Pajezdka ŭ Kreva da «Dreva paezii»: jość volnyja miescy

4 červienia ŭ miastečku Kreva, što na Hrodzienščynie, źjavicca Dreva Paezii. Pra heta padbajuć biełaruskija litaratary.

«Treba apracoŭvać svoj sad», — zaklikaŭ kaliści francuzski aśvietnik Fransua Valter. Na žal, siońnia možna śćviardžać: sad biełaruskaj paezii paradkam zaniadbany. Meta prajektu — «Dreva Paezii» — stvaryć u našaj krainie novyja znakavyja kropki, kala jakich budzie darečnym havaryć pra Litaraturu.

Ideja akcyi «Dreva Paezii» nie novaja. Jašče ŭ ramantyčnym XIX stahodździ ŭ šlachieckich parkach i falvarkach raśli drevy, pryśviečanyja vialikim paetam minuŭščyny i sučasnaści. Tak, jašče da niadaŭna ŭ Ščorsach, la siadziby Chraptovičaŭ, ros dub Adama Mickieviča, pad jakim, pavodle lehiendy, paet stvaryŭ svaju paemu «Hražyna»…

Siabry Biełaruskaha PEN-Centru vyrašyli adradzić tradycyju paetyčnych drevaŭ Biełarusi.

Dreva Paezii-2011 litaratary źbirajucca pryśviacić Uładzimiru Niaklajevu — bieź pierabolšańnia, hieroju apošnich miesiacaŭ. U płanach — zrabić akcyju štohadovaj, stvarajučy ŭ Biełarusi ŭsio bolš paetyčnych drevaŭ u honar kłasikaŭ i sučaśnikaŭ.

Adkryćcio Dreva Paezii i litaraturnaja impreza z hetaj nahody pačniecca 4 červienia, a 12-j hadzinie dnia ŭ miastečku Kreva na ziamli doma pa adrasie vuł. Smarhonskaja, 61 (u kirunku vyjezdu na Smarhoń).

U hetym domie pravioŭ pieršyja hady žyćcia Uładzimir Niaklajeŭ. U domie dahetul žyvie jaho rodnaja ciotka Alena Alaksandraŭna Mahier, jakoj paet pryśviaciŭ adzin sa svaich niadaŭnich tvoraŭ — paemu «Vialikdzień». Pole Mahieraŭ, na jakim źjavicca Dreva Paezii, naŭprost prylahaje da linii fornta pieršaj suśvietnaj vajny — u vakoliach jašče zachavalisia niamieckija fartyfikacyi.

Zaprašajem dałučacca da śviata! Vialikaja prośba da ŭsich, chto choča dałučycca, uličvać fakt, što akcyja adbudziecca na pryvatnaj terytoryi pa łaskavym zaprašeńni haspadaroŭ doma i pavodzicca dalikatna, prachodziačy da miesca akcyi praz padvorak!

Arhanizatary mierapryjemstva pakidajuć za saboj prava da apošniaj chviliny trymać u sakrecie bataničnyja padrabiaznaści padziei.

Paśla litaraturnaj imprezy ŭ cieniu Dreva Paezii adbudziecca piknik-majoŭka (biarycie sabojki!)

Jak dajechać da Kreva ź Miensku, kali ŭ vas niama mašyny

Možna jechać sa st.m. «Kamiennaja horka» maršrutkaj. Zamović miescy ŭ maršrutcy možna pa telefonie (029) 3950659. Miescy jašče jość!

Dadatkovaja ifarmacyja pa telefonach: (029) 6404679 (029)7508870. Da sustrečy ŭ sadzie Biełaruskaj Paezii!

• 0
• 0
• 0
• 0
• 0
• 0
• 0
• 0