašče i naradziła traich, stała b čałaviekam hoda Minščyny.
Jašče adna navina ad viadučych — astranaŭty sfatahrafavali zvarotny bok Miesiaca va ŭnikalnym rakursie. Pa viersii «DCH Šou», jon vyhladaje voś tak:
Bukmiekieraŭ i ich rekłamu ŭspaminali i ŭ inšym epizodzie šou. Jaho aŭtary zładzili scenku z fud-korta: maŭlaŭ, niekalki chłopcaŭ źbirajucca tam i abmiarkoŭvajuć, na čym možna chutka zarabić. Siarod varyjantaŭ — adkryć bukmiekierskuju kantoru abo prymać staŭki na toje, kolki bližejšym časam adkryjecca ŭ nas bukmiekierskich kantor.
Jašče dziela chutkich hrošaj u scency prapanavali adkryć kaviarniu la restarana «Mak.baj» i pradavać tam amierykana. Jak viadoma, u samim «Mak.baj» zamiest amierykana ciapier pradajuć toj ža napoj, ale pad nazvaj «naša kava» — usio praz zahad Łukašenki.
Taksama ŭ šou ŭklučyli scenku pra toje, jak litoŭskija pamiežniki abmiarkoŭvajuć biełarusaŭ. Maŭlaŭ, adzin ź ich šmat času naziraŭ za biełaruskaj miažoj i ciapier raskazvaje kiraŭniku, čaho ž čakać ad susiedziaŭ.
Vyhladała heta brydka. I sprava nie tolki ŭ tym, što humarysty čamuści vyrašyli sparadyravać bałtyjski akcent u tym vyhladzie, u jakim jany jaho siabie ŭjaŭlajuć.
Chłopcy z «Doktar Chaŭs» pabudavali toj epizod z punktu hledžańnia naratyvu, što pamiž litoŭcami i biełarusami jość varožaść. Zrazumieła, što i z prapahandysckich naratyvaŭ možna žartavać, ale ž važna mieć pačućcio miery:
«Navošta hetyja biełarusy na svajoj AES budujuć treci reaktar, kali my spužalisia paśla pieršych dvuch? Boža moj! A što biełarusy zrabili z našaj pieršaj stalicaj, što z Navahrudkam? Jany jaho adramantavali?»
Byli ŭ šou niekalki chvilin impravizacyi, i heta było našmat lepš, čym napisanyja raniej (a to i zaćvierdžanyja) žarty. Heta byŭ uryvak, kali viadučyja prapanavali haściam samim dzialicca navinami, a potym ich kamientavali.
Adna z navinaŭ była pra dadatak dla pažyłych ludziej, u jakim tyja musiać dvojčy na dzień adznačać, što ź imi ŭsio dobra, i adzin ź viadučych paryravaŭ na heta — maŭlaŭ, jość jašče adna tema, dzie treba adznačacca dvojčy na dzień, nazyvajecca RUUS. Hledačy žart acanili.
U šou pryśviacili siłavikam asobnuju scenku pad nazvaj «Pracoŭny dzień u Śledčym kamitecie». Pavodle siužetu, u toj kamitet prychodzić 67‑hadovaja žančyna, ale zamiest taho, kab vyrašyć jaje prablemy, śledčyja zapisvajuć tyktoki. Abyhrali i jaje ŭzrost praź miem «6-7».
Stvaralniki šou vydzialili čas na žarty pra Biełaruś, stvoranyja niejrasietkami, i adkryta pra heta skazali naviednikam. Akramia hetaha, vyrašyli abyhrać prysutnaść na šou błohiera Kakabaja, jaki apošnim časam robić pasty z ekstravahantnymi varyjantami kavy — naprykład, kuračyna (kava, padadzienaja ŭ kurycy hryl).
U Kakabaja spytali, čamu jon nazyvaje siabie miarzotnym tolki ŭ telehramie, a nie ŭ inšych sacsietkach. A potym prapanavali jamu na smak adroźnić koka-kołu ad bieła-koły i rahačoŭskuju zhuščonku ad hłybockaj.
Było jašče dva blakłyja numary, pra jakija šmat i nie skažaš. Pieršy ź ich — narada na pradpryjemstvie, dzie treba niekaha skaračać, ale amal usie mieniedžary — svajaki i tamu tak prosta ad ich nie adkrucicca. Ale adznačym dobry žart pra karjerysta, jaki tak chacieŭ prabicca ŭvierch, što padpisaŭsia na Azaronka.
Taksama ŭ šou pastavili stendap padletka pra žyćcio dzicia ŭ vioscy. I prydumali prafiesiju kałbaśje — maŭlaŭ, u Biełarusi z praduktami tak dobra, što biez kałbaśje dy małakaśje rasijskim turystam nie zrazumieć, što varta pryvieźci dachaty.
Va ŭsim hetym bahaćci žartaŭ pra bukmiekieraŭ, Sabalenku i ježu nie znajšłosia, na žal, miesca žartam na rodnaj movie. I heta było zaŭvažna jašče hledačam u zali — na toje, što varta było b žartavać i pa-biełarusku, humarystam ukazaŭ Valer Šmat.
Manieŭrujučy pamiž aktualnymi temami i niebiaśpiekaj, što napatkaje ŭ Biełarusi zdolnych śmieła vykazvacca, chłopcy z «DCH Šou» ryzykujuć tak i nie raźvić prajekt.
«Naša Niva» — bastyjon biełaruščyny
PADTRYMAĆ
Kamientary