Бацькі Качыньскіх пазнаёміліся ў Баранавічах, але ажаніліся ўжо ў Польшчы.
Згодна з аповедамі прэзыдэнта Польшчы Леха Качыньскага, ён мае беларускія карані па кудзелі. Па мячы ягоны дзед — Аляксандар Качыньскі — быў чыноўнікам, прысланым з этнічнай Польшчы ў Заходнюю Беларусь.
Маці братоў Качыньскіх Ядвіга паходзіць з роду Ясевічаў (герб Равіч), які, паводле яе слоў, належаў да «спалянізаванай літоўскай шляхты». Прадзед прэзыдэнтавай маці Вінцэнт за ўдзел у паўстаньні 1863 г. быў высланы ў Сібір. Яго жонка Канстанцыя сама выхавала дваіх дзяцей — Зоф’ю і Станіслава. Сын Станіслава Вінцэнт (дзед Качыньскіх па матчынай лініі) быў намесьнікам камандзіра брыгады Войска польскага ў Баранавічах.
У 1927 г. у Баранавічы са станцыі з-пад прускай мяжы перавялі высокага чыгуначнага чыноўніка Аляксандра Качыньскага. У Баранавічах Качыньскім жылося нядрэнна — яны мелі два дамы, вялікі сад і 12 га лесу. У заходнебеларускім горадзе Аляксандар і пазнаёміўся зь сям’ёй Ясевічаў, але ў 1939 г. яго накіравалі ў Берасьце, і знаёмства перарвалася. Аляксандар Качыньскі набыў у Берасьці вялікую камяніцу для сям’і, але скарыстацца набыткам не ўдалося — пачалася вайна.
Сяброўства сем’яў аднавілася пасьля вайны. І ўжо ў 1948 г. у Варшаве ажаніліся Аляксандраў сын, удзельнік Варшаўскага паўстаньня, інжынэр Раймунд Качыньскі і філёляг Ядвіга Ясевіч. 18 чэрвеня 1949 г. у іх нарадзіліся сыны-блізьняты Яраслаў і Лех. Але іх бацькі згадвалі пра Беларусь толькі ва ўспамінах.
Цяпер чытаюць
Беларусы горача спрачаюцца, ці варта прывязваць дапамогу на дзіця да заробку маці51
Беларусы горача спрачаюцца, ці варта прывязваць дапамогу на дзіця да заробку маці
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1313
Каментары