Irynu Darafiejevu vyłučyli na Dziaržaŭnuju premiju

Padkamitety pa Dziaržaŭnych premijach apublikavali śpisy prac, dapuščanych da konkursu.

U halinie navuki i techniki na samuju prestyžnuju premiju krainy pretendujuć kalektyvy z samych roznych śfieraŭ.

Siarod ich pradstaŭniki vajskovaj pramysłovaści: NVA «Płanar» z farmuloŭkaj: «Raspracoŭka i asvajeńnie vypusku vysokadakładnaha zboračnaha i zondavaha abstalavańnia, jaho intehracyja ŭ vytvorčaść vyrabaŭ mikraelektroniki śpiecyjalnaha i dvajnoha pryznačeńnia» i Minski zavod kołavych ciahačoŭ za «raspracoŭku i vytvorčaść kołavych ciahačoŭ čaćviortaha pakaleńnia».

Na miažy vajskovaj i cyvilnaj industryi možna pastavić i raspracoŭku «Intehrała»: «Vytvorčaść kankurentazdolnych vysokanadziejnych mikraelektronnych vyrabaŭ dvajnoha i śpiecyjalnaha pryznačeńnia».

Jość u śpisie i miedyki, jakija raspracoŭvali novyja mietady lekavańnia žaŭtuch u dziaciej (Vilčuk, Hniedźka, Mastoŭnikaŭ z Centra «Maci i dzicia»).

Siarod inšych prysutničajuć navukoŭcy z BDU, jakija raspracoŭvali novyja niearhaničnyja złučeńni na hruncie mikra- i nanapamiernych čaścinak.

Akademija navuk vyłučyła na premiju raspracoŭku hałahram.

Navukova-vytvorčy centr Akademii navuk pa miechanizacyi sielskaj haspadarki vyłučyŭ impartazamiaščalnyja mašyny dla sielskaj haspadarki, a Ministerstva architektury i budaŭnictva — prajektnyja rašeńni enerhaefiektyŭnych damoŭ.

Davoli niezvyčajny zdabytak vyłučyli na premiju va Univiersitecie fizkultury. Heta «Raspracoŭka, asvajeńnie vytvorčaści i prasoŭvańnie na zamiežnyja rynki frykcyjnych trenažoraŭ z mnohimi stupieniami svabody». Za hetuju pracu naminavany Mikałaj Barysavič Socki.

U halinie kultury źviartaje ŭvahu naminacyja Iryny Darafiejevaj za kancertnyja prahramy ŭ ramkach turu «Pad mirnym niebam». Vyłučyła śpiavačku Biełaruskaja dziaržaŭnaja ordena Pracoŭnaha Čyrvonaha Ściaha fiłarmonija, a padtrymała — Ministerstva kultury.

Siarod inšych naminantaŭ — akciorski kalektyŭ «Pinskaj šlachty» z Kupałaŭskaha. Jość dva piśmieńniki: Mikoła Čarniaŭski za dziciačuju knihu «Soniečny košyk» i były ministr infarmacyi i kultury Biełarusi Anatol Butevič za sieryju knih «Siem cudaŭ Biełarusi».

Vyłučanyja i aŭtary prajekta rekanstrukcyi minskaj Opiery, muzyka Usievaład Plihaŭka, a taksama skulptary Uładzimir Słabodčykaŭ i Ihar Marozaŭ za cykł pracaŭ na vajennuju tematyku.

Try dziaržpremii ŭ halinie navuki i techniki i jašče try -- u halinie kultury prysudžajucca što dva hady. Pamier premii składaje 3500 bazavych vieličyń, abo, na siońnia, 350 miljonaŭ rubloŭ (45 tysiač dalaraŭ).

• 0
• 0
• 0
• 0
• 0
• 0
• 0
• 0