Выпрабаванні былі і раней, але тады высветлілася, што частка прыпынкаў для яго закароткая.
На вуліцы Вільні днямі выехаў трохсекцыйны Solaris Urbino 24 electric даўжынёй 24,8 метра. Ён змяшчае да 183 пасажыраў, але цяпер горад правярае менавіта гатоўнасць вуліц і прыпынкаў да транспарту такога памеру, піша «Волна».
З 18 жніўня спецыялісты гарадскога транспарту выпрабоўвалі манеўранасць аўтобуса на паваротах і кругавых развязках, правяралі, ці змяшчаецца ён на прыпынках і ў заезных кішэнях, а таксама мадэлявалі паломку і эвакуацыю машыны.
Аўтобус вывучалі на ўчастках, якія могуць увайсці ў транспартную сетку Вільні ў 2030—2035 гадах.
20 жніўня быў апошні дзень выпрабаванняў, пасля чаго дэманстрацыйная машына адправіцца ў Рыгу.
Батарэі ёмістасцю 704 кВт·г хапае на 260 кіламетраў. Поўная зарадка ад станцыі магутнасцю 150 кВт займае 4 гадзіны 45 хвілін.
Падобны 24‑метровы тралейбус ужо выпрабоўвалі ў Вільні ў 2021—2022 гадах — тады высветлілася, што частка прыпынкаў для яго занадта кароткая.
Цяперашні Solaris горад пакуль не набывае: ва ўжо заключаны кантракт на 112 электробусаў уваходзяць толькі 12– і 18‑метровыя MAN, якія павінны прыбыць да канца 2027 года. Саму магчымасць закупкі 25‑метровых машын VVT разгледзіць не раней за 2030 год — калі яны спатрэбяцца на найбольш загружаных маршрутах.
Каментары