Сярод іншых прэтэндэнтаў — акцёры з «Пінскай шляхты» і стваральнік фрыкцыйных трэнажораў.
Падкамітэты па Дзяржаўных прэміях апублікавалі спісы прац, дапушчаных да конкурсу.
У галіне навукі і тэхнікі на самую прэстыжную прэмію краіны прэтэндуюць калектывы з самых розных сфераў.
Сярод іх прадстаўнікі вайсковай прамысловасці: НВА «Планар» з фармулёўкай: «Распрацоўка і асваенне выпуску высокадакладнага зборачнага і зондавага абсталявання, яго інтэграцыя ў вытворчасць вырабаў мікраэлектронікі спецыяльнага і двайнога прызначэння» і Мінскі завод колавых цягачоў за «распрацоўку і вытворчасць колавых цягачоў чацвёртага пакалення».
На мяжы вайсковай і цывільнай індустрыі можна паставіць і распрацоўку «Інтэграла»: «Вытворчасць канкурэнтаздольных высоканадзейных мікраэлектронных вырабаў двайнога і спецыяльнага прызначэння».
Ёсць у спісе і медыкі, якія распрацоўвалі новыя метады лекавання жаўтух у дзяцей (Вільчук, Гнедзька, Мастоўнікаў з Цэнтра «Маці і дзіця»).
Сярод іншых прысутнічаюць навукоўцы з БДУ, якія распрацоўвалі новыя неарганічныя злучэнні на грунце мікра- і нанапамерных часцінак.
Акадэмія навук вылучыла на прэмію распрацоўку галаграм.
Даволі незвычайны здабытак вылучылі на прэмію ва Універсітэце фізкультуры. Гэта «Распрацоўка, асваенне вытворчасці і прасоўванне на замежныя рынкі фрыкцыйных трэнажораў з многімі ступенямі свабоды». За гэтую працу намінаваны Мікалай Барысавіч Соцкі.
У галіне культуры звяртае ўвагу намінацыя Ірыны Дарафеевай за канцэртныя праграмы ў рамках туру «Пад мірным небам». Вылучыла спявачку Беларуская дзяржаўная ордэна Працоўнага Чырвонага Сцяга філармонія, а падтрымала — Міністэрства культуры.
Сярод іншых намінантаў — акцёрскі калектыў «Пінскай шляхты» з Купалаўскага. Ёсць два пісьменнікі: Мікола Чарняўскі за дзіцячую кнігу «Сонечны кошык» і былы міністр інфармацыі і культуры Беларусі Анатоль Бутэвіч за серыю кніг «Сем цудаў Беларусі».
Вылучаныя і аўтары праекта рэканструкцыі мінскай Оперы, музыка Усевалад Плігаўка, а таксама скульптары Уладзімір Слабодчыкаў і Ігар Марозаў за цыкл працаў на ваенную тэматыку.
Тры дзяржпрэміі ў галіне навукі і тэхнікі і яшчэ тры -- у галіне культуры прысуджаюцца што два гады. Памер прэміі складае 3500 базавых велічынь, або, на сёння, 350 мільёнаў рублёў (45 тысяч даляраў).
Каментары